കനാൻ സീനിയർ ലിവിംഗ്ഹോമിന്റെ കൂദാശയും ഉദ്ഘാടനവും ജൂലൈ 18-ന് നടക്കും.

കോട്ടയം ● പരിശുദ്ധ യാക്കോബായ സുറിയാനി ഓർത്തഡോക്സ് സഭയുടെ പരമാധ്യക്ഷനായ പരിശുദ്ധ മോറാൻ മോർ ഇഗ്നാത്തിയോസ് അഫ്രേം രണ്ടാമൻ പാത്രിയർക്കീസ് ബാവയുടെ നേരിട്ടുള്ള നിയന്ത്രണത്തിൽ പ്രവർത്തിക്കുന്ന മോർ അന്തോണിയോസ് ഇവാഞ്ചലിക്കൽ മിഷൻ (AEM) ട്രസ്റ്റിന്റെ ആഭിമുഖ്യത്തിൽ മുതിർന്ന പൗരന്മാർക്കായി നിർമ്മിച്ച "കനാൻ സീനിയർ ലിവിംഗ് ഹോം" (വയോജന സംരക്ഷണ വില്ലേജ്) ജൂലൈ 18-ന് സമർപ്പിക്കും.സ്നേഹത്തിന്റെയും കരുതലിന്റെയും ജീവകാരുണ്യ ദൗത്യത്തിന്റെയും പുതിയ അധ്യായത്തിന് തുടക്കമാകുന്ന ചടങ്ങുകൾ മോർ അന്തോണിയോസ് നഗർ കേന്ദ്രമാക്കി വിപുലമായ പരിപാടികളോടെയാണ് സംഘടിപ്പിച്ചിരിക്കുന്നത്. വയോജന സംരക്ഷണ രംഗത്ത് മാതൃകാപരമായ പദ്ധതിയായാണ് കനാൻ സീനിയർ ലിവിംഗ് ഹോം ഒരുങ്ങുന്നതെന്ന് സംഘാടകർ അറിയിച്ചു.ജൂലൈ 18 ശനിയാഴ്ച വൈകിട്ട് 3 മണിക്ക് തിരുവഞ്ചൂർ–ഏറ്റുമാനൂർ ബൈപ്പാസിൽ പുതുതായി നിർമ്മിച്ച മന്ദിരത്തിന്റെ കൂദാശയും, വൈകിട്ട് 4 മണിക്ക് തൂത്തൂട്ടി മോർ ഗ്രിഗോറിയൻ ധ്യാനകേന്ദ്രത്തിൽ ഉദ്ഘാടന സമ്മേളനവും വിവിധ ജീവകാരുണ്യ പദ്ധതികളുടെ ജൂബിലി ആഘോഷ ഉദ്ഘാടനവും നടക്കും.യാക്കോബായ സുറിയാനി സഭയുടെ ശ്രേഷ്ഠ കാതോലിക്ക ആബൂൻ മോർ ബസേലിയോസ് ജോസഫ് ബാവ മന്ദിരകൂദാശ നിർവഹിക്കും. കേരളത്തിന്റെ മുഖ്യമന്ത്രി ശ്രീ. വി.ഡി. സതീശൻ കനാൻ സീനിയർ ലിവിംഗ് ഹോമിന്റെ ഉദ്ഘാടനം നിർവഹിക്കും. കേരള നിയമസഭാ സ്പീക്കർ അഡ്വ. തിരുവഞ്ചൂർ രാധാകൃഷ്ണൻ മോർ അന്തോണിയോസ് ഇവാഞ്ചലിക്കൽ മിഷന്റെ നേതൃത്വത്തിൽ നടപ്പാക്കി വരുന്ന വിവിധ ജീവകാരുണ്യ പദ്ധതികളുടെ ജൂബിലി ആഘോഷങ്ങൾക്ക് ഉദ്ഘാടനം നിർവഹിക്കും.യോഗത്തിൽ കോട്ടയം എം.പി. ശ്രീ. ഫ്രാൻസിസ് ജോർജ് മുഖ്യപ്രഭാഷണം നടത്തും. ശ്രീ. ചാണ്ടി ഉമ്മൻ എം.എൽ.എ, അഭിവന്ദ്യ തോമസ് മോർ തീമോത്തിയോസ്, മാത്യൂസ് മോർ അഫ്രേം, മാത്യൂസ് മോർ തിമോത്തിയോസ് എന്നീ മെത്രാപ്പോലീത്തമാർ, മുൻമന്ത്രി വി.എൻ. വാസവൻ, റബർ ബോർഡ് ചെയർമാൻ എൻ. ഹരി, അയർക്കുന്നം ഗ്രാമപഞ്ചായത്ത് പ്രസിഡന്റ് ഗീത രാധാകൃഷ്ണൻ, പള്ളം ബ്ലോക്ക് പഞ്ചായത്ത് അംഗം കെ.സി. ഐപ്പ്, സംഘാടകസമിതി കൺവീനർ അനിയൻ മാത്യു, ബ്ലോക്ക് പഞ്ചായത്ത് പ്രസിഡന്റ് ലതാകുമാരി സലിമോൻ, അയർക്കുന്നം പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ ജിജി നാഗമറ്റം എന്നിവരടക്കം സഭാ-രാഷ്ട്രീയ-സാമൂഹിക രംഗങ്ങളിലെ പ്രമുഖർ ചടങ്ങിൽ പങ്കെടുക്കും.തൂത്തൂട്ടി മോർ ഗ്രിഗോറിയൻ ധ്യാനകേന്ദ്രം ഡയറക്ടറും മലങ്കര യാക്കോബായ സുറിയാനി ഓർത്തഡോക്സ് സഭയുടെ ഇടുക്കി ഭദ്രാസനാധിപനുമായ അഭിവന്ദ്യ സഖറിയാസ് മോർ പീലക്സിനോസ് മെത്രാപ്പോലീത്തയുടെ നേതൃത്വത്തിൽ വർഷങ്ങളായി നടപ്പാക്കി വരുന്ന ജീവകാരുണ്യ പ്രവർത്തനങ്ങളുടെ ഭാഗമായി രൂപംകൊണ്ട ഈ സംരംഭം, വയോജനങ്ങൾക്ക് സുരക്ഷിതവും മാന്യവുമായ താമസവും പരിചരണവും ആത്മീയാന്തരീക്ഷവും ഉറപ്പാക്കുന്ന സമഗ്ര പദ്ധതിയായിരിക്കും.വയോജന സംരക്ഷണത്തോടൊപ്പം സമൂഹത്തിന് തൊഴിൽസാധ്യതകളും സൃഷ്ടിക്കുന്ന പദ്ധതിയായാണ് കനാൻ സീനിയർ ലിവിംഗ് ഹോമിനെ വിലയിരുത്തുന്നത്. ഏകദേശം നൂറോളം പേർക്ക് നേരിട്ടും പരോക്ഷമായും തൊഴിലവസരം ലഭിക്കുമെന്നാണ് സംഘാടകസമിതി വ്യക്തമാക്കുന്നത്. കരുണയും സ്നേഹവും സാമൂഹിക ഉത്തരവാദിത്വവും കൈകോർക്കുന്ന ഈ സംരംഭം, യാക്കോബായ സുറിയാനി സഭയുടെ ജീവകാരുണ്യ ശുശ്രൂഷാ ചരിത്രത്തിലെ ശ്രദ്ധേയമായ നാഴികക്കല്ലാകുമെന്ന് സംഘാടകർ പ്രത്യാശ പ്രകടിപ്പിച്ചു. ചടങ്ങിൽ വിശ്വാസികളെയും പൊതുജനങ്ങളെയും പങ്കുചേരാൻ സ്നേഹപൂർവം ക്ഷണിച്ചിട്ടുണ്ട്.

Comments (0)

Related Stories