കുറിച്ചി ● മലബാർ ഡൽഹി ഭദ്രാസനങ്ങളുടെ മുൻ മെത്രാപ്പോലീത്ത പുണ്യശ്ലോകനായ സഖറിയാസ് മോർ പോളികാർപ്പോസ് തിരുമേനിയുടെ നാലാം ശ്രാദ്ധപ്പെരുന്നാൾ കോട്ടയം കുറിച്ചി സെന്റ് മേരീസ് യാക്കോബായ സുറിയാനി സൂനോറോ പുത്തൻപള്ളിയിൽ ഭക്തിനിർഭരമായി ആചരിച്ചു.
പെരുന്നാൾ ശുശ്രൂഷകൾക്ക് മുന്നോടിയായി നടന്ന സന്ധ്യാ നമസ്കാരത്തിന് മൈലാപ്പൂർ–ബാംഗ്ലൂർ ഭദ്രാസന മെത്രാപ്പോലീത്ത അഭിവന്ദ്യ മോർ ഒസ്താത്തിയോസ് ഐസക് തിരുമേനി മുഖ്യകാർമ്മികത്വം വഹിച്ചു.
പ്രധാന പെരുന്നാൾ ദിനമായ ഇന്ന് (21 ജൂൺ) രാവിലെ 7 മണിക്ക് പ്രഭാത നമസ്കാരവും തുടർന്ന് രാവിലെ 8 മണിക്ക് വിശുദ്ധ മൂന്നിന്മേൽ കുർബാനയും നടന്നു. മലങ്കര യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്കാ ബാവ വിശുദ്ധ കുർബാനയ്ക്ക് മുഖ്യകാർമ്മികത്വം വഹിച്ചു. റവ. ഫാ. വർഗീസ് പനിച്ചയിൽ കശീശയും റവ. ഫാ. എൽദോസ് വേങ്കടത്ത് കശീശയും സഹകാർമ്മികരായിരുന്നു.
കോട്ടയം, മലബാർ, നിരണം ഭദ്രാസനങ്ങളിൽ നിന്നുള്ള അനേകം വൈദികരുടെ സാന്നിധ്യവും ക്നാനായ ഭദ്രാസനത്തിന്റെ റാന്നി പുറത്തുള്ള മേഖലയുടെ മെത്രാപ്പോലീത്ത അഭിവന്ദ്യ കുര്യാക്കോസ് മോർ ഈവാനിയോസ് തിരുമേനിയുടെ സാന്നിധ്യവും ചടങ്ങിന് ആത്മീയ ഭംഗി പകർന്നു.
അനുസ്മരണ സന്ദേശത്തിൽ ശ്രേഷ്ഠ കാതോലിക്കാ ബാവ, സഖറിയാസ് മോർ പോളികാർപ്പോസ് തിരുമേനിയെ സത്യവിശ്വാസത്തിന്റെ ധീര പോരാളിയും ജനഹൃദയങ്ങളോട് ചേർന്ന് നിന്ന സ്നേഹസമ്പന്നനായ ഇടയനുമായാണ് അനുസ്മരിച്ചത്. അഭിവന്ദ്യ കുര്യാക്കോസ് മോർ ഈവാനിയോസ് തിരുമേനിയും തന്റെ സന്ദേശത്തിൽ പരിശുദ്ധ അന്ത്യോഖ്യാ സിംഹാസനത്തോടുള്ള അചഞ്ചലമായ വിധേയത്വവും സഭയ്ക്കുവേണ്ടിയുള്ള അക്ഷീണമായ പ്രവർത്തനങ്ങളും ഓർമ്മപ്പെടുത്തി.
വിശുദ്ധ കുർബാനയ്ക്കുശേഷം പ്രദക്ഷിണം, കബറിങ്കൽ ധൂപപ്രാർത്ഥന, നേർച്ച വിതരണം എന്നിവ നടന്നു. തുടർന്ന് നടന്ന അനുസ്മരണ സമ്മേളനത്തിൽ ഇടവകയിലെ ഭക്തസംഘടനകൾ ശ്രേഷ്ഠ കാതോലിക്കാ ബാവയെ ആദരിച്ചു. ചങ്ങനാശ്ശേരി എം.എൽ.എ ശ്രീ. വിനുജോബ് സമ്മേളനത്തെ അഭിസംബോധന ചെയ്തു.
ആശീർവാദം, നേർച്ചസദ്യ, മറ്റ് പെരുന്നാൾ ശുശ്രൂഷകൾ എന്നിവയോടെ ഭക്തിനിർഭരമായ അന്തരീക്ഷത്തിൽ നാലാം ശ്രാദ്ധപ്പെരുന്നാൾ സമാപിച്ചു.
Comments (0)