സഭാ മാനേജിംഗ് കമ്മിറ്റിയിലേക്ക് ഷെവ. മനോജ് മാത്യുവിനെ നോമിനേറ്റ് ചെയ്തു

ചെങ്ങളം (കോട്ടയം) ● മലങ്കര യാക്കോബായ സുറിയാനി ഓർത്തഡോക്സ് സഭയുടെ കോട്ടയം ഭദ്രാസനത്തിലെ ചെങ്ങളം സെന്റ് തോമസ് യാക്കോബായ സുറിയാനി പള്ളി ഇടവകാംഗവും സഭയുടെ വിവിധ ആത്മീയ-സംഘടനാ പ്രവർത്തനങ്ങളിൽ സജീവ സാന്നിധ്യവുമായ ഷെവ. മനോജ് മാത്യു (ആര്യാടൻപാക്കൽ) നെ സഭയുടെ മാനേജിംഗ് കമ്മിറ്റിയിലേക്ക് നോമിനേറ്റ് ചെയ്തു.കോട്ടയം ഭദ്രാസനാധിപൻ അഭിവന്ദ്യ ഡോ. തോമസ് മോർ തീമോത്തിയോസ് മെത്രാപ്പോലീത്തയുടെ ശുപാർശയെ തുടർന്ന്, മലങ്കര മെത്രാപ്പോലീത്തയും ശ്രേഷ്ഠ കാതോലിക്കായുമായ ആബൂൻ മോർ ബസേലിയോസ് ജോസഫ് ബാവയാണ് നോമിനേഷൻ ചെയ്തത്.മൂന്നു പതിറ്റാണ്ടിലേറെയായി സഭയുടെ ഔദ്യോഗിക പ്രസിദ്ധീകരണമായ 'വിശ്വാസ സംരക്ഷകൻ' ഉൾപ്പെടെയുള്ള സഭാ പ്രസിദ്ധീകരണങ്ങളിലും, സാമൂഹികമാധ്യമ പ്ലാറ്റ്ഫോമുകളിലും സഭാചരിത്രം, സഭാപിതാക്കന്മാരുടെ ജീവിതം, വിശ്വാസപഠനം, ആത്മീയ വിഷയങ്ങൾ എന്നിവയെ ആസ്പദമാക്കി നിരവധി ലേഖനങ്ങൾ രചിച്ചുവരുന്ന വ്യക്തിയാണ് ഷെവ. മനോജ് മാത്യു.രചനാരംഗത്തിന് പുറമെ, സഭാതലം, ഭദ്രാസനതലം, ഇടവകതലം എന്നിവിടങ്ങളിൽ വിവിധ ഉത്തരവാദിത്വങ്ങൾ ദീർഘകാലമായി നിർവഹിച്ചുവരികയും സഭയുടെ ആത്മീയ, മാധ്യമ, സംഘടനാ പ്രവർത്തനങ്ങൾക്ക് വിലപ്പെട്ട സംഭാവനകൾ നൽകുകയും ചെയ്തിട്ടുണ്ട്.സഭയോടുള്ള സമർപ്പിത സേവനവും വിശ്വാസപാരമ്പര്യ സംരക്ഷണത്തിനായുള്ള ദീർഘകാല പ്രവർത്തനങ്ങളും പരിഗണിച്ചാണ് അദ്ദേഹത്തെ സഭയുടെ ഭരണസമിതിയായ മാനേജിംഗ് കമ്മിറ്റിയിലേക്ക് നോമിനേറ്റ് ചെയ്തതെന്ന് സഭാ വൃത്തങ്ങൾ അറിയിച്ചു. പുതിയ ഉത്തരവാദിത്വത്തിലും സഭയുടെ വളർച്ചയ്ക്കും വിശ്വാസിസമൂഹത്തിന്റെ പുരോഗതിക്കുമായി അദ്ദേഹം ഫലപ്രദമായ സേവനം കാഴ്ചവയ്ക്കനാകട്ടെയെന്ന് ജാക്കോബൈറ്റ് ഓൺലൈൻ ടീം ആശംസിക്കുന്നു.

Comments (0)

Related Stories