പരസ്പരം പാലിയേറ്റീവ് കെയർ യൂണിറ്റിന്റെ ഒന്നാം വാർഷികം; ഡയാലിസിസ് സഹായ പദ്ധതിയും ഭവനനിർമാണ പദ്ധതിയും ആരംഭിച്ചു

മണ്ണത്തൂർ ● കണ്ടനാട് ഭദ്രാസനത്തിലെ നാവോളിമറ്റം നെല്ലിക്കുന്നിൽ സെന്റ് ജോൺസ് ഹെർമോൺ യാക്കോബായ സുറിയാനി പള്ളിയുടെ നേതൃത്വത്തിൽ പ്രവർത്തിക്കുന്ന ‘പരസ്പരം-2025’ പാലിയേറ്റീവ് കെയർ യൂണിറ്റിന്റെ ഒന്നാം വാർഷികവും അനുമോദന സമ്മേളനവും വിവിധ സാമൂഹ്യസേവന പദ്ധതികളുടെ ഉദ്ഘാടനത്തോടുകൂടി സംഘടിപ്പിച്ചു. സംസ്ഥാന ഭക്ഷ്യ, സിവിൽ സപ്ലൈസ്, ഉപഭോക്തൃകാര്യ വകുപ്പ് മന്ത്രി അഡ്വ. അനൂപ് ജേക്കബ് സമ്മേളനം ഉദ്ഘാടനം ചെയ്തു. ചടങ്ങിൽ 20 വൃക്കരോഗികൾക്ക് ഒരു വർഷത്തേക്ക് പ്രതിമാസ ഡയാലിസിസ് ചികിത്സാ സഹായം ലഭ്യമാക്കുന്ന പദ്ധതിക്ക് തുടക്കമായി. കൂടാതെ പള്ളിയുടെ നേതൃത്വത്തിൽ ചിറ്റിലപ്പിള്ളി ഫൗണ്ടേഷന്റെയും ലയൺസ് ക്ലബ് പാമ്പാക്കുടയുടെയും സഹകരണത്തോടെ നിർമ്മിക്കുന്ന ഭവന പദ്ധതിയുടെ ആദ്യ ഗഡു വിതരണവും മന്ത്രി നിർവഹിച്ചു. കഴിഞ്ഞ ഒരു വർഷക്കാലമായി പാലിയേറ്റീവ് പ്രവർത്തനങ്ങളുമായി സഹകരിച്ച ഡോക്ടർമാരെയും സന്നദ്ധ പ്രവർത്തകരെയും ചടങ്ങിൽ ആദരിച്ചു. യൂണിറ്റിന്റെ വാർഷിക പ്രവർത്തന റിപ്പോർട്ടും ഭാവി പ്രവർത്തന പദ്ധതികളും അവതരിപ്പിച്ചു. സമീപകാലത്ത് മന്ത്രിസ്ഥാനം ഏറ്റെടുത്ത അഡ്വ. അനൂപ് ജേക്കബിന് ഇടവകയുടെ ആഭിമുഖ്യത്തിൽ പ്രത്യേക അനുമോദനവും നൽകി. ഇടവക വികാരി ഫാ. ഡോ. ബോബി തറയാനിയിൽ അധ്യക്ഷത വഹിച്ചു. തിരുമാറാടി ഗ്രാമപഞ്ചായത്ത് പ്രസിഡന്റ് ജോൺസൺ വർഗീസ്, റവ. ഫാ. തോമസ് കാക്കൂർ, ബ്ലോക്ക് പഞ്ചായത്ത് അംഗം ദീപ എബി, പഞ്ചായത്ത് അംഗങ്ങളായ മഞ്ജുഷ, അനിതാ ബേബി, ഡോ. സിസ്റ്റർ അൽഫോൻസ്, പള്ളി ട്രസ്റ്റിമാരായ എം.സി. ബെന്നി, കെ.ജെ. തോമസ്, സതീഷ് സ്കറിയ, ബിന്ദു അലക്സ് എന്നിവർ ആശംസകൾ നേർന്നു. ചടങ്ങിനോടനുബന്ധിച്ച് പ്രശസ്ത കലാകാരൻ കൂത്താട്ടുകുളം ജയരാജിനെ ആദരിക്കുകയും അദ്ദേഹം മോട്ടിവേഷൻ ക്ലാസ് നയിക്കുകയും ചെയ്തു. രോഗികൾക്കും അവരുടെ കുടുംബങ്ങൾക്കും ആശ്വാസവും പിന്തുണയും പകരുന്ന സേവന പ്രവർത്തനങ്ങളിലൂടെ ‘പരസ്പരം-2025’ പാലിയേറ്റീവ് കെയർ യൂണിറ്റ് ഒരു വർഷത്തിനിടെ ശ്രദ്ധേയമായ സാമൂഹിക ഇടപെടലാണ് നടത്തിവരുന്നതെന്ന് ഭാരവാഹികൾ അറിയിച്ചു.

Comments (0)

Related Stories