മണർകാട് കത്തീഡ്രൽ സഹവികാരി കുര്യാക്കോസ് കാലായിൽ അച്ചന് കോർ എപ്പിസ്കോപ്പ പദവി; ജൂലൈ 10-ന് സ്ഥാനാരോഹണ ശുശ്രൂഷ

മണർകാട് ● മലങ്കര യാക്കോബായ സുറിയാനി ഓർത്തഡോക്സ് സഭയുടെ ആഗോള മരിയൻ തീർത്ഥാടന കേന്ദ്രമായ മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രലിലെ സഹവികാരിയായ വന്ദ്യ കുര്യാക്കോസ് കാലായിൽ കശ്ശീശ, കോർ എപ്പിസ്കോപ്പ പദവിയിലേക്ക് ഉയർത്തപ്പെടുന്നു. 2026 ജൂലൈ 10, വെള്ളിയാഴ്ച, പരിശുദ്ധ അന്ത്യോഖ്യാ സിംഹാസനാധിപനും ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷനുമായ പരിശുദ്ധ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവായുടെ അനുഗ്രഹകൽപ്പനയാൽ, കോട്ടയം ഭദ്രാസനാധിപനും ഇടവക മെത്രാപ്പോലീത്തയുമായ അഭിവന്ദ്യ ഡോ. തോമസ് മോർ തീമോത്തിയോസ് മെത്രാപ്പോലീത്തയുടെ തൃക്കരങ്ങളാൽ മണർകാട് കത്തീഡ്രലിൽ നടക്കുന്ന വിശുദ്ധ ശുശ്രൂഷകളിലാണ് ഫാ. കുര്യാക്കോസ് കാലായിലിനെ കോർ എപ്പിസ്കോപ്പ പദവിയിലേക്ക് ഉയർത്തുന്നത്. മണർകാട് കത്തീഡ്രലിന്റെ ആത്മീയ ശുശ്രൂഷകളിലും ഇടവകയുടെ വിവിധ പ്രവർത്തനങ്ങളിലും ശ്രദ്ധേയമായ സേവനം അനുഷ്ഠിച്ചുവരുന്ന ഫാ. കുര്യാക്കോസ് കാലായിലിന് ലഭിക്കുന്ന ഈ ബഹുമതി, അദ്ദേഹത്തിന്റെ സമർപ്പിതമായ പൗരോഹിത്യ ശുശ്രൂഷയ്ക്കുള്ള സഭയുടെ അംഗീകാരമായാണ് വിലയിരുത്തപ്പെടുന്നത്. സ്ഥാനാരോഹണ ശുശ്രൂഷയിൽ സഭയിലെ മെത്രാപ്പോലീത്തമാർ, വൈദികർ, സന്യാസിമാർ, വിവിധ ഇടവകകളിൽ നിന്നുള്ള വിശ്വാസികൾ എന്നിവർ പങ്കെടുക്കും. വിശുദ്ധ ശുശ്രൂഷകൾക്ക് ശേഷം നവനിയുക്ത കോർ എപ്പിസ്കോപ്പിന് അനുമോദനങ്ങളും ആശംസകളും അർപ്പിക്കുന്ന ചടങ്ങുകളും നടക്കും.പരിശുദ്ധ അന്ത്യോഖ്യാ സിംഹാസനത്തോടുള്ള അചഞ്ചലമായ കൂറിലും വിശുദ്ധ സഭയോടുള്ള സമർപ്പണത്തിലും അദ്ദേഹം തുടർന്നും ഫലപ്രദമായ ആത്മീയ ശുശ്രൂഷ നിർവഹിക്കാൻ സർവ്വശക്തനായ ദൈവം സമൃദ്ധമായ കൃപയും ആരോഗ്യവും ദീർഘായുസ്സും നൽകട്ടെയെന്ന് പ്രാർത്ഥിക്കുന്നു. കോർ എപ്പിസ്കോപ്പ എന്ന പുതിയ ശുശ്രൂഷാപദവിയിലൂടെ സഭയ്ക്കും വിശ്വാസിസമൂഹത്തിനും കൂടുതൽ അനുഗ്രഹമായി തീരുവാൻ കർത്താവ് അദ്ദേഹത്തെ വഴിനടത്തട്ടെയെന്ന് ജേക്കബൈറ്റ് ഓൺലൈൻ കുടുംബം ആശംസിക്കുന്നു.

Comments (0)

Related Stories