മെത്രാപ്പോലീത്താ വാഴ്ചക്കായി പാത്രിയർക്കൽ പ്രതിനിധി മലങ്കരയിലെത്തി; പുത്തൻകുരിശിൽ ഊഷ്മള സ്വീകരണം

പുത്തൻകുരിശ് ● മലങ്കര യാക്കോബായ സുറിയാനി സഭയുടെ മൂവാറ്റുപുഴ മേഖലയിലെ സഹായ മെത്രാപ്പോലീത്തയായി തെരഞ്ഞെടുക്കപ്പെട്ട വന്ദ്യ ഗബ്രിയേൽ റമ്പാച്ചന്റെ മെത്രാഭിഷേക ശുശ്രൂഷയിൽ പങ്കെടുക്കുന്നതിനായി പരിശുദ്ധ അന്ത്യോഖ്യാ സിംഹാസനത്തിന്റെ ഔദ്യോഗിക പ്രതിനിധിയായ അഭിവന്ദ്യ മോർ ദിവന്നാസിയോസ് ഇസ കുർബോസ് മെത്രാപ്പോലീത്ത മലങ്കരയിലെത്തി. അദ്ദേഹത്തിന് സഭയുടെ ആസ്ഥാനമായ പുത്തൻകുരിശ് പാത്രിയർക്കാ സെന്ററിൽ ഊഷ്മളമായ സ്വീകരണം നൽകി.പെരുമ്പാവൂർ മേഖലാധിപൻ അഭിവന്ദ്യ മോർ അപ്രേം മാത്യൂസ് മെത്രാപ്പോലീത്തയും നിയുക്ത മെത്രാപ്പോലീത്ത വന്ദ്യ ഗബ്രിയേൽ റമ്പാച്ചനും ചേർന്നാണ് പാത്രിയർക്കൽ പ്രതിനിധിയെ സ്വീകരിച്ചത്. വൈദികരും സഭാ പ്രവർത്തകരും സ്വീകരണ ചടങ്ങിൽ സന്നിഹിതരായിരുന്നു.മൂവാറ്റുപുഴ മേഖലയിലെ സഹായ മെത്രാപ്പോലീത്തയായി തെരഞ്ഞെടുക്കപ്പെട്ട വന്ദ്യ ഗബ്രിയേൽ റമ്പാച്ചന്റെ മെത്രാഭിഷേകം ജൂൺ 30 ചൊവ്വാഴ്ച രാവിലെ പുത്തൻകുരിശ് സെന്റ് അത്താനാസിയോസ് കത്തീഡ്രലിൽ നടക്കും. ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്കാ ബാവ മുഖ്യകാർമ്മികത്വം വഹിക്കുന്ന ശുശ്രൂഷകളിൽ പരിശുദ്ധ അന്ത്യോഖ്യാ സിംഹാസനത്തിന്റെ പ്രതിനിധിയായി അഭിവന്ദ്യ മോർ ദിവന്നാസിയോസ് ഇസ കുർബോസ് മെത്രാപ്പോലീത്ത പങ്കെടുക്കും.മെത്രാഭിഷേക ചടങ്ങിനായുള്ള അവസാനഘട്ട ഒരുക്കങ്ങൾ പുത്തൻകുരിശ് പാത്രിയർക്കാ സെന്ററിൽ പുരോഗമിക്കുകയാണെന്ന് സഭാ അധികൃതർ അറിയിച്ചു.

Comments (0)

Related Stories