സമൂഹത്തിലെ പിന്നാക്ക വിഭാഗങ്ങൾക്കായി യാക്കോബായ സഭയുടെ പ്രവർത്തനം മാതൃകാപരം: മന്ത്രി മോൻസ് ജോസഫ്

മുട്ടുചിറ (കോട്ടയം) ● സമൂഹത്തിലെ പിന്നാക്ക വിഭാഗങ്ങളുടെയും നിർധനരുടെയും ഉന്നമനത്തിനായി മലങ്കര യാക്കോബായ സുറിയാനി സഭ നടത്തിവരുന്ന സേവന പ്രവർത്തനങ്ങൾ മാതൃകാപരമാണെന്ന് മന്ത്രി മോൻസ് ജോസഫ് പറഞ്ഞു. യാക്കോബായ സുറിയാനി സഭയുടെ ആഭിമുഖ്യത്തിൽ മുട്ടുചിറ സെന്റ് ആൻഡ്രൂസ് യാക്കോബായ സുറിയാനി പള്ളിയിൽ സംഘടിപ്പിച്ച സ്വീകരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.കോട്ടയം ഭദ്രാസന മെത്രാപ്പോലീത്തയും എപ്പിസ്കോപ്പൽ സുന്നഹദോസ് സെക്രട്ടറിയുമായ അഭിവന്ദ്യ ഡോ. മോർ തിമോത്തിയോസ് തോമസ് മെത്രാപ്പോലീത്ത അധ്യക്ഷത വഹിച്ചു. ആത്മീയ പ്രവർത്തനങ്ങൾക്കൊപ്പം വിദ്യാഭ്യാസം, ആരോഗ്യരംഗം, ജീവകാരുണ്യ സേവനങ്ങൾ എന്നിവയിലൂടെ സഭ സമൂഹത്തിന് നൽകുന്ന സംഭാവനകൾ അഭിനന്ദനാർഹമാണെന്നും മന്ത്രി പറഞ്ഞു.ജില്ലാ പഞ്ചായത്തംഗം ആൻ മരിയ ജോർജ്, ബ്ലോക്ക് പഞ്ചായത്ത് പ്രസിഡന്റ് തങ്കമ്മ വർഗീസ്, പഞ്ചായത്ത് വൈസ് പ്രസിഡന്റ് ദീപ ഇന്ദുചൂഡൻ, ക്ഷേമകാര്യ വികസന സ്റ്റാൻഡിങ് കമ്മിറ്റി ചെയർപേഴ്സൺ മീനു സാവിയോ, ജനപ്രതിനിധികളായ ജിൻസി എലിസബത്ത്, ജോസ് മുണ്ടകുന്നേൽ, ഗീതു നിധീഷ്, ഷീജ ശ്രീപ്രസാദ്, ലില്ലിക്കുട്ടി ജോർജ്, നിഷ കുര്യൻ, സിറിയക് ജോർജ്, വത്സമ്മ ജോസ് എന്നിവർ സംസാരിച്ചു.ഇടവക വികാരി റവ. ഫാ. ജസ്മോൻ പുത്തുർകുടിലിൽ, പള്ളി ഭാരവാഹികളായ ഡോ. എബിസൺ ഫിലിപ്പ്, കുര്യാക്കോസ് പടിഞ്ഞാറേക്കര എന്നിവർ ചടങ്ങുകൾക്ക് നേതൃത്വം നൽകി.

Comments (0)

Related Stories