അങ്കാറ (തുർക്കി) ● ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷനും അന്ത്യോഖ്യയുടെയും കിഴക്കിന്റെയും പാത്രിയർക്കീസുമായ പരിശുദ്ധ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവ, തുർക്കി റിപ്പബ്ലിക്കിന്റെ പ്രസിഡന്റ് ശ്രീ. റജബ് ത്വയ്യിബ് എർദോഗാനുമായി അങ്കാറയിലെ പ്രസിഡൻഷ്യൽ പാലസിൽ കൂടിക്കാഴ്ച നടത്തി.
സുറിയാനി ഓർത്തഡോക്സ് സഭയുടെയും തുർക്കിയിലെയും മേഖലയിലെയും സഭാംഗങ്ങളുടെയും സാഹചര്യങ്ങൾ സംബന്ധിച്ച വിഷയങ്ങളാണ് കൂടിക്കാഴ്ചയിൽ പ്രധാനമായും ചർച്ചയായത്. തുർക്കിയിലെ സുറിയാനി ഓർത്തഡോക്സ് ഭദ്രാസനങ്ങളുടെ മെത്രാപ്പോലീത്തന്മാരും സഭാ കൗൺസിൽ ഭാരവാഹികളും ഉൾപ്പെട്ട പ്രതിനിധി സംഘത്തോടൊപ്പമാണ് പരിശുദ്ധ ബാവ സന്ദർശനം നടത്തിയത്.
കൂടിക്കാഴ്ചയിൽ, സുറിയാനി ഓർത്തഡോക്സ് സഭയുടെ ആവശ്യങ്ങളോടും പ്രവർത്തനങ്ങളോടും കാണിച്ച പിന്തുണയ്ക്കും പരിഗണനയ്ക്കും പരിശുദ്ധ പാത്രിയർക്കീസ് ബാവ പ്രസിഡന്റ് എർദോഗാനോട് നന്ദി രേഖപ്പെടുത്തി. സഭയുടെ ചരിത്രപൈതൃക സ്വത്തായ മോർ ഗബ്രിയേൽ ദയറയുടെ ഭൂമികൾ തിരിച്ചുപിടിക്കുന്നതിനായി സർക്കാർ സ്വീകരിച്ച നടപടികളെയും ഇസ്താംബൂളിലെ മോർ അഫ്രേം ദൈവാലയത്തിന്റെ നിർമ്മാണത്തിനും സമർപ്പണത്തിനും നൽകിയ പിന്തുണയെയും പരിശുദ്ധ ബാവ പ്രത്യേകം അഭിനന്ദിച്ചു.
മതപരവും സാംസ്കാരികവുമായ പൈതൃകങ്ങളുടെ സംരക്ഷണത്തിന്റെ പ്രാധാന്യവും സമൂഹത്തിലെ വിവിധ വിഭാഗങ്ങൾക്കിടയിൽ പരസ്പര ധാരണയും സഹകരണവും വളർത്തിയെടുക്കേണ്ടതിന്റെ ആവശ്യകതയും ഇരു നേതാക്കളും ചർച്ച ചെയ്തു.
തുർക്കിയിലെ സഭയെയും അതിന്റെ സ്ഥാപനങ്ങളെയും വിശ്വാസി സമൂഹത്തെയും ബാധിക്കുന്ന വിഷയങ്ങളിൽ ഭാവിയിലും സഹകരണവും ആശയവിനിമയവും തുടരേണ്ടതിന്റെ ആവശ്യകതയും കൂടിക്കാഴ്ചയിൽ ഇരുപക്ഷവും ഊന്നിപ്പറഞ്ഞു.
Comments (0)