മെത്രാഭിഷേകത്തിന് പിന്നാലെ അനുമോദന സമ്മേളനം; നവാഭിഷിക്തൻ മോർ ഗ്രിഗോറിയോസ് ഗബ്രിയേലിനെ അനുമോദിച്ചു.

പുത്തൻകുരിശ് ● മലങ്കര യാക്കോബായ സുറിയാനി ഓർത്തഡോക്സ് സഭയുടെ മൂവാറ്റുപുഴ മേഖലയിലെ പുതിയ സഹായ മെത്രാപ്പോലീത്തയായി അഭിഷിക്തനായ അഭിവന്ദ്യ മോർ ഗ്രിഗോറിയോസ് ഗബ്രിയേൽ മെത്രാപ്പോലീത്തയെ അനുമോദിക്കുന്നതിനായി പുത്തൻകുരിശ് പാത്രിയർക്കാ സെന്ററിൽ വിപുലമായ സമ്മേളനം നടന്നു. മെത്രാഭിഷേക ശുശ്രൂഷകൾക്ക് ശേഷം നടന്ന സമ്മേളനത്തിൽ ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്കാ ബാവ അധ്യക്ഷത വഹിച്ചു.അഭിവന്ദ്യ മോർ അന്തിമോസ് മാത്യൂസ് മെത്രാപ്പോലീത്ത സ്വാഗതം ആശംസിച്ചു. സഭയുടെയും സമൂഹത്തിന്റെയും വിവിധ മേഖലകളെ പ്രതിനിധീകരിച്ച് എത്തിയ പ്രമുഖർ നവാഭിഷിക്ത മെത്രാപ്പോലീത്തയ്ക്ക് ആശംസകൾ നേർന്ന് സംസാരിച്ചു.സീറോ മലബാർ സഭയുടെ കോതമംഗലം രൂപതാധ്യക്ഷൻ മാർ ജോർജ് മാടത്തിക്കണ്ടത്തിൽ, പരിശുദ്ധ അന്ത്യോഖ്യാ സിംഹാസനത്തിന്റെ ഔദ്യോഗിക പ്രതിനിധിയും സ്വിറ്റ്സർലൻഡ്–ഓസ്ട്രിയ അതിഭദ്രാസനാധിപനുമായ അഭിവന്ദ്യ മോർ ദിവന്നാസിയോസ് ഇസ കുർബോസ് മെത്രാപ്പോലീത്ത, മലങ്കര സുറിയാനി കത്തോലിക്കാ സഭയുടെ മൂവാറ്റുപുഴ ഭദ്രാസനാധിപൻ യൂഹാനോൻ മോർ തിയോഡോഷ്യോസ് മെത്രാപ്പോലീത്ത, ലത്തീൻ കത്തോലിക്കാ സഭയുടെ വരാപ്പുഴ അതിരൂപതയുടെ സഹായമെത്രാൻ ഡോ. മാർ ആന്റണി വാലുങ്കൽ, മാർത്തോമാ സഭയുടെ വികാരി ജനറൽ റവ. സി. എ. വർഗീസ് അച്ചൻ, പൗരസ്ത്യ വിദ്യാപീഠം (വടവാതൂർ സെമിനാരി) പ്രസിഡന്റ് റവ. ഡോ. പോൾ വി. മാണിയാട്ട് അച്ചൻ, പുത്തൻകുരിശ് ഗ്രാമപഞ്ചായത്ത് പ്രസിഡന്റ് റെജി എന്നിവർ ആശംസാപ്രസംഗം നടത്തി.അനുഗ്രഹ പ്രഭാഷണത്തിൽ ശ്രേഷ്ഠ കാതോലിക്കാ ബാവ, മൂവാറ്റുപുഴ മേഖലയിൽ അഭിവന്ദ്യ മോർ അന്തിമോസ് മാത്യൂസ് മെത്രാപ്പോലീത്ത നടത്തിയ ആത്മീയവും ഭരണപരവുമായ സേവനങ്ങൾക്ക് പ്രത്യേകം നന്ദി രേഖപ്പെടുത്തി. സഭയുടെ ശുശ്രൂഷാ മേഖലകളിൽ അദ്ദേഹം നൽകിയ നേതൃത്വവും സമർപ്പണവും മാതൃകാപരമാണെന്ന് ബാവ പറഞ്ഞു.സഭയുടെ ഔദ്യോഗിക പ്രസിദ്ധീകരണമായ 'വിശ്വാസ സംരക്ഷകൻ' എല്ലാ യാക്കോബായ കുടുംബങ്ങളിലും സ്ഥിരമായി എത്തുന്നുവെന്ന് ഉറപ്പാക്കേണ്ടത് ഓരോ വൈദികരുടെയും ഇടവകകളുടെയും ഉത്തരവാദിത്വമാണെന്നും ശ്രേഷ്ഠ ബാവ ഓർമിപ്പിച്ചു. സഭയുടെ പ്രവർത്തനങ്ങൾക്ക് നേതൃത്വം നൽകുന്ന സഭാ വൈദിക ട്രസ്റ്റി റവ. ഫാ. റോയി ജോർജ് കട്ടച്ചിറ, സഭാ ട്രസ്റ്റി കമാൻഡർ തമ്പു ജോർജ് തുകലൻ, സഭാ സെക്രട്ടറി ജേക്കബ് സി. മാത്യു എന്നിവരുള്പ്പെടെയുള്ള ഔദ്യോഗിക ഭാരവാഹികൾക്കും അദ്ദേഹം നന്ദി രേഖപ്പെടുത്തി.മെത്രാഭിഷേക ശുശ്രൂഷകൾക്ക് മംഗളഭാവം പകർന്ന MSOT വൈദീക സെമിനാരി ഗായകസംഘത്തിന്റെ ഭക്തിനിർഭരമായ ഗാനശുശ്രൂഷയെയും ശ്രേഷ്ഠ ബാവ പ്രത്യേകം അഭിനന്ദിച്ചു.ചടങ്ങിനോടനുബന്ധിച്ച്, താത്കാലികമായി നഷ്ടപ്പെട്ടുപോയ ദൈവാലയങ്ങൾക്കായി ഭാഗ്യസ്മരണാർഹനായ ആബൂൻ മോർ ബസേലിയോസ് തോമസ് പ്രഥമൻ കാതോലിക്കാ ബാവയുടെ നാമധേയത്തിൽ ഏർപ്പെടുത്തിയ ധനസഹായ പദ്ധതി പ്രകാരമുള്ള സഹായ വിതരണം ശ്രേഷ്ഠ ബാവ നിർവഹിച്ചു.മലങ്കര യാക്കോബായ സുറിയാനി ഓർത്തഡോക്സ് സഭയിലെ 25 മെത്രാപ്പോലീത്തമാർ ചടങ്ങിൽ സന്നിഹിതരായിരുന്നു. സഭാ ഭാരവാഹികൾ നവാഭിഷിക്തനായ മോർ ഗ്രിഗോറിയോസ് ഗബ്രിയേൽ മെത്രാപ്പോലീത്തയെ ഹാരമണിയിച്ചും ബൊക്ക നൽകിയും അനുമോദിച്ചു.മറുപടി പ്രസംഗത്തിൽ നവാഭിഷിക്ത മെത്രാപ്പോലീത്ത, തന്നെ ഈ മഹത്തായ ശുശ്രൂഷയ്ക്ക് യോഗ്യനാക്കിയ ദൈവത്തോടും, പരിശുദ്ധ അന്ത്യോഖ്യാ സിംഹാസനത്തോടും, ശ്രേഷ്ഠ കാതോലിക്കാ ബാവയോടും, സഭയിലെ മെത്രാപ്പോലീത്തമാരോടും വൈദികരോടും വിശ്വാസികളോടും ഹൃദയംഗമമായ നന്ദി രേഖപ്പെടുത്തി. ഏൽപ്പിക്കപ്പെട്ട ശുശ്രൂഷ വിനയത്തോടെയും വിശ്വസ്തതയോടെയും നിർവഹിക്കുമെന്ന് അദ്ദേഹം പറഞ്ഞു.സമ്മേളനത്തിന്റെ അവതരണവും ചടങ്ങുകളുടെ ഏകോപനവും സഭാ വൈദിക ട്രസ്റ്റി റവ. ഫാ. റോയി ജോർജ് കട്ടച്ചിറ നിർവഹിച്ചു.തുടർന്ന് ഭാഗ്യസ്മരണാർഹനായ ആബൂൻ മോർ ബസേലിയോസ് തോമസ് പ്രഥമൻ കാതോലിക്കാ ബാവയുടെ കബറിങ്കൽ ധൂപപ്രാർഥന അർപ്പിച്ചു. ശ്രേഷ്ഠ കാതോലിക്കാ ബാവയുടെ ആശീർവാദത്തോടെ അനുമോദന സമ്മേളനം സമാപിച്ചു.ശേഷം നവാഭിഷിക്തനായ മോർ ഗ്രിഗോറിയോസ് ഗബ്രിയേൽ മെത്രാപ്പോലീത്തയുടെ കൈമുത്ത് സ്വീകരിക്കാൻ വിശ്വാസികൾ നീണ്ടനിരയായി എത്തി. ആശീർവാദം സ്വീകരിച്ചശേഷമാണ് വിശ്വാസികൾ മടങ്ങിയത്.

Comments (0)

Related Stories