യൂറോപ്പ് ഭദ്രാസന വൈദീക ധ്യാനവും സമ്മേളനവും സമാപിച്ചു; ആത്മീയ നവീകരണത്തിനും സഭാദൗത്യ ശക്തിപ്പെടുത്തലിനും മാർഗരേഖയായി

ബ്രസ്സൽസ് (ബെൽജിയം) ● മലങ്കര യാക്കോബായ സുറിയാനി ഓർത്തഡോക്സ് സഭയുടെ യൂറോപ്പ് ഭദ്രാസനത്തിന്റെ വാർഷിക വൈദീക ധ്യാനവും വൈദീക സമ്മേളനവും ജൂൺ 24 മുതൽ 27 വരെ ബെൽജിയത്തിൽ ഭദ്രാസനാധിപനും യൂറോപ്പ് പാത്രിയർക്കൽ വികാരിയുമായ അഭിവന്ദ്യ ഡോ. മോർ തെയോഫിലോസ് കുര്യാക്കോസ് മെത്രാപ്പോലീത്തയുടെ അധ്യക്ഷതയിൽ നടന്നു. യൂറോപ്പിലെ സഭാശുശ്രൂഷകൾ കൂടുതൽ ശക്തിപ്പെടുത്തുന്നതിനും വൈദികർക്കിടയിലെ ആത്മീയ ഐക്യം വളർത്തുന്നതിനും ലക്ഷ്യമിട്ടായിരുന്നു സമ്മേളനം. പ്രാർത്ഥനയും ധ്യാനവും ദൈവശാസ്ത്ര ക്ലാസുകളും ചർച്ചകളും വിശുദ്ധ സ്ഥല സന്ദർശനങ്ങളും ഉൾപ്പെട്ട സമ്മേളനം, യൂറോപ്പിലെ വിവിധ രാജ്യങ്ങളിൽ ശുശ്രൂഷ ചെയ്യുന്ന വൈദികർക്ക് ആത്മീയ നവീകരണത്തിന്റെയും അനുഭവങ്ങൾ പങ്കുവയ്ക്കുന്നതിന്റെയും അവസരമായി. ഒറ്റപ്പെട്ട സാഹചര്യങ്ങളിലും വ്യത്യസ്ത സാംസ്കാരിക പശ്ചാത്തലങ്ങളിലുമായി ശുശ്രൂഷ ചെയ്യുന്ന വൈദികർ നേരിടുന്ന വെല്ലുവിളികളും സഭയുടെ ഭാവി ദൗത്യങ്ങളും വിശദമായി വിലയിരുത്തി. ഓരോ വൈദികന്റെയും വ്യക്തിത്വത്തെയും പൗരോഹിത്യ ശുശ്രൂഷയെയും ആദരിച്ചുകൊണ്ട് എല്ലാവർക്കും അഭിപ്രായങ്ങൾ തുറന്നു പങ്കുവയ്ക്കാനുള്ള അവസരം ഒരുക്കിയ മോർ തെയോഫിലോസ് കുര്യാക്കോസ് മെത്രാപ്പോലീത്തയുടെ പിതൃസ്നേഹപൂർണമായ നേതൃത്വമാണ് സമ്മേളനത്തിന്റെ പ്രധാന സവിശേഷതയായത്. യൂറോപ്പിലെ മലങ്കര സുറിയാനി ഓർത്തഡോക്സ് സഭയുടെ വളർച്ച, മിഷൻ പ്രവർത്തനങ്ങളുടെ വ്യാപനം, വിവിധ രാജ്യങ്ങളിലേക്ക് കുടിയേറുന്ന വിശ്വാസികൾക്ക് ആരാധനാ സൗകര്യവും ക്രമമായ ഇടയത്വ ശുശ്രൂഷയും ഉറപ്പാക്കുന്നതിനുള്ള പദ്ധതികൾ എന്നിവ വിശദമായി ചർച്ച ചെയ്തു. സഭയുടെ വിശ്വാസപാരമ്പര്യവും ആരാധനക്രമവും സുറിയാനി ആത്മീയ പൈതൃകവും പുതിയ തലമുറയിലേക്ക് കൈമാറുന്നതിനുള്ള പ്രവർത്തനങ്ങൾ കൂടുതൽ ശക്തിപ്പെടുത്തേണ്ടതിന്റെ ആവശ്യകതയും സമ്മേളനം വിലയിരുത്തി. യൂറോപ്പിലെ മാറിവരുന്ന സാമൂഹിക സാഹചര്യങ്ങളിൽ സഭയുടെ സാന്നിധ്യം കൂടുതൽ ശക്തമാക്കുന്നതിനും മിഷൻ പ്രവർത്തനങ്ങൾ വ്യാപിപ്പിക്കുന്നതിനുമുള്ള വിവിധ നിർദേശങ്ങളും രൂപീകരിച്ചു. സമ്മേളനത്തിന്റെ ഭാഗമായി ബെൽജിയത്തിലെ മലങ്കര സുറിയാനി ഓർത്തഡോക്സ് കോൺഗ്രിഗേഷനിൽ അഭിവന്ദ്യ മെത്രാപ്പോലീത്തയുടെ മുഖ്യകാർമികത്വത്തിൽ വിശുദ്ധ കുർബാന അർപ്പിച്ചു. യൂറോപ്പ് ഭദ്രാസനത്തിലെ എല്ലാ വൈദികരും സഹകാർമികരായ ഈ ശുശ്രൂഷ ബെൽജിയത്തിലെ വിശ്വാസിസമൂഹത്തിന് ആത്മീയ അനുഗ്രഹത്തിന്റെ അനുഭവമായി. ഈ അവസരത്തിൽ ബെൽജിയം കോൺഗ്രിഗേഷന് "സെന്റ് ഗ്രിഗോറിയോസ് മലങ്കര സുറിയാനി ഓർത്തഡോക്സ് ചർച്ച്" എന്ന നാമകരണം അഭിവന്ദ്യ മെത്രാപ്പോലീത്ത നിർവഹിച്ചു. സമ്മേളനത്തിൽ ഭദ്രാസന സെക്രട്ടറി വന്ദ്യ ജോഷ്വാ റമ്പാൻ, റവ. ഡോ. തോമസ് ജേക്കബ് മണിമല, റവ. ഫാ. എൽദോസ് വട്ടപ്പറമ്പിൽ, റവ. ഫാ. ഏലിയാസ് വർഗീസ്, റവ. ഫാ. പോൾ പി. ജോർജ്, റവ. ഫാ. എൽദോസ് ജോർജ്, റവ. ഫാ. റെഞ്ചു എബ്രഹാം, റവ. ഫാ. അനീഷ് വേലാംകുഴിയിൽ, റവ. ഫാ. ജിജോ എ. ജോൺ, ശെമ്മാശൻ ജുവൽ രാജു എന്നിവർ പങ്കെടുത്തു. വൈദികർക്കിടയിലെ സഹോദര്യവും ആത്മീയ കൂട്ടായ്മയും കൂടുതൽ ദൃഢമാക്കുകയും, യൂറോപ്പ് ഭദ്രാസനത്തിന്റെ ഭാവി ശുശ്രൂഷകൾക്ക് പുതിയ ദിശാബോധം നൽകുകയും ചെയ്ത സമ്മേളനം, സഭയുടെ ദൗത്യനിർവഹണത്തിൽ പുതുവൈഭവം പകരുന്ന ആത്മീയ സംഗമമായി മാറിയതായി പങ്കെടുത്തവർ അഭിപ്രായപ്പെട്ടു.

Comments (0)

Related Stories