പെർത്ത് സെന്റ് പീറ്റേഴ്സ് യാക്കോബായ സുറിയാനി പള്ളിയിൽ പ്പെരുന്നാളും ദൈവാലയത്തിന്റെ ഇരുപതാം വാർഷികവും.

പെർത്ത് (ഓസ്ട്രേലിയ) ● പെർത്ത് സെന്റ് പീറ്റേഴ്സ് യാക്കോബായ സുറിയാനി ഓർത്തഡോക്സ് പള്ളിയുടെ കാവൽപിതാവായ വിശുദ്ധ പത്രോസ് ശ്ലീഹായുടെ വാർഷിക ഓർമ്മപ്പെരുന്നാളും ദൈവാലയത്തിന്റെ ഇരുപതാം വാർഷിക (Vicennial Jubilee) ആഘോഷങ്ങളും ജൂൺ 28 മുതൽ ജൂലൈ 5 വരെ വിവിധ ആത്മീയ-ആഘോഷ പരിപാടികളോടെ നടത്തപ്പെടും.

ജൂൺ 28-ന് ഞായറാഴ്ച രാവിലെ 7.45-ന് പ്രഭാത നമസ്കാരവും 8.30-ന് വിശുദ്ധ കുർബ്ബാനയും നടക്കും. തുടർന്ന് രാവിലെ 10.30-ന് ഇടവക വികാരി റവ. ഫാ. ബിനിൽ ടി. ബേബിയുടെ നേതൃത്വത്തിൽ കൊടിയേറ്റ് കർമ്മം നിർവഹിച്ച് ആഘോഷങ്ങൾക്ക് തുടക്കമാകും.

ജൂലൈ 3 വെള്ളിയാഴ്ച വൈകിട്ട് 6 മണിക്ക് സ്വീകരണ സമ്മേളനത്തോടെയാണ് പ്രധാന പെരുന്നാൾ ദിനാചരണങ്ങൾക്ക് തുടക്കമാകുന്നത്. തുടർന്ന് സന്ധ്യാനമസ്കാരം, സെന്റ് പീറ്റേഴ്സ് ക്വയറിന്റെ ഭക്തിഗാനശുശ്രൂഷ, അഭിവന്ദ്യ ഏലിയാസ് മോർ യൂലിയോസ് മെത്രാപ്പോലീത്തയുടെ നേതൃത്വത്തിലുള്ള ആത്മീയ ധ്യാനയോഗം, ആശീർവാദം, സ്നേഹവിരുന്ന് എന്നിവ നടക്കും.

ജൂലൈ 4 ശനിയാഴ്ച വൈകിട്ട് സന്ധ്യാ നമസ്കാരത്തിന് അഭിവന്ദ്യ ഏലിയാസ് മോർ യൂലിയോസ് മെത്രാപ്പോലീത്ത മുഖ്യകാർമ്മികത്വം വഹിക്കും. തുടർന്ന് സുവിശേഷ സന്ദേശം, ഭക്തിനിർഭരമായ പ്രദക്ഷിണം, ആശീർവാദം, സ്നേഹവിരുന്ന് എന്നിവയും ക്രമീകരിച്ചിട്ടുണ്ട്.

സമാപന ദിവസമായ ജൂലൈ 5 ഞായറാഴ്ച രാവിലെ 7.30-ന് പ്രഭാത നമസ്കാരവും 8.15-ന് അഭിവന്ദ്യ ഏലിയാസ് മോർ യൂലിയോസ് മെത്രാപ്പോലീത്തയുടെ മുഖ്യകാർമ്മികത്വത്തിൽ വിശുദ്ധ മൂന്നിന്മേൽ കുർബ്ബാനയും നടക്കും. തുടർന്ന് പെരുന്നാൾ സന്ദേശം, പ്രദക്ഷിണം, സമാപന ആശീർവാദം, ദൈവാലയത്തിന്റെ ഇരുപതാം വാർഷിക പൊതുസമ്മേളനം, മുൻ വികാരിയും ഇടവകാംഗവുമായ റവ. ഫാ. ജോമോൻ തോമസിന്റെ പൗരോഹിത്യ രജതജൂബിലി ആഘോഷം, പന്ത്രണ്ടാം ക്ലാസ് വിദ്യാർത്ഥികൾക്കുള്ള അനുമോദനം, സ്നേഹവിരുന്ന്, കൊടിയിറക്കൽ എന്നിവയോടെ ആഘോഷങ്ങൾ സമാപിക്കും.

ഇടവകയുടെ ഇരുപതാം വാർഷികാഘോഷങ്ങളുടെ ഭാഗമായി അഭിവന്ദ്യ ഏലിയാസ് മോർ യൂലിയോസ് മെത്രാപ്പോലീത്തയുടെ ആത്മീയ സാന്നിധ്യവും റവ. ഫാ. ജോമോൻ തോമസിന്റെ പൗരോഹിത്യ രജതജൂബിലി ആഘോഷവും പെരുന്നാളിന് കൂടുതൽ പ്രൗഢി പകരുമെന്ന് സംഘാടകർ അറിയിച്ചു. വിശ്വാസികളെയും സുമനസ്സുകളെയും മുഴുവൻ ആഘോഷങ്ങളിൽ പങ്കുചേർന്ന് അനുഗ്രഹം പ്രാപിക്കാൻ ഇടവക ഭാരവാഹികൾ ക്ഷണിച്ചു.