സെന്റ് പോൾസ് മിഷൻ മോറിയ പബ്ലിക് സ്കൂൾ സന്ദർശിച്ച് ഗീവർഗീസ് മോർ കൂറിലോസ് മെത്രാപ്പോലീത്ത

അട്ടപ്പാടി ● മലങ്കര യാക്കോബായ സുറിയാനി ഓർത്തഡോക്സ് സഭയുടെ നിരണം ഭദ്രാസനാധിപനും സെന്റ് പോൾസ് മിഷന്റെ മെത്രാപ്പോലീത്തയുമായ അഭിവന്ദ്യ ഡോ. ഗീവർഗീസ് മോർ കൂറിലോസ് മെത്രാപ്പോലീത്ത, പതിനേഴ് വർഷങ്ങൾക്കു ശേഷം അട്ടപ്പാടിയിലെ സെന്റ് പോൾസ് മിഷനും മോറിയ പബ്ലിക് സ്കൂളും സന്ദർശിച്ചു. സന്ദർശനാനുഭവം സാമൂഹിക മാധ്യമത്തിലൂടെ പങ്കുവെച്ച മെത്രാപ്പോലീത്ത, വിദ്യാർത്ഥികളുടെ മുഖങ്ങളിൽ തെളിഞ്ഞുനിന്ന സന്തോഷവും ആത്മവിശ്വാസവും ദൃഢമായ വിശ്വാസജീവിതവും ഏറെ ഹൃദയസ്പർശിയായ അനുഭവമായിരുന്നുവെന്ന് പറഞ്ഞു. മിഷൻ പ്രവർത്തനങ്ങളിലൂടെ സമൂഹത്തിൽ സംഭവിച്ചുകൊണ്ടിരിക്കുന്ന ക്രിയാത്മകമായ മാറ്റങ്ങൾ നേരിൽ കാണാൻ കഴിഞ്ഞത് വലിയ അനുഗ്രഹമായി കരുതുന്നതായും അദ്ദേഹം വ്യക്തമാക്കി. സ്കൂളിലെ വിദ്യാർത്ഥികൾക്ക് പഠനോപകരണ കിറ്റുകൾ സ്പോൺസർ ചെയ്ത ഡെൻ കെയർ മാനേജിംഗ് ഡയറക്ടർ ശ്രീ. ജോൺ കുര്യാക്കോസിനോട് മെത്രാപ്പോലീത്ത പ്രത്യേകം നന്ദി രേഖപ്പെടുത്തി. വിദ്യാർത്ഥികളുടെ വിദ്യാഭ്യാസ മുന്നേറ്റത്തിന് ഇത്തരം സഹായങ്ങൾ വിലപ്പെട്ട പിന്തുണയാണെന്നും അദ്ദേഹം അഭിപ്രായപ്പെട്ടു. അട്ടപ്പാടിയിലെ സെന്റ് പോൾസ് മിഷൻ വർഷങ്ങളായി നടപ്പാക്കിവരുന്ന വിദ്യാഭ്യാസ-സാമൂഹിക ശുശ്രൂഷകൾ പിന്നാക്ക വിഭാഗങ്ങളിലെ കുടുംബങ്ങൾക്ക് പ്രത്യാശയും കരുത്തും പകരുന്നതാണെന്നും, വിശ്വാസവും സേവനവും കൈകോർക്കുന്ന ഇത്തരം മിഷൻ പ്രവർത്തനങ്ങൾ സമൂഹത്തിന് മാതൃകയാണെന്നും മെത്രാപ്പോലീത്ത പറഞ്ഞു.

Comments (0)

Related Stories