മാന്നാക്കുഴിയിൽ ജേക്കബ് വർഗീസ് സാറിൻ്റെ ഒന്നാം ചരമ വാർഷികം ജൂലൈ 3ന്

സുറിയാനി ഓർത്തഡോക്സ് സഭയുടെ ദൈവശാസ്ത്ര ഗ്രന്ഥങ്ങൾ മലയാളത്തിലേക്ക് പരിഭാഷപ്പെടുത്തി പ്രസിദ്ധീകരിക്കുവാൻ ദൈവം ഉപയോഗിച്ചുകൊണ്ടിരിക്കുന്ന പ്രതിഭാശാലിയായിരുന്നു മാന്നാക്കുഴിയിൽബഹുമാനപ്പെട്ട ജേക്കബ് വർഗീസ് സാർ. സുറിയാനി സഭയുടെ കറയറ്റതും വിപുലവും വിശിഷ്ടവുമായ ആരാധനാക്രമങ്ങൾ അമൂല്യവും വിലപ്പെട്ടതുമാണ്. മലയാളത്തിൽ അന്യമായിരുന്നവ കൂട്ടിച്ചേർത്ത് 33 അന്നഫോറകൾ (വി.കുർബ്ബാന തക്സ),അതും ഒന്നാം നൂറ്റാണ്ട് മുതൽ പതിനാറാം നൂറ്റാണ്ട് വരെയുള്ള കാലഘട്ടത്തിൽ രചിക്കപ്പെട്ടവ മലങ്കര സഭയ്ക്ക് തദ്ദേശീയ ഭാഷയിൽ ലഭ്യമാക്കിയ മഹാപ്രയത്നത്തിന് പിന്നിൽ ബഹുമാനപ്പെട്ട ജേക്കബ് വർഗീസ് സാർ നടത്തിയ പരിശ്രമങ്ങൾ വിലമതിക്കാനാവാത്തതാണ്.മലങ്കരയിൽ ലഭ്യമല്ലാതിരുന്ന കൃതികൾ വിദേശത്തുനിന്നും കണ്ടെത്തുവാനും, തർജ്ജിമ ചെയ്യുവാനും, സംശോധന ചെയ്യുന്നതിനും നടത്തിയ സമർപ്പിതമായ സേവനത്തിന് മലങ്കര യാക്കോബായ സുറിയാനി സഭ ജേക്കബ്സാറിനോട് കടപ്പെട്ടിരിക്കുന്നു.ശ്രീ. ജേക്കബ് വർഗീസ് മാന്നാക്കുഴിയിൽ സാർ ദിവ്യശ്രീ എം.സി. വർഗീസ് കോർ എപ്പിസ്കോപ്പയുടെയും, കാലംചെയ്ത പുണ്യശ്ലോകനായ മീഖായേൽ മോർ ദീവന്നാസിയോസ് മെത്രാപ്പോലീത്തായുടെ സഹോദര പുത്രി അന്നമ്മയുടെയും മകനാണ്. പരിശുദ്ധ അപ്രേം പ്രഥമൻ പാത്രിയാർക്കീസ് ബാവായുടെ ചിതറിയ മുത്തുകൾ,സ്വർഗ്ഗീയ ആരാധനയ്ക്കുള്ള സുവർണ്ണകവാടം,സുറിയാനി പണ്ഡിതനായ സെബാസ്റ്റ്യൻ ബ്രോക്കിൻ്റെ പരിശുദ്ധാത്മാവ് - സുറിയാനി മാമോദിസ ക്രമങ്ങളിൽ,ഇപ്പോഴത്തെ പരിശുദ്ധ അപ്രേം ദ്വിതീയൻ പാത്രിയർക്കീസ് ബാവായുടെ ഗവേഷണ പ്രബന്ധമായ കുരിശിൻ്റെ പ്രതീകങ്ങൾ പൂർവ്വിക സുറിയാനി പിതാക്കന്മാരുടെ രചനകളിൽ, പരിശുദ്ധ യാക്കോബ് തൃതീയൻ പാത്രിയാർക്കീസ് ബാവായുടെ ഇന്ത്യയിലെ സുറിയാനി സഭാ ചരിത്രം,ശ്രീമതി സാറാ നൈറ്റിൻ്റെ ഗവേഷണപ്രബന്ധം,അവരുടെ തന്നെ മലങ്കര സഭാ ചരിത്രം,പഴയനിയമ വിജ്ഞാനീയം,അതിപുരാതന സുറിയാനി രേഖകൾ,മോർ ഔഗേൻ്റെ ജീവിതകഥ, ചരിത്രത്തിൽ സുറിയാനി പെശീത്ത ബൈബിൾ,മലങ്കര സുറിയാനി സഭ 1938ലെ അമൂല്യങ്ങളായ സഭ ചരിത്രരേഖകൾ,സുറിയാനി ഭദ്രാസനങ്ങളുടെ ചരിത്രം,ശ്ബീതൊ (യാമപ്രാർത്ഥനകൾ),ശ്ഹീമോ നമസ്കാരം, വിശുദ്ധ രഹസ്യങ്ങളുടെ ക്രമം തുടങ്ങിയവ തർജ്ജിമ ചെയ്തവയിൽ ഉൾപ്പെടുന്നു. ഗണിതശാസ്ത്രത്തിൽ ബിരുദാനന്തരബിരുദം നേടിയ ജേക്കബ്സാർ കോളജ് അധ്യാപകൻ, ബാങ്ക് ഉദ്യോഗസ്ഥൻ എന്നീ നിലകളിൽ വിശിഷ്ടമായ സേവനം നടത്തി. 2001 ൽ സ്വയം ജോലിയിൽ നിന്നും വിരമിച്ചു.സുറിയാനി ഭാഷയിൽ ജ്ഞാനിയായ സാർ സുറിയാനി സാഹിത്യപോഷണത്തിനായി മുഴുവൻ സമയവും പ്രവർത്തിച്ചു.തുമ്പമൺ ഭദ്രാസനത്തിൽ അയിരൂർ മോർ ഇഗ്നാത്തിയോസ് യാക്കോബായ സുറിയാനി പള്ളി ഇടവാംഗവും,മധ്യതിരുവിതാംകൂർ കേന്ദ്രമായുള്ള മോർ ദിവന്നാസിയോസ് മിഖായേൽ മിഷൻ എന്ന സംഘടനയുടെ പ്രസിഡന്റുമായിരുന്നു. സുറിയാനി സഭയുടെ വേദശാസ്ത്ര വൈജ്ഞാനിക മണ്ഡലങ്ങളിൽ നിറസാന്നിധ്യമായിരുന്ന ബഹുമാനപ്പെട്ട ജേക്കബ് സാറിൻ്റെ വിടവാങ്ങൾ സഭയ്ക്ക് ഒരു തീരാനഷ്ടമായിരുന്നു.സഭാ ചരിത്രത്തിലും, വേദശാസ്ത്രത്തിലും അഗാധപാണ്ഡിത്യമുണ്ടായിരുന്ന ബഹുമാനപ്പെട്ട ജേക്കബ് സാറിൻ്റെ ഒന്നാം ചരമ വാർഷികത്തിൽ പാവന സ്മരണയ്ക്ക് മുമ്പിൽ ആദരാഞ്ജലികൾ🙏

Comments (0)

Related Stories