തിരുവനന്തപുരം ● തിരുവനന്തപുരം സെന്റ് പീറ്റേഴ്സ് യാക്കോബായ സുറിയാനി ഓർത്തഡോക്സ് സിംഹാസന കത്തീഡ്രലിലെ വിശുദ്ധ പത്രോസ് ശ്ലീഹായുടെ നാമധേയത്തിലുള്ള പ്രധാന പെരുന്നാൾ ജൂൺ 28, 29 തീയതികളിൽ വിവിധ ആത്മീയ ശുശ്രൂഷകളോടും വിശ്വാസസംഗമങ്ങളോടും ജീവകാരുണ്യ പദ്ധതികളുടെ ഉദ്ഘാടനത്തോടും കൂടി ആചരിക്കും.
പെരുന്നാളിന് മുന്നോടിയായി ജൂൺ 21-ന് ബഹു. അലക്സാണ്ടർ തോമസ് അച്ചൻ കൊടിയേറ്റ കർമ്മം നിർവഹിച്ച് തിരുനാൾ ആഘോഷങ്ങൾക്ക് തുടക്കമിട്ടു.
ജൂൺ 28 ഞായറാഴ്ച വൈകിട്ട് 6 മണിക്ക് ഹോണവാർ മിഷൻ ഭദ്രാസനാധിപൻ അഭിവന്ദ്യ മോർ അന്തോണിയോസ് യാക്കോബ് മെത്രാപ്പോലീത്തയുടെ മുഖ്യകാർമ്മികത്വത്തിൽ സന്ധ്യാപ്രാർഥന നടക്കും. തുടർന്ന് വചനശുശ്രൂഷ, കഴിഞ്ഞ അധ്യയന വർഷത്തിൽ അക്കാദമിക് മികവ് തെളിയിച്ച വിദ്യാർത്ഥികൾക്കുള്ള ആദരവ്, മാർത്തമറിയം വനിതാ സമാജത്തിന്റെ ജീവകാരുണ്യ സംരംഭമായ 'തണൽ' പദ്ധതിയുടെ ഉദ്ഘാടനം, ഭക്തിനിർഭരമായ റാസ, ആശീർവാദം, സ്നേഹവിരുന്ന് എന്നിവ ക്രമീകരിച്ചിട്ടുണ്ട്.
പെരുന്നാളിന്റെ പ്രധാന ദിനമായ ജൂൺ 29 തിങ്കളാഴ്ച രാവിലെ 7 മണിക്ക് അഭിവന്ദ്യ മോർ അന്തോണിയോസ് യാക്കോബ് മെത്രാപ്പോലീത്തയുടെ മുഖ്യകാർമ്മികത്വത്തിൽ വിശുദ്ധ മൂന്നിന്മേൽ കുർബ്ബാന അർപ്പിക്കും. തുടർന്ന് നേർച്ചവിളമ്പും നടക്കും.
വിശുദ്ധ പത്രോസ് ശ്ലീഹായുടെ മദ്ധ്യസ്ഥതയിൽ അനുഗ്രഹം പ്രാപിക്കുന്നതിനായി വിശ്വാസികൾ മുഴുവൻ പെരുന്നാൾ ശുശ്രൂഷകളിൽ ഭക്തിപൂർവം പങ്കുചേരണമെന്ന് ഇടവക അധികൃതർ അഭ്യർഥിച്ചു.
Comments (0)