അച്ചാനെ (ലെബനൻ) ● ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവയും, അന്ത്യോഖ്യയിലെ സുറിയാനി കത്തോലിക്കാ സഭയുടെ പാത്രിയർക്കീസ് അഭിവന്ദ്യ മോർ ഇഗ്നാത്തിയോസ് യൂസഫ് തൃതീയൻ യൂനാനും തമ്മിൽ അച്ചാനെയിലെ പാത്രിയർക്കൽ വസതിയിൽ സൗഹൃദ കൂടിക്കാഴ്ച നടത്തി.
പരിശുദ്ധ സുറിയാനി കത്തോലിക്കാ പാത്രിയർക്കീസിനെ പാത്രിയർക്കൽ സെക്രട്ടറിയായ മോൺസിഞ്ഞോർ ഖൂറെപ്പിസ്കോപ്പ ഹബീബ് മ്രാദും ഫാ. കരീം കലാഷും അനുഗമിച്ചു. കൂടിക്കാഴ്ചയിൽ പരിശുദ്ധ പാത്രിയർക്കീസ് ബാവയുടെ ഉപദേഷ്ടാവായ അഭിവന്ദ്യ മോർ തെയോഫിലോസ് ജോർജ് സലീബ മെത്രാപ്പോലീത്ത, അച്ചാനെയിലെ പാത്രിയർക്കൽ ചാരിറ്റബിൾ സ്ഥാപനങ്ങളുടെ വികാരിയായ അഭിവന്ദ്യ മോർ സിറിൽ ബാബി മെത്രാപ്പോലീത്ത, പാത്രിയർക്കൽ അസിസ്റ്റന്റായ അഭിവന്ദ്യ മോർ യൗസഫ് ബാലി മെത്രാപ്പോലീത്ത എന്നിവരും സന്നിഹിതരായിരുന്നു.
കൂടിക്കാഴ്ചയിൽ ഇരുസഭകളുമായി ബന്ധപ്പെട്ട വിവിധ വിഷയങ്ങളും മധ്യപൂർവദേശത്തെ ക്രൈസ്തവ സമൂഹം അഭിമുഖീകരിക്കുന്ന നിലവിലെ സാഹചര്യങ്ങളും വെല്ലുവിളികളും സംബന്ധിച്ച് ഇരു പാത്രിയർക്കീസുമാരും ചർച്ച നടത്തി. പരസ്പര സാഹോദര്യവും ക്രൈസ്തവ ഐക്യവും ശക്തിപ്പെടുത്തേണ്ടതിന്റെ ആവശ്യകതയും കൂടിക്കാഴ്ചയിൽ വിലയിരുത്തപ്പെട്ടു.
Comments (0)