മണർകാട് കത്തീഡ്രലിന്റെ പുതിയ വികാരിയായി വെരി. റവ. കെ. കുര്യാക്കോസ് കോർ എപ്പിസ്കോപ്പ കിഴക്കേടത്ത്

മണർകാട് ● ആഗോള മരിയൻ തീർത്ഥാടന കേന്ദ്രവും ദൈവമാതാവിന്റെ ഭൂമിയിലെ കൊട്ടാരമായി വിശേഷിപ്പിക്കപ്പെടുന്നതുമായ മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രലിന്റെ പുതിയ വികാരിയായി വെരി. റവ. കെ. കുര്യാക്കോസ് കോർ എപ്പിസ്കോപ്പ കിഴക്കേടത്ത് നിയമിതനായി. ദീർഘകാലം കത്തീഡ്രലിന്റെ ആത്മീയ നേതൃത്വത്തിൽ നിറഞ്ഞുനിന്ന വെരി. റവ. ഇ. ടി. കുര്യാക്കോസ് ഇട്ട്യാടത്ത് കോർ എപ്പിസ്കോപ്പായുടെ നിര്യാണത്തെ തുടർന്നാണ് പുതിയ നിയമനം.

1940 നവംബർ 25-ന് മണർകാട് മലങ്കരയിൽ കിഴക്കേടത്ത് ശ്രീ. കോര എബ്രഹാമിന്റെയും ശ്രീമതി ശോശാമ്മ എബ്രഹാമിന്റെയും മകനായി ജനിച്ച വന്ദ്യ ആചാര്യൻ, മണർകാട് ഗവൺമെന്റ് യു.പി. സ്കൂൾ, മണർകാട് സെന്റ് മേരീസ് ഹൈസ്കൂൾ, പത്തനംതിട്ട കാതോലിക്കേറ്റ് കോളേജ് എന്നിവിടങ്ങളിലായി വിദ്യാഭ്യാസം പൂർത്തിയാക്കി. 1960-ൽ മഞ്ഞിനിക്കര മോർ ഇഗ്നാത്തിയോസ് ദയറായിൽ വൈദിക പഠനത്തിനായി ചേർന്ന അദ്ദേഹം, 1964-ൽ വൈദിക വിദ്യാഭ്യാസം പൂർത്തിയാക്കി. അതേ വർഷം ഫെബ്രുവരി 17-ന് കോട്ടയം ഭദ്രാസന മെത്രാപ്പോലീത്തയായിരുന്ന അഭിവന്ദ്യ പൗലോസ് മോർ പീലക്‌സിനോസ് തിരുമേനിയിൽ നിന്ന് കോറൂയോ സ്ഥാനം സ്വീകരിച്ചു.

1967 ഫെബ്രുവരി 2-ന് പൂർണ്ണ ശെമ്മാശ പട്ടവും, അതേ വർഷം ഫെബ്രുവരി 25-ന് കശ്ശീശാ പട്ടവും സ്വീകരിച്ച അദ്ദേഹം മണർകാട് സെന്റ് മേരീസ് കത്തീഡ്രലിൽ സഹവികാരിയായി ശുശ്രൂഷ ആരംഭിച്ചു. പിന്നീട് വിവിധ ഇടവകകളിൽ വികാരിയായി സേവനം അനുഷ്ഠിച്ച അദ്ദേഹം, 2000 മുതൽ കോട്ടയം ഭദ്രാസന മെത്രാപ്പോലീത്തയായിരുന്ന അഭിവന്ദ്യ തോമസ് മോർ തീമോത്തിയോസ് മെത്രാപ്പോലീത്തയുടെ പേഴ്സണൽ സെക്രട്ടറിയായും സേവനമനുഷ്ഠിച്ചു. 2001 ജനുവരി 21-ന് മണർകാട് കത്തീഡ്രലിൽ വച്ച് തോമസ് മോർ തീമോത്തിയോസ് മെത്രാപ്പോലീത്തയുടെ തൃക്കരങ്ങളാൽ കോർ എപ്പിസ്കോപ്പ സ്ഥാനത്തേക്ക് ഉയർത്തപ്പെട്ടു.

2002 മുതൽ ദീർഘകാലം കോട്ടയം ഭദ്രാസന സെക്രട്ടറിയായും പ്രവർത്തിച്ച വന്ദ്യ ആചാര്യൻ, വെള്ളൂർ സെന്റ് സൈമൺസ്, കാരാട്ടുകുന്ന് സെന്റ് മേരീസ്, നട്ടാശ്ശേരി സെന്റ് ജോർജ്, ചെങ്ങളും സെന്റ് തോമസ്, പാറമ്പുഴ സെന്റ് ജോൺസ്, പാമ്പാടി ഈസ്റ്റ് മർത്തമറിയം ചെറിയപള്ളി, കുറിച്ചി സെന്റ് മേരീസ് സുനോറോ, നീലിമംഗലം സെന്റ് മേരീസ്, മീനടം സെന്റ് ജോൺസ്, അരിപ്പറമ്പ് സെന്റ് മേരീസ് തുടങ്ങിയ നിരവധി ദൈവാലയങ്ങളിൽ വികാരിയായി സ്തുത്യർഹമായ സേവനം നിർവഹിച്ചു.

ഇടവക ശുശ്രൂഷകൾക്കപ്പുറം മണർകാട് കത്തീഡ്രലിന് കീഴിലുള്ള സെന്റ് മേരീസ് ആശുപത്രിയുടെ പ്രസിഡന്റ്, സെന്റ് മേരീസ് ഐ.ടി.സി. മാനേജർ, സൺഡേ സ്കൂൾ ഇൻസ്പെക്ടർ, വനിതാ സമാജം പ്രസിഡന്റ്, സേവക സംഘം പ്രസിഡന്റ്, ശുശ്രൂഷക സംഘം പ്രസിഡന്റ്, ഹെയിൽ മേരി ലീഗ് വൈസ് പ്രസിഡന്റ്, പ്രോഗ്രാം കോർഡിനേറ്റർ തുടങ്ങിയ വിവിധ മേഖലകളിൽ അദ്ദേഹം നേതൃത്വം നൽകി.

ദീർഘകാലത്തെ വൈദിക പരിചയവും സഭാ പാരമ്പര്യങ്ങളോടുള്ള അചഞ്ചലമായ പ്രതിബദ്ധതയും ആത്മീയ നേതൃത്വവും കൈമുതലാക്കിയ വെരി. റവ. കെ. കുര്യാക്കോസ് കോർ എപ്പിസ്കോപ്പ കിഴക്കേടത്തിന്റെ നേതൃത്വത്തിൽ മണർകാട് കത്തീഡ്രൽ കൂടുതൽ ആത്മീയ വളർച്ചയിലേക്കും ശുശ്രൂഷാ സമൃദ്ധിയിലേക്കും മുന്നേറട്ടെയെന്ന പ്രാർത്ഥനയിലാണ് വിശ്വാസ സമൂഹം.