മൂവാറ്റുപുഴ മേഖലയ്ക്ക് പുതിയ മെത്രാപ്പോലീത്ത; മോർ ഗ്രിഗോറിയോസ് ഗബ്രിയേൽ മെത്രാഭിഷേകം ചെയ്യപ്പെട്ടു.

പുത്തൻകുരിശ് ● മലങ്കര യാക്കോബായ സുറിയാനി ഓർത്തഡോക്സ് സഭയുടെ അങ്കമാലി ഭദ്രാസനത്തിലെ മൂവാറ്റുപുഴ മേഖലയ്ക്ക് പുതിയ സഹായ മെത്രാപ്പോലീത്തയായി വന്ദ്യ ഗബ്രിയേൽ കളപ്പുരയിൽ റമ്പാൻ മെത്രാഭിഷേകം ചെയ്യപ്പെട്ടു. പുത്തൻകുരിശ് പാത്രിയർക്കാ സെന്ററിലെ സെന്റ് അത്തനേഷ്യസ് കത്തീഡ്രലിൽ നടന്ന വിശുദ്ധ മെത്രാഭിഷേക ശുശ്രൂഷയിൽ, ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്കാ ബാവ, നിയുക്ത മെത്രാപ്പോലീത്തയ്ക്ക് "മോർ ഗ്രിഗോറിയോസ് ഗബ്രിയേൽ" എന്ന സഭാനാമം നൽകി മെത്രാപ്പോലീത്ത സ്ഥാനത്തേക്ക് ഉയർത്തി.ശ്രേഷ്ഠ കാതോലിക്കാ ബാവയുടെ തൃക്കരങ്ങളാൽ നിർവഹിക്കപ്പെട്ട ആദ്യ മെത്രാഭിഷേക ശുശ്രൂഷയെന്ന പ്രത്യേകതയും ചടങ്ങിനുണ്ടായി. പരിശുദ്ധ എപ്പിസ്കോപ്പൽ സുന്നഹദോസിന്റെ തീരുമാനപ്രകാരവും ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവയുടെ അംഗീകാരത്തോടെയുമാണ് മെത്രാഭിഷേകം നടന്നത്.രാവിലെ പ്രഭാത നമസ്കാരത്തോടെയാണ് ശുശ്രൂഷകൾ ആരംഭിച്ചത്. തുടർന്ന് ശ്രേഷ്ഠ കാതോലിക്കാ ബാവയെയും സഭയിലെ അഭിവന്ദ്യ മെത്രാപ്പോലീത്തമാരെയും നിയുക്ത മെത്രാപ്പോലീത്തയെയും ഘോഷയാത്രയായി ദൈവാലയത്തിലേക്ക് ആനയിച്ചു. വിശുദ്ധ കുർബാനയ്ക്ക് ശേഷം പൗരാണിക സുറിയാനി സഭാ പാരമ്പര്യപ്രകാരമുള്ള മെത്രാഭിഷേക ശുശ്രൂഷകൾ ഭക്തിനിർഭരമായി നടന്നു.സഭയിലെ എല്ലാ മെത്രാപ്പോലീത്തമാരും സഹകാർമ്മികരായ ശുശ്രൂഷയിൽ പരിശുദ്ധ അന്ത്യോഖ്യാ സിംഹാസനത്തിന്റെ ഔദ്യോഗിക പ്രതിനിധിയായ സ്വിറ്റ്സർലൻഡ്-ഓസ്ട്രിയ അതിഭദ്രാസനാധിപൻ അഭിവന്ദ്യ മോർ ദിവന്നാസിയോസ് ഇസ കുർബോസ് മെത്രാപ്പോലീത്തയും സന്നിഹിതനായിരുന്നു. വൈദികർ, സന്യാസിമാർ, വിവിധ ഭദ്രാസനങ്ങളിൽ നിന്നുള്ള വിശ്വാസികൾ എന്നിവർ ഉൾപ്പെടെ ആയിരക്കണക്കിന് പേർ ചടങ്ങിൽ പങ്കെടുത്തു.ഈസ്റ്റ് വാഴപ്പിള്ളി മോർ ഫീലക്സീനോസ് ദയറായിലെ അംഗമായിരുന്ന മോർ ഗ്രിഗോറിയോസ് ഗബ്രിയേൽ മെത്രാപ്പോലീത്ത, അങ്കമാലി ഭദ്രാസനത്തിലെ മൂവാറ്റുപുഴ മേഖലയിലെ ആത്മീയ-ഭരണപരമായ ശുശ്രൂഷകൾക്ക് നേതൃത്വം നൽകും.

Comments (0)

Related Stories