കുറിച്ചി ● മലബാർ, ഡൽഹി ഭദ്രാസനങ്ങളുടെ മുൻ മെത്രാപ്പോലീത്തയായിരുന്ന ഭാഗ്യസ്മരണാർഹനായ സഖറിയാസ് മോർ പോളികാർപ്പോസ് മെത്രാപ്പോലീത്തയുടെ നാലാമത് ശ്രാദ്ധപ്പെരുന്നാൾ കുറിച്ചി സെന്റ് മേരീസ് യാക്കോബായ സുറിയാനി സൂനോറോ പുത്തൻപള്ളിയിൽ ജൂൺ 20, 21 തീയതികളിൽ ഭക്തിപൂർവ്വം ആചരിക്കും. ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്കാ ബാവ മുഖ്യ കാർമ്മികനായി ചടങ്ങുകൾക്ക് നേതൃത്വം നൽകും.
ശ്രാദ്ധപ്പെരുന്നാളിനോടനുബന്ധിച്ചുള്ള കൊടിയേറ്റ ചടങ്ങുകൾ നേരത്തെ നടന്നു. പങ്ങട സെന്റ് മേരീസ് പള്ളിയിലെ പുണ്യശ്ലോകനായ മാർക്കോസ് മോർ കൂറിലോസ് തിരുമേനിയുടെ കബറിങ്കൽ നിന്നുമാണ് പതാക പ്രാർത്ഥനാപൂർവ്വം സ്വീകരിച്ചത്. തുടർന്ന് വിവിധ ദൈവാലയങ്ങളിലെ സ്വീകരണങ്ങൾ ഏറ്റുവാങ്ങിയ ഘോഷയാത്ര കുറിച്ചി പുത്തൻപള്ളിയിലെത്തി. കബറിങ്കൽ ധൂപപ്രാർത്ഥന, കൊടിയേറ്റ്, സന്ധ്യാനമസ്കാരം എന്നിവയോടെയാണ് ആദ്യ ദിവസത്തെ ചടങ്ങുകൾ സമാപിച്ചത്.
സൂനോറോ സ്ഥാപന പെരുന്നാളിന്റെ ഭാഗമായി നടന്ന വിശുദ്ധ കുർബ്ബാനയ്ക്ക് അഭിവന്ദ്യ ഐസക് മോർ ഒസ്താത്തിയോസ് മെത്രാപ്പോലീത്ത മുഖ്യ കാർമ്മികത്വം വഹിച്ചു.
ജൂൺ 20 ശനിയാഴ്ച രാവിലെ വിശുദ്ധ കുർബ്ബാനയും വൈകിട്ട് അഭിവന്ദ്യ ഐസക് മോർ ഒസ്താത്തിയോസ് മെത്രാപ്പോലീത്തയുടെ മുഖ്യ കാർമ്മികത്വത്തിൽ സന്ധ്യാ നമസ്കാരവും നടക്കും. തുടർന്ന് അനുസ്മരണ സമ്മേളനം, കബറിങ്കൽ ധൂപപ്രാർത്ഥന എന്നിവ ക്രമീകരിച്ചിരിക്കുന്നു.
ജൂൺ 21 ഞായറാഴ്ച രാവിലെ ശ്രേഷ്ഠ കാതോലിക്കാ ബാവയ്ക്ക് സ്വീകരണം നൽകും. തുടർന്ന് പ്രഭാത നമസ്കാരവും, ശ്രേഷ്ഠ ബാവയുടെ പ്രധാന കാർമ്മികത്വത്തിൽ വിശുദ്ധ മൂന്നിന്മേൽ കുർബ്ബാനയും നടക്കും. റവ. ഫാ. വർഗീസ് പനിച്ചയിൽ, റവ. ഫാ. എൽദോ വേങ്കടത്ത് എന്നിവർ സഹകാർമ്മികരായിരിക്കും.
തുടർന്ന് നടക്കുന്ന അനുസ്മരണ സമ്മേളനത്തിൽ ശ്രേഷ്ഠ കാതോലിക്കാ ബാവ അനുഗ്രഹ പ്രഭാഷണം നടത്തും. അഭിവന്ദ്യ കുര്യാക്കോസ് മോർ ഈവാനിയോസ് മെത്രാപ്പോലീത്ത അനുസ്മരണ സന്ദേശം നൽകും. വികാരി ഫാ. വിജി കുരുവിള എടാട്ട് സ്വാഗതവും ഫാ. ഫിലിപ്പ് വൈദ്യൻ അധ്യക്ഷതാ പ്രസംഗവും നിർവഹിക്കും.
ആശീർവാദം, കൈമുത്ത്, നേർച്ചസദ്യ, കൊടിയിറക്ക് എന്നിവയോടെ ശ്രാദ്ധപ്പെരുന്നാൾ ചടങ്ങുകൾ സമാപിക്കും. സഖറിയാസ് മോർ പോളികാർപ്പോസ് തിരുമേനിയുടെ പുണ്യസ്മരണയിൽ നൂറുകണക്കിന് വിശ്വാസികൾ പങ്കുചേരുമെന്ന് സംഘാടകർ അറിയിച്ചു.
Comments (0)