മെത്രാഭിഷേകം നടന്ന അതേ മദ്ബഹായിൽ വിശുദ്ധ കുർബാന; മഹാപൗരോഹിത്യത്തിന്റെ ഇരുപതാം വാർഷികം ആചരിച്ച് മോർ യൗസേബിയോസ് കുര്യാക്കോസ് മെത്രാപ്പോലീത്ത

വടക്കൻ പറവൂർ (കൊച്ചി) ● മലങ്കര യാക്കോബായ സുറിയാനി ഓർത്തഡോക്സ് സഭയുടെ ഡൽഹി-യു.എ.ഇ. ഭദ്രാസനങ്ങളുടെ അധിപനും ബോംബെ ഭദ്രാസന സഹായ മെത്രാപ്പോലീത്തയുമായ അഭിവന്ദ്യ മോർ യൗസേബിയോസ് കുര്യാക്കോസ് മെത്രാപ്പോലീത്തയുടെ മഹാപൗരോഹിത്യത്തിന്റെ ഇരുപതാം വാർഷികം വടക്കൻ പറവൂർ സെന്റ് തോമസ് യാക്കോബായ സുറിയാനി പള്ളിയിൽ ഭക്തിപൂർവം ആചരിച്ചു. 2006 ജൂലൈ 3-ന് മെത്രാപ്പോലീത്തയായി അഭിഷിക്തനായ അതേ വിശുദ്ധ മദ്ബഹായിൽ, ഇരുപത് വർഷങ്ങൾ പൂർത്തിയായ വേളയിൽ വിശുദ്ധ കുർബാന അർപ്പിക്കാനായത് തന്റെ ശുശ്രൂഷാജീവിതത്തിലെ ദൈവാനുഗ്രഹമായ അനുഭവമാണെന്ന് തിരുമേനി സന്ദേശത്തിൽ പറഞ്ഞു. ജീവിതയാത്രയിലെ ഓരോ ചുവടിലും ദൈവം നൽകിയ കൃപകൾക്ക് നന്ദി അർപ്പിച്ചുകൊണ്ടാണ് വാർഷിക ദിനാചരണം നടന്നത്. വിശുദ്ധ കുർബാനയ്ക്കുശേഷം ഇടവകയുടെ ആഭിമുഖ്യത്തിൽ അനുമോദന സമ്മേളനവും സംഘടിപ്പിച്ചു. പള്ളി വികാരി സ്വാഗതം ആശംസിച്ച ചടങ്ങിൽ ഇടവക മാനേജിങ് കമ്മിറ്റി അംഗങ്ങളും വിശ്വാസി പ്രതിനിധികളും തിരുമേനിക്ക് പ്രാർത്ഥനാശംസകൾ നേർന്നു. പള്ളി സെക്രട്ടറി പ്രൊഫ. ഡോ. രഞ്ജൻ നടത്തിയ അനുമോദന പ്രസംഗത്തിൽ, കഴിഞ്ഞ രണ്ട് പതിറ്റാണ്ടായി സഭയുടെ ആത്മീയവും ഭരണപരവുമായ രംഗങ്ങളിൽ തിരുമേനി നൽകിയ സമർപ്പിത നേതൃത്വവും, പ്രതിസന്ധിഘട്ടങ്ങളിൽ സഭയ്ക്കും വിശ്വാസിസമൂഹത്തിനും നൽകിയ സേവനങ്ങളും അനുസ്മരിച്ചു. വാർഷികാഘോഷത്തിന്റെ ഭാഗമായി കേക്ക് മുറിക്കൽ ചടങ്ങും നടന്നു. വൈദികർ, ഇടവക ഭാരവാഹികൾ, വിശ്വാസികൾ എന്നിവർ പങ്കെടുത്ത ചടങ്ങിൽ തിരുമേനിയുടെ മഹാപൗരോഹിത്യ ശുശ്രൂഷയ്ക്ക് ദൈവം തുടർന്നും സമൃദ്ധമായ അനുഗ്രഹവും ആരോഗ്യവും നൽകി സഭയെ നയിക്കാൻ ഇടയാകട്ടെയെന്ന് പ്രാർത്ഥിച്ചുകൊണ്ടാണ് പരിപാടികൾ സമാപിച്ചത്.

Comments (0)

Related Stories