സിറിയയിലെ സുരക്ഷാ സാഹചര്യങ്ങൾ ചർച്ച ചെയ്ത് പരിശുദ്ധ പാത്രിയർക്കീസ് ബാവ; ആഭ്യന്തര മന്ത്രാലയ പ്രതിനിധികളുമായി കൂടിക്കാഴ്ച

ദമസ്കസ്: പരിശുദ്ധ അന്ത്യോഖ്യാ സിംഹാസനാധിപനും സുറിയാനി ഓർത്തഡോക്സ് സഭയുടെ പരമാധ്യക്ഷനുമായ പരിശുദ്ധ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവ, സിറിയൻ ആഭ്യന്തര മന്ത്രാലയത്തിലെ സുരക്ഷാ കാര്യങ്ങളുടെ സഹമന്ത്രിയായ മേജർ ജനറൽ അബ്ദുൽ ഖാദർ തഹ്ഹാൻ നെയും, രാഷ്ട്രീയകാര്യങ്ങളുടെ ജനറൽ സെക്രട്ടേറിയറ്റിലെ സഭാ ബന്ധ വിഭാഗം ഡയറക്ടർ അഹ്മദ് ഹുസൈനാത്ത് നെയും ദമസ്കസിലെ ബാബ് തൂമയിലെ പാത്രിയർക്കൽ ആസ്ഥാനത്ത് സ്വീകരിച്ചു. കൂടിക്കാഴ്ചയിൽ പാത്രിയർക്കൽ സഹായി മോർ യോസഫ് ബാലി മെത്രാപ്പോലീത്തയും പാത്രിയർക്കൽ സെക്രട്ടറി മോർ ഔഗീൻ അൽ-ഖൂരി നെമത് മെത്രാപ്പോലീത്തയും പങ്കെടുത്തു. സിറിയയിലെ നിലവിലെ സാമൂഹിക-സുരക്ഷാ സാഹചര്യങ്ങളാണ് കൂടിക്കാഴ്ചയിലെ പ്രധാന ചർച്ചാവിഷയമായത്. രാജ്യത്ത് സ്ഥിരതയും സുരക്ഷയും പൂർണമായി പുനഃസ്ഥാപിക്കപ്പെടേണ്ടതിന്റെ ആവശ്യകത പരിശുദ്ധ ബാവ ചൂണ്ടിക്കാട്ടി. സമാധാന അന്തരീക്ഷം ശക്തിപ്പെടുന്നതിലൂടെ പുനർനിർമാണ പ്രവർത്തനങ്ങൾ വേഗത്തിലാകുകയും രാജ്യത്തിന്റെ സാമ്പത്തികവും സാമൂഹികവുമായ പുരോഗതിക്ക് പുതിയ വഴിത്തിരിവ് സൃഷ്ടിക്കപ്പെടുകയും ചെയ്യുമെന്ന പ്രത്യാശയും അദ്ദേഹം പ്രകടിപ്പിച്ചു. യുദ്ധവും പ്രതിസന്ധികളും മൂലം ദീർഘകാലമായി ദുരിതമനുഭവിക്കുന്ന സിറിയൻ ജനതയ്ക്ക് സുരക്ഷിതവും സമാധാനപൂർണവുമായ ഭാവി ഒരുക്കുന്നതിനായി ഭരണകൂടവും വിവിധ സാമൂഹിക-മത വിഭാഗങ്ങളും ഒരുമിച്ച് പ്രവർത്തിക്കേണ്ടതിന്റെ പ്രാധാന്യവും കൂടിക്കാഴ്ചയിൽ വിലയിരുത്തപ്പെട്ടു. രാജ്യത്തിന്റെ ഐക്യവും പൗരന്മാരുടെ ക്ഷേമവും മുൻനിർത്തിയുള്ള ഇത്തരം കൂടിക്കാഴ്ചകൾ സിറിയയിൽ സ്ഥിരതയും പുനരുജ്ജീവനവും കൈവരിക്കുന്നതിനുള്ള ശ്രമങ്ങൾക്ക് കൂടുതൽ കരുത്തേകുമെന്ന് സഭാ വൃത്തങ്ങൾ വിലയിരുത്തി.

Comments (0)

Related Stories