സുറിയാനി വേൾഡ് സ്കൗട്ട് ക്യാമ്പിന് സ്ഥിരം ആസ്ഥാനം; നിർമാണ പുരോഗതി വിലയിരുത്തി പരിശുദ്ധ പാത്രിയർക്കീസ് ബാവയുടെ സന്ദർശനം

ദമാസ്കസ് ● ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അഫ്രേം ദ്വിതീയൻ പാത്രിയർക്കീസ് ബാവ സുറിയാനി വേൾഡ് സ്കൗട്ടിന്റെ സ്ഥിരം ക്യാമ്പ് ആസ്ഥാനമായി വികസിപ്പിക്കുന്ന വാദി അൽ-നസാറയ്ക്കു സമീപമുള്ള അൽ-കൈമ ഗ്രാമത്തിലെ പദ്ധതിപ്രദേശം സന്ദർശിച്ച് നിർമാണ പ്രവർത്തനങ്ങളുടെ പുരോഗതി വിലയിരുത്തി. സ്വീഡൻ, സ്കാൻഡിനേവിയൻ രാജ്യങ്ങളുടെ അതിഭദ്രാസനാധിപൻ അഭിവന്ദ്യ മോർ യോഹന്നാൻ ലഹ്ദോ മെത്രാപ്പോലീത്ത പരിശുദ്ധ ബാവയെ അനുഗമിച്ചു. യുവജനങ്ങളുടെയും സ്കൗട്ട് പ്രസ്ഥാനത്തിന്റെയും ആത്മീയ, സഭാപര, സാമൂഹിക വളർച്ച ലക്ഷ്യമിട്ട് നടപ്പാക്കുന്ന ഈ പദ്ധതി സുറിയാനി ഓർത്തഡോക്സ് സഭയുടെ ആഗോള യുവജന ശുശ്രൂഷയിലെ സുപ്രധാന സംരംഭങ്ങളിലൊന്നായാണ് വിലയിരുത്തപ്പെടുന്നത്. സന്ദർശനത്തിനിടെ സുറിയാനി വേൾഡ് സ്കൗട്ടിന്റെ ചെയർമാൻ സഫീർ സലീം പാത്രിയർക്കീസ് ബാവയെയും സംഘത്തെയും സ്വീകരിച്ചു. സ്ഥിരം വേൾഡ് സ്കൗട്ട് ക്യാമ്പ് സ്ഥാപിക്കുന്നതിനായി സ്വന്തം ഉടമസ്ഥതയിലുള്ള വിശാലമായ ഭൂമി ഉദാരമായി പാത്രിയർക്കേറ്റിന് സമർപ്പിച്ച സഫീർ സലീമിന്റെ സേവനത്തെ പരിശുദ്ധ ബാവ അഭിനന്ദിച്ചു. ഈ ഭൂമിയിലാണ് ആഗോള സുറിയാനി സ്കൗട്ട് പ്രസ്ഥാനത്തിന്റെ സ്ഥിരം ക്യാമ്പ് കേന്ദ്രം നിർമ്മിക്കുന്നത്. സന്ദർശനത്തിൽ യുവജന-ക്രൈസ്തവ വിദ്യാഭ്യാസ കാര്യങ്ങളുടെ പാത്രിയർക്കൽ വികാരിയും സുറിയാനി വേൾഡ് സ്കൗട്ടിന്റെ ആത്മീയ ഉപദേഷ്ടാവുമായ അഭിവന്ദ്യ മോർ ആൻഡ്രൂസ് ബഹേ മെത്രാപ്പോലീത്തയും പങ്കെടുത്തു. പദ്ധതിയുടെ വിവിധ ഘട്ടങ്ങൾ, ഭാവി വികസന സാധ്യതകൾ, ലോകമെമ്പാടുമുള്ള സുറിയാനി സ്കൗട്ട് അംഗങ്ങൾക്ക് പ്രയോജനപ്പെടുന്ന രീതിയിൽ ക്യാമ്പ് കേന്ദ്രം വികസിപ്പിക്കുന്നതിനുള്ള പദ്ധതികൾ എന്നിവ സംബന്ധിച്ച് ചർച്ച നടത്തി. യുവജനങ്ങളുടെ ആത്മീയ രൂപീകരണത്തിനും നേതൃത്വ പരിശീലനത്തിനും സഭാബോധം ശക്തിപ്പെടുത്തുന്നതിനും ഈ പദ്ധതി വലിയ സംഭാവന നൽകുമെന്ന് പങ്കെടുത്തവർ അഭിപ്രായപ്പെട്ടു. യുവതലമുറയെ സഭയുടെ ദൗത്യത്തിലേക്ക് കൂടുതൽ സജീവമായി കൈപിടിച്ചുയർത്താനുള്ള പരിശുദ്ധ പാത്രിയർക്കീസ് ബാവയുടെ ദീർഘവീക്ഷണത്തിന്റെയും സഭാംഗങ്ങളുടെ സഹകരണ മനോഭാവത്തിന്റെയും പ്രതിഫലനമാണ് ഈ സംരംഭമെന്നും അവർ ചൂണ്ടിക്കാട്ടി.

Comments (0)

Related Stories