വെരി. റവ. ഡോ. സി.എം. മാർക്കോസ് കൊച്ചേരിൽ കോർഎപ്പിസ്കോപ്പയുടെ സംസ്കാര ശുശ്രൂഷ തിങ്കളാഴ്ച

ന്യൂഡൽഹി ● മലങ്കര യാക്കോബായ സുറിയാനി ഓർത്തഡോക്സ് സഭയുടെ ഡൽഹി ഭദ്രാസനത്തിലെ സീനിയർ വൈദീകനും, വിശ്വാസ സമൂഹത്തിന്റെ ആത്മീയ വളർച്ചയ്ക്കായി ദീർഘകാലം സേവനം അനുഷ്ഠിച്ചിരുന്ന വെരി. റവ. ഡോ. സി.എം. മാർക്കോസ് കൊച്ചേരിൽ കോർഎപ്പിസ്കോപ്പ (65) കർത്താവിൽ നിദ്ര പ്രാപിച്ചു. വന്ദ്യ ആചാര്യന്റെ ഭൗതികശരീരം ജൂൺ 21 ഞായറാഴ്ച രാവിലെ 10.30-ന് കോട്ടയം കാരിത്താസ് ആശുപത്രി മോർച്ചറി ഹാളിലേക്ക് കൊണ്ടുവരും. തുടർന്ന് ഉച്ചയ്ക്ക് 2 മണിക്ക് മൂവാറ്റുപുഴയ്ക്കടുത്തുള്ള മേക്കടമ്പിലെ കൊച്ചേരിൽ ഭവനത്തിലേക്ക് വിലാപയാത്രയായി കൊണ്ടുപോകും. സംസ്കാര ശുശ്രൂഷകൾ ജൂൺ 22 തിങ്കളാഴ്ച രാവിലെ 9 മണിക്ക് ഭവനത്തിൽ ആരംഭിക്കും. തുടർന്ന് മേക്കടമ്പ് മോർ ഇഗ്നാത്തിയോസ് യാക്കോബായ സുറിയാനി പള്ളിയിൽ പൊതുദർശനം, പ്രാർത്ഥനാ ശുശ്രൂഷകൾ എന്നിവയ്ക്കുശേഷം കബറടക്ക ശുശ്രൂഷകൾ നടക്കും. 1979-ൽ ശെമ്മാശപട്ടം സ്വീകരിച്ച വന്ദ്യ അച്ചൻ പിന്നീട് വൈദീക ശുശ്രൂഷയിലേക്ക് പ്രവേശിച്ചു. പരിശുദ്ധ സഭയിലെ വിവിധ ആത്മീയ ഉത്തരവാദിത്വങ്ങൾ നിറവേറ്റിയ അദ്ദേഹം 2011-ൽ ശ്രേഷ്ഠ കാതോലിക്കാ ആബൂൻ മോർ ബസേലിയോസ് തോമസ് പ്രഥമൻ ബാവയിൽ നിന്ന് കോർഎപ്പിസ്കോപ്പ സ്ഥാനം സ്വീകരിച്ചു. മേക്കടമ്പ് മോർ ഇഗ്നാത്തിയോസ് യാക്കോബായ സുറിയാനി പള്ളി ഇടവകാംഗമായ വന്ദ്യ അച്ചൻ ചണ്ഡീഗഡ് സെന്റ് ജോർജ്, ഫരീദാബാദ് സെന്റ് ജോർജ്, ന്യൂഡൽഹി സെന്റ് പീറ്റേഴ്സ് പാത്രിയർക്കൽ കത്തീഡ്രൽ, അമേരിക്കയിലെ ചിക്കാഗോ സെന്റ് ജോർജ്, ഖത്തറിലെ ദോഹ സെന്റ് ജെയിംസ്, ഡൽഹി സെന്റ് തോമസ്, ദിൽഷാദ് ഗാർഡൻ സെന്റ് മേരീസ്, ഛത്തർപൂർ മോർ ഗ്രിഗോറിയോസ് തുടങ്ങിയ ദൈവാലയങ്ങളിൽ വികാരിയായി ശ്രദ്ധേയമായ ശുശ്രൂഷകൾ നിർവഹിച്ചു. നിരവധി ദൈവാലയങ്ങളുടെ നിർമ്മാണ പ്രവർത്തനങ്ങൾക്ക് നേതൃത്വം നൽകിയ അദ്ദേഹം വിദ്യാഭ്യാസ, സാമൂഹിക മേഖലകളിലും സജീവ സാന്നിധ്യമായിരുന്നു. ന്യൂഡൽഹിയിലെ സോഫിയ സ്കൂളിന്റെ വൈസ് പ്രിൻസിപ്പലായും, പ്രമുഖ ഇംഗ്ലീഷ് ദിനപത്രമായ ഹിന്ദുസ്ഥാൻ ടൈംസ് പബ്ലിക് റിലേഷൻസ് ഓഫീസറായും, റിയ ട്രാവൽസിന്റെ മാനേജരായും സേവനം അനുഷ്ഠിച്ചിട്ടുണ്ട്. ഭാര്യ: പുതുശ്ശേരിമല ആശാരിത്തുണ്ടിൽ അന്നമ്മ മാർക്കോസ്. മക്കൾ: അഡ്വ. നിധി മാർക്കോസ്, ഡീക്കൻ നോഹ മാർക്കോസ് (ഡൽഹി ഭദ്രാസനം). മരുമകൻ: തെക്കേപ്പറമ്പിൽ ആശിഷ് മാത്യു. ഡൽഹി ഭദ്രാസനത്തിന്റെയും ആഗോള യാക്കോബായ വിശ്വാസ സമൂഹത്തിന്റെയും ആത്മീയ ജീവിതത്തിൽ വിലപ്പെട്ട സംഭാവനകൾ നൽകിയ വന്ദ്യ ഡോ. സി.എം. മാർക്കോസ് കൊച്ചേരിൽ കോർഎപ്പിസ്കോപ്പയുടെ വേർപാട് സഭയ്ക്ക് തീരാനഷ്ടമായി. അദ്ദേഹത്തിന്റെ സ്മരണയ്ക്ക് ജേക്കബൈറ്റ് ഓൺലൈൻ ടീമിന്റെ പ്രാർത്ഥനാപൂർവ്വമായ ആദരാഞ്ജലികൾ.

Comments (0)

Related Stories