താപസശ്രേഷ്ഠൻ ഫിനഹാസ് റമ്പാന്റെ നാലാം ശ്രാദ്ധപ്പെരുന്നാൾ മലേക്കുരിശ് ദയറായിൽ ഭക്തിനിർഭരമായി ആചരിച്ചു

മലേക്കുരിശ് ● പരിശുദ്ധ അന്ത്യോഖ്യാ സിംഹാസനത്തിന്റെ മലേക്കുരിശ് ദയറായിൽ വിശ്രമിക്കുന്ന പരിശുദ്ധ സുറിയാനി സഭയുടെ താപസശ്രേഷ്ഠനായ ഭാഗ്യസ്മരണാർഹ വന്ദ്യ ഫിനഹാസ് റമ്പാന്റെ നാലാം ശ്രാദ്ധപ്പെരുന്നാൾ ജൂലൈ 4, 5 തീയതികളിലായി ഭക്തിനിർഭരമായ ശുശ്രൂഷകളോടെ ആചരിച്ചു. ശ്രാദ്ധപ്പെരുന്നാളിനോടനുബന്ധിച്ച് നടന്ന വിശുദ്ധ കുർബാനയ്ക്ക് മലങ്കര യാക്കോബായ സുറിയാനി ഓർത്തഡോക്സ് സഭയുടെ ഇടുക്കി ഭദ്രാസനാധിപൻ അഭിവന്ദ്യ മോർ പീലക്സീനോസ് സഖറിയാസ് മെത്രാപ്പോലീത്ത മുഖ്യകാർമികത്വം വഹിച്ചു. സന്യാസജീവിതത്തിന്റെ വിശുദ്ധിയും പ്രാർത്ഥനയുടെ ശക്തിയും അനുസ്മരിച്ചുകൊണ്ടായിരുന്നു ശുശ്രൂഷകൾ നടന്നത്. ശുശ്രൂഷകളിൽ മലേക്കുരിശ് ദയറാധിപൻ അഭിവന്ദ്യ മോർ ദിയസ്കോറോസ് കുര്യാക്കോസ് മെത്രാപ്പോലീത്ത, ജറുസലേം–മിദ്യാൻ ഭദ്രാസനാധിപൻ അഭിവന്ദ്യ മോർ തിമോത്തിയോസ് മാത്യൂസ് മെത്രാപ്പോലീത്ത, വൈദികർ, സന്യാസിമാർ, വിവിധ ഭദ്രാസനങ്ങളിൽ നിന്നെത്തിയ വിശ്വാസികൾ എന്നിവർ പങ്കുചേർന്നു. ദയറായിലെ കബറിടത്തിൽ പ്രത്യേക പ്രാർത്ഥനകളും ധുപപ്രാർത്ഥനയും നടന്നു. പ്രാർത്ഥനയും ഉപവാസവും ത്യാഗപൂർണമായ സന്യാസജീവിതവുംകൊണ്ട് അനേകർക്ക് ആത്മീയ മാതൃകയായിരുന്ന ഫിനഹാസ് റമ്പാന്റെ വിശുദ്ധ ജീവിതം അനുസ്മരിച്ചുകൊണ്ട് അദ്ദേഹത്തിന്റെ ആത്മീയ പാരമ്പര്യം പിന്തുടരാൻ വിശ്വാസികൾക്ക് ആഹ്വാനം നൽകി. മലേക്കുരിശ് ദയറായെ തന്റെ ജീവിതസാക്ഷ്യത്താലും വിശുദ്ധമായ താപസജീവിതത്താലും അനുഗ്രഹീതമാക്കിയ വന്ദ്യ ഫിനഹാസ് റമ്പാന്റെ ധന്യസ്മരണയിൽ നൂറുകണക്കിന് വിശ്വാസികൾ പങ്കെടുത്ത ശ്രാദ്ധപ്പെരുന്നാൾ ആത്മീയ ഭക്തിനിർഭരമായ അന്തരീക്ഷത്തിലാണ് സമാപിച്ചത്.

Comments (0)

Related Stories