കുവൈറ്റ് സെന്റ് ജോർജ് വലിയപള്ളിയിൽ വികാരിക്ക് യാത്രയയപ്പ്; ഫാ. ബിബിൻ ജോർജിന് സ്നേഹോഷ്മള സ്വീകരണം

കുവൈറ്റ് ● മലങ്കര യാക്കോബായ സുറിയാനി ഓർത്തഡോക്സ് സഭയുടെ കുവൈറ്റ് സെന്റ് ജോർജ് യാക്കോബായ സുറിയാനി വലിയപള്ളിയിൽ, കഴിഞ്ഞ മൂന്ന് വർഷക്കാലമായി ഇടവക വികാരിയായി ആത്മീയ നേതൃത്വം നൽകിയ റവ. ഫാ. സ്റ്റീഫൻ നെടുവക്കാട്ടിന് ഹൃദ്യമായ യാത്രയയപ്പും, പുതുതായി നിയമിതനായ റവ. ഫാ. ബിബിൻ ജോർജിന് സ്നേഹോഷ്മളമായ സ്വീകരണവും നൽകി. ഇടവക മാനേജിങ് കമ്മിറ്റിയുടെ നേതൃത്വത്തിൽ നടന്ന ചടങ്ങിൽ വൈദികരും ട്രസ്റ്റിമാരും കമ്മിറ്റി അംഗങ്ങളും വിവിധ ആത്മീയ സംഘടനകളുടെ ഭാരവാഹികളും വിശ്വാസികളും പങ്കെടുത്തു. കഴിഞ്ഞ മൂന്ന് വർഷക്കാലം ഇടവകയുടെ ആത്മീയ വളർച്ചയ്ക്കും ആരാധനാ ജീവിതത്തിന്റെ ശക്തിപ്പെടുത്തലിനും ഇടവക പ്രവർത്തനങ്ങളുടെ പുരോഗതിക്കും ഫാ. സ്റ്റീഫൻ നെടുവക്കാട് നൽകിയ സമർപ്പിതമായ നേതൃത്വം ചടങ്ങിൽ അനുസ്മരിച്ചു. യാത്രയയപ്പ് സമ്മേളനത്തിൽ ഇടവകയുടെ സ്നേഹോപഹാരവും ആദരവും ഫാ. സ്റ്റീഫൻ നെടുവക്കാട്ടിന് സമർപ്പിച്ചു. അദ്ദേഹത്തിന്റെ പുതിയ ശുശ്രൂഷാജീവിതത്തിന് ദൈവാനുഗ്രഹം നേരുകയും സഭയ്ക്കുവേണ്ടിയുള്ള സേവനങ്ങൾ കൂടുതൽ ഫലദായകമാകട്ടെയെന്ന് വിശ്വാസികൾ പ്രാർത്ഥിക്കുകയും ചെയ്തു. തുടർന്ന്, ഇടവകയുടെ പുതിയ വികാരിയായി ചുമതലയേൽക്കുന്ന റവ. ഫാ. ബിബിൻ ജോർജിനെ പള്ളി മാനേജിങ് കമ്മിറ്റിയുടെയും ഇടവകാംഗങ്ങളുടെയും നേതൃത്വത്തിൽ ഔദ്യോഗികമായി സ്വാഗതം ചെയ്തു. പുതിയ ഇടയന്റെ നേതൃത്വത്തിൽ ഇടവകയുടെ ആത്മീയ പ്രവർത്തനങ്ങൾ കൂടുതൽ ശക്തിപ്പെടുമെന്ന പ്രത്യാശ ചടങ്ങിൽ പങ്കെടുത്തവർ പങ്കുവച്ചു. പുതിയ ശുശ്രൂഷാദൗത്യത്തിനായി ഫാ. ബിബിൻ ജോർജിന് എല്ലാ പിന്തുണയും പ്രാർത്ഥനയും വാഗ്ദാനം ചെയ്ത വിശ്വാസിസമൂഹം, ദൈവം അദ്ദേഹത്തിന് സമൃദ്ധമായ കൃപയും ജ്ഞാനവും നൽകി ഇടവകയെ വിശ്വാസത്തിലും ആത്മീയതയിലും മുന്നോട്ട് നയിക്കട്ടെയെന്നും ആശംസിച്ചു.

Comments (0)

Related Stories