ഡമാസ്കസിലെ പുതിയ വത്തിക്കാൻ സ്ഥാനപതി പരിശുദ്ധ പാത്രിയർക്കീസ് ബാവയെ സന്ദർശിച്ചു

ഡമാസ്കസ് (സിറിയ) ● ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവയെ, ഡമാസ്കസിലെ പുതിയ അപ്പസ്തോലിക നുൺഷ്യോയും വത്തിക്കാൻ സ്ഥാനപതിയുമായ മോൺസിഞ്ഞോർ ലുയിജി റോബർട്ടോ കോന സന്ദർശിച്ചു. ജൂൺ 15-ന് ഡമാസ്കസിലെ ബാബ് തൂമയിലെ പാത്രിയർക്കൽ ആസ്ഥാനത്തായിരുന്നു കൂടിക്കാഴ്ച. വത്തിക്കാൻ സ്ഥാനപതിക്കൊപ്പം കോൺസൽ ജനറലായ മോൺസിഞ്ഞോർ വിക്ടർ ഹ്യൂഗോ വില്ലത്തോറോയും സന്ദർശനത്തിൽ പങ്കെടുത്തു. കൂടിക്കാഴ്ചയിൽ പാത്രിയർക്കൽ അസിസ്റ്റന്റ് അഭിവന്ദ്യ മോർ യൗസഫ് ബാലി മെത്രാപ്പോലീത്ത, യുവജന-ക്രൈസ്തവ വിദ്യാഭ്യാസകാര്യങ്ങളുടെ പാത്രിയർക്കൽ വികാരി അഭിവന്ദ്യ മോർ അന്ത്രായോസ് ബാഹി മെത്രാപ്പോലീത്ത, പാത്രിയർക്കൽ സെക്രട്ടറി അഭിവന്ദ്യ മോർ ഔഗീൻ അൽ-ഖൂരി നെമത്ത് മെത്രാപ്പോലീത്ത എന്നിവരും സന്നിഹിതരായിരുന്നു. സിറിയയിൽ അടുത്തിടെ ആരംഭിച്ച തന്റെ നയതന്ത്ര ദൗത്യത്തിന്റെ ഭാഗമായി എത്തിയ മോൺസിഞ്ഞോർ ലുയിജി റോബർട്ടോ കോനയെ പരിശുദ്ധ പാത്രിയർക്കീസ് ബാവ ഹൃദയപൂർവം സ്വാഗതം ചെയ്തു. അദ്ദേഹത്തിന്റെ ദൗത്യം ദൈവാനുഗ്രഹത്താൽ സമൃദ്ധവും വിജയകരവുമാകട്ടെയെന്ന് ആശംസിക്കുകയും ചെയ്തു. കൂടിക്കാഴ്ചയിൽ സിറിയയിലെ നിലവിലെ സാമൂഹിക-രാഷ്ട്രീയ സാഹചര്യങ്ങളും സമീപകാല സംഭവവികാസങ്ങളുടെ പശ്ചാത്തലത്തിൽ രാജ്യവും അവിടുത്തെ ക്രൈസ്തവ സമൂഹവും അഭിമുഖീകരിക്കുന്ന വെല്ലുവിളികളും ഭാവി പ്രതീക്ഷകളും സംബന്ധിച്ച് വിശദമായ ചർച്ചകൾ നടന്നു.

Comments (0)

Related Stories