സംസ്ഥാന ടെലിവിഷൻ പുരസ്‌കാര ജേതാവ് പോൾസൺ കൂത്താട്ടുകുളത്തെ ഇടവക ആദരിച്ചു

കോഴിപ്പിള്ളി: കേരള സംസ്ഥാന ടെലിവിഷൻ പുരസ്കാരത്തിൽ മികച്ച ഹാസ്യനടനുള്ള പുരസ്കാരം നേടിയ സെന്റ് പീറ്റേഴ്സ് & സെന്റ് പോൾസ് യാക്കോബായ സുറിയാനി പള്ളി ഇടവകാംഗം പോൾസൺ കൂത്താട്ടുകുളത്തിന് ഇടവകയുടെ ആഭിമുഖ്യത്തിൽ സ്വീകരണവും അനുമോദനവും നൽകി.കോഴിപ്പിള്ളി സെന്റ് പീറ്റേഴ്സ് & സെന്റ് പോൾസ് യാക്കോബായ സുറിയാനി പള്ളിയുടെ പ്രധാന പെരുന്നാളിനോടനുബന്ധിച്ച് വിശുദ്ധ കുർബാനയ്ക്കുശേഷം സംഘടിപ്പിച്ച ചടങ്ങിൽ ഇടവക മെത്രാപ്പോലീത്ത അഭിവന്ദ്യ മോർ ഇവാനിയോസ് മാത്യൂസ് തിരുമേനി ഇടവകയുടെ സ്നേഹോപഹാരം നൽകി. കലാരംഗത്ത് ശ്രദ്ധേയമായ നേട്ടം കൈവരിച്ച പോൾസൺ കൂത്താട്ടുകുളത്തെ തിരുമേനി അനുമോദിക്കുകയും ഇനിയും ഉയർന്ന വിജയങ്ങൾ കരസ്ഥമാക്കാൻ ആശംസകൾ നേർക്കുകയും ചെയ്തു.ജനപ്രിയ ഹാസ്യപരിപാടിയായ 'ഇത് വേറെ ഐറ്റം'-ലെ ശ്രദ്ധേയമായ പ്രകടനത്തിനാണ് പോൾസൺ മികച്ച ഹാസ്യനടനുള്ള കേരള സംസ്ഥാന ടെലിവിഷൻ പുരസ്കാരത്തിന് അർഹനായത്. വ്യത്യസ്ത കഥാപാത്രങ്ങളിലൂടെയും സ്വാഭാവികമായ ഹാസ്യാവിഷ്കാരത്തിലൂടെയും പ്രേക്ഷകപ്രീതി നേടിയ അദ്ദേഹത്തിന്റെ അഭിനയമികവാണ് ഈ അംഗീകാരത്തിന് വഴിയൊരുക്കിയത്.ടെലിവിഷൻ രംഗത്ത് സംസ്ഥാനതല അംഗീകാരം നേടിയ പോൾസൺ കൂത്താട്ടുകുളത്തിന്റെ നേട്ടം ഇടവകയ്ക്കും നാടിനും അഭിമാനകരമാണെന്ന് ചടങ്ങിൽ സംസാരിച്ചവർ അഭിപ്രായപ്പെട്ടു. ഇടവക വികാരിയും വൈദികരും ട്രസ്റ്റിമാരും മറ്റ് ഭാരവാഹികളും വിശ്വാസികളും ചടങ്ങിൽ പങ്കെടുത്തു.

Comments (0)

Related Stories