ബഹ്റൈൻ ● ബഹ്റൈൻ സെന്റ് പീറ്റേഴ്സ് യാക്കോബായ സുറിയാനി ഓർത്തഡോക്സ് പള്ളിയുടെ വനിതാ സമാജത്തിന്റെ നേതൃത്വത്തിൽ സംഘടിപ്പിച്ച മുടി ദാന പദ്ധതി ശ്രദ്ധേയമായി. ക്യാൻസർ ചികിത്സയെ തുടർന്ന് മുടി നഷ്ടപ്പെടുന്ന രോഗികൾക്ക് ആത്മവിശ്വാസവും പ്രത്യാശയും പകരുക എന്ന ലക്ഷ്യത്തോടെ നടന്ന പദ്ധതിയിൽ കുഞ്ഞുങ്ങൾ ഉൾപ്പെടെ ഇടവകയിലെ 10 പേരാണ് പങ്കെടുത്തത്.
ദാനം ചെയ്ത മുടി വിഗ് നിർമാണത്തിനായി ബന്ധപ്പെട്ട കാൻസർ കെയർ സെന്ററിന് കൈമാറി. പദ്ധതിയിൽ പങ്കെടുത്ത എല്ലാവരെയും വികാരി ബഹുമാനപെട്ട സ്ലീബാ പോൾ വട്ടവേലി കോർഎപ്പിസ്കോപ്പ സർട്ടിഫിക്കറ്റുകൾ നൽകി ആദരിക്കുകയും ചെയ്തു.
സ്വന്തം മുടിയുടെ ഒരു ഭാഗം മറ്റൊരാളുടെ ആത്മവിശ്വാസത്തിനും ജീവിതത്തിലെ പ്രത്യാശയ്ക്കുമായി സമർപ്പിച്ച ദാതാക്കളെ ഇടവക പ്രത്യേകം അഭിനന്ദിച്ചു. കാരുണ്യത്തിന്റെയും സാമൂഹിക പ്രതിബദ്ധതയുടെയും മികച്ച മാതൃകയായി ഈ സംരംഭം മാറിയതായി സംഘാടകർ അറിയിച്ചു.
“ഒരാളുടെ പുഞ്ചിരിക്കായി ചെയ്യുന്ന ചെറിയ ത്യാഗങ്ങൾ പോലും മറ്റൊരാളുടെ ജീവിതത്തിൽ വലിയ പ്രത്യാശയായി മാറുന്നു” എന്ന സന്ദേശമാണ് പരിപാടിയിലൂടെ ഉയർന്നുവന്നത്. വനിതാ സമാജത്തിന്റെ നേതൃത്വത്തിൽ നടപ്പാക്കിയ ഈ പ്രവർത്തനം വിശ്വാസിസമൂഹത്തിന്റെ വ്യാപകമായ പ്രശംസ നേടി.
Comments (0)