സിറിയൻ ബൈബിൾ സൊസൈറ്റി പ്രതിനിധി സംഘത്തെ സ്വീകരിച്ച് പരിശുദ്ധ പാത്രിയർക്കീസ് ബാവ; സുവിശേഷ ശുശ്രൂഷ ശക്തിപ്പെടുത്താൻ ആഹ്വാനം

ദമസ്കസ്: പരിശുദ്ധ അന്ത്യോഖ്യാ സിംഹാസനാധിപനും സുറിയാനി ഓർത്തഡോക്സ് സഭയുടെ പരമാധ്യക്ഷനുമായ പരിശുദ്ധ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവ, സിറിയൻ ബൈബിൾ സൊസൈറ്റി (Bible Society of Syria) ട്രസ്റ്റി ബോർഡ് ചെയർമാൻ അന്റോൻ റൂമിയയുടെ നേതൃത്വത്തിലുള്ള പ്രതിനിധി സംഘത്തെ ദമസ്കസിലെ ബാബ് തൂമയിലെ പാത്രിയർക്കൽ ആസ്ഥാനത്ത് സ്വീകരിച്ചു. കൂടിക്കാഴ്ചയിൽ പാത്രിയർക്കൽ സഹായി മോർ യോസഫ് ബാലി മെത്രാപ്പോലീത്തയും പാത്രിയർക്കൽ സെക്രട്ടറി മോർ ഔഗീൻ അൽ-ഖൂരി നെമത് മെത്രാപ്പോലീത്തയും സന്നിഹിതരായിരുന്നു. സിറിയൻ ബൈബിൾ സൊസൈറ്റി രാജ്യത്ത് നടത്തുന്ന ബൈബിൾ വിതരണ ശുശ്രൂഷകൾ, പ്രസാധന പ്രവർത്തനങ്ങൾ, ആത്മീയ സേവനങ്ങൾ, വിവിധ സഭകൾക്കായി നടപ്പിലാക്കുന്ന പദ്ധതികൾ എന്നിവയെക്കുറിച്ച് ട്രസ്റ്റി ബോർഡ് ചെയർമാൻ അന്റോൻ റൂമിയ പരിശുദ്ധ ബാവയെ വിശദമായി ധരിപ്പിച്ചു. ഭാവിയിൽ നടപ്പാക്കാനുദ്ദേശിക്കുന്ന പദ്ധതികളും ശുശ്രൂഷാ വികസന പ്രവർത്തനങ്ങളും അദ്ദേഹം അവതരിപ്പിച്ചു. കൂടിക്കാഴ്ചയിൽ സിറിയയിലെ എല്ലാ ക്രൈസ്തവ സഭകളെയും ഒരുപോലെ സേവിക്കുന്ന ബൈബിൾ സൊസൈറ്റിയുടെ പ്രവർത്തനങ്ങളെ പരിശുദ്ധ പാത്രിയർക്കീസ് ബാവ അഭിനന്ദിച്ചു. ദൈവവചനത്തിന്റെ പ്രഘോഷണത്തിലും സുവിശേഷ സന്ദേശം ജനങ്ങളിലെത്തിക്കുന്നതിലും ബൈബിൾ സൊസൈറ്റി നിർവഹിക്കുന്ന സേവനം സഭയ്ക്കും സമൂഹത്തിനും വിലമതിക്കാനാവാത്തതാണെന്ന് അദ്ദേഹം ചൂണ്ടിക്കാട്ടി. സിറിയയിലെ എല്ലാ സഭകൾക്കും കൂടുതൽ ഫലപ്രദമായ രീതിയിൽ ശുശ്രൂഷകൾ ലഭ്യമാക്കുന്നതിനായി പ്രവർത്തനങ്ങൾ വിപുലീകരിക്കണമെന്നും, സേവനമേഖലകൾ കൂടുതൽ ശക്തിപ്പെടുത്തണമെന്നും പരിശുദ്ധ ബാവ അനുഗ്രഹവും നിർദേശങ്ങളും നൽകി. രാജ്യത്തിന്റെ ആത്മീയ നവോത്ഥാനത്തിനും സഭകളുടെ ഐക്യത്തിനും ബൈബിൾ സൊസൈറ്റിയുടെ പ്രവർത്തനങ്ങൾ കൂടുതൽ കരുത്തേകട്ടെയെന്നും അദ്ദേഹം ആശംസിച്ചു. സുവിശേഷ പ്രഘോഷണത്തിനും ദൈവവചന പ്രചാരണത്തിനുമായി ആത്മാർത്ഥതയോടെ പ്രവർത്തിക്കുന്ന ബൈബിൾ സൊസൈറ്റിയുടെ ശുശ്രൂഷകൾ സിറിയയിലെ സഭാജീവിതത്തിന് കൂടുതൽ അനുഗ്രഹകരമാകട്ടെയെന്ന പ്രാർത്ഥനയോടെയാണ് കൂടിക്കാഴ്ച സമാപിച്ചത്.

Comments (0)

Related Stories