വന്ദ്യ ഗബ്രിയേൽ കളപ്പുരയിൽ റമ്പാന്റെ മെത്രാഭിഷേകം നാളെ; പുത്തൻകുരിശിൽ ഒരുക്കങ്ങൾ പൂർത്തിയായി

പുത്തൻകുരിശ് ● മലങ്കര യാക്കോബായ സുറിയാനി ഓർത്തഡോക്സ് സഭയുടെ അങ്കമാലി ഭദ്രാസനത്തിലെ മൂവാറ്റുപുഴ മേഖലയ്ക്ക് സഹായ മെത്രാപ്പോലീത്തയായി തെരഞ്ഞെടുക്കപ്പെട്ട വന്ദ്യ ഗബ്രിയേൽ കളപ്പുരയിൽ റമ്പാന്റെ മെത്രാഭിഷേക ശുശ്രൂഷയ്ക്ക് പുത്തൻകുരിശ് പാത്രിയർക്കാ സെന്ററിലെ സെന്റ് അത്തനേഷ്യസ് കത്തീഡ്രലിൽ എല്ലാ ഒരുക്കങ്ങളും പൂർത്തിയായി. ജൂൺ 30 ചൊവ്വാഴ്ച നടക്കുന്ന മെത്രാഭിഷേക ശുശ്രൂഷയ്ക്ക് ആയിരക്കണക്കിന് വിശ്വാസികൾ പങ്കെടുക്കുമെന്ന് പ്രതീക്ഷിക്കുന്നു.ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്കാ ബാവയുടെ തൃക്കരങ്ങളാൽ നിർവഹിക്കപ്പെടുന്ന ആദ്യ മെത്രാപ്പോലീത്ത സ്ഥാനാരോഹണ ശുശ്രൂഷയെന്ന പ്രത്യേകതയും ചടങ്ങിനുണ്ട്. പരിശുദ്ധ എപ്പിസ്കോപ്പൽ സുന്നഹദോസിന്റെ തീരുമാനപ്രകാരവും ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവയുടെ അംഗീകാരത്തോടെയുമാണ് മെത്രാഭിഷേകം നടക്കുന്നത്.ഈസ്റ്റ് വാഴപ്പിള്ളി മോർ ഫീലക്സീനോസ് ദയറായിലെ അംഗമായ വന്ദ്യ ഗബ്രിയേൽ കളപ്പുരയിൽ റമ്പാനെയാണ് (45) മൂവാറ്റുപുഴ മേഖലയിലെ സഹായ മെത്രാപ്പോലീത്തയായി വാഴിക്കുന്നത്. സഭയിലെ എല്ലാ മെത്രാപ്പോലീത്തമാരും ശുശ്രൂഷയിൽ സഹകാർമ്മികരാകും.രാവിലെ 7.30-ന് പ്രഭാത പ്രാർഥനയോടെ ചടങ്ങുകൾ ആരംഭിക്കും. രാവിലെ 8 മണിക്ക് ശ്രേഷ്ഠ കാതോലിക്കാ ബാവയെയും മെത്രാപ്പോലീത്തമാരെയും നിയുക്ത മെത്രാപ്പോലീത്തയെയും കത്തീഡ്രൽ പാഴ്സനേജിൽ നിന്ന് ദൈവാലയത്തിലേക്ക് ആനയിക്കും. തുടർന്ന് രാവിലെ 8.30-ന് വിശുദ്ധ കുർബാനയും രാവിലെ 9.45-ന് മെത്രാഭിഷേക ശുശ്രൂഷകളും നടക്കും.മെത്രാഭിഷേകത്തിന് ശേഷം നടക്കുന്ന അനുമോദന സമ്മേളനത്തിൽ ശ്രേഷ്ഠ കാതോലിക്കാ ബാവ അധ്യക്ഷത വഹിക്കും. പെരുമ്പാവൂർ മേഖലാധിപൻ അഭിവന്ദ്യ ഡോ. മോർ അപ്രേം മാത്യൂസ് മെത്രാപ്പോലീത്ത സ്വാഗതം ആശംസിക്കും. സുറിയാനി ഓർത്തഡോക്സ് സഭയുടെ സ്വിറ്റ്സർലൻഡ്-ഓസ്ട്രിയ അതിഭദ്രാസനാധിപൻ അഭിവന്ദ്യ മോർ ദിവന്നാസിയോസ് ഇസ കുർബോസ് മെത്രാപ്പോലീത്ത, സീറോ മലബാർ സഭ കോതമംഗലം രൂപതാധ്യക്ഷൻ മാർ ജോർജ് മഠത്തിക്കണ്ടത്തിൽ, മലങ്കര സുറിയാനി കത്തോലിക്ക സഭ മൂവാറ്റുപുഴ രൂപതാധ്യക്ഷൻ ഡോ. യൂഹാനോൻ മാർ തിയോഡോഷ്യോസ്, വരാപ്പുഴ അതിരൂപതയുടെ സഹായമെത്രാൻ ഡോ. മാർ ആന്റണി വാലുങ്കൽ, ഓസ്ട്രേലിയയിലെ വിക്ടോറിയൻ പാർലമെന്റ് ചീഫ് വിപ്പ് ലീ ടാർലാമിസ്, സഭയിലെ മുതിർന്ന മെത്രാപ്പോലീത്തമാർ, സഭാ വൈദിക ട്രസ്റ്റി റവ. ഫാ. റോയി ജോർജ് കട്ടച്ചിറ, സഭാ ട്രസ്റ്റി കമാൻഡർ തമ്പു ജോർജ് തുകലൻ, സഭാ സെക്രട്ടറി ജേക്കബ് സി. മാത്യു, രാഷ്ട്രീയ-സാംസ്കാരിക രംഗത്തെ പ്രമുഖർ എന്നിവർ ആശംസകൾ നേർന്ന് സംസാരിക്കും. തുടർന്ന് സ്നേഹവിരുന്നും ഒരുക്കിയിട്ടുണ്ട്. വൈദികരും വിശ്വാസികളും വലിയ തോതിൽ പങ്കെടുക്കുന്നതിനാൽ പാത്രിയർക്കാ സെന്റർ മൈതാനത്ത് വിശാലമായ പന്തൽ ഉൾപ്പെടെ പ്രത്യേക സൗകര്യങ്ങൾ സജ്ജമാക്കിയിട്ടുണ്ട്.വാഹന പാർക്കിംഗ് ക്രമീകരണങ്ങൾപാത്രിയർക്കാ സെന്റർ കോമ്പൗണ്ടിൽ അഭിവന്ദ്യ മെത്രാപ്പോലീത്തമാർ, വിശിഷ്ടാതിഥികൾ, വൈദികർ, മാധ്യമപ്രവർത്തകർ എന്നിവരുടെ വാഹനങ്ങൾക്ക് മാത്രമേ പ്രവേശനം ഉണ്ടായിരിക്കൂ. വിശ്വാസികൾക്കായി പുത്തൻകുരിശ് മോർ ഏലിയാ ചാപ്പൽ, എം.ജെ.എസ്.എസ്.എ. ഹെഡ്ക്വാർട്ടേഴ്സ്, എം.എ.എം. ഹയർ സെക്കൻഡറി സ്കൂൾ ഗ്രൗണ്ട്, കാവുംതാഴം മൈതാനം എന്നിവിടങ്ങളിൽ പാർക്കിംഗ് സൗകര്യം ഒരുക്കിയിട്ടുണ്ട്. ചടങ്ങുകളുടെ സുഗമമായ നടത്തിപ്പിനായി നിർദേശങ്ങൾ പാലിക്കണമെന്ന് സംഘാടകർ അഭ്യർഥിച്ചു.മെത്രാഭിഷേക ശുശ്രൂഷകൾ മലങ്കര യാക്കോബായ സുറിയാനി ഓർത്തഡോക്സ് സഭയുടെ ഔദ്യോഗിക മാധ്യമവിഭാഗമായ ജെ.എസ്.സി. ന്യൂസ് തൽസമയം സംപ്രേഷണം ചെയ്യും.

Comments (0)

Related Stories