മഞ്ഞിനിക്കര ● മഞ്ഞിനിക്കര മോർ ഇഗ്നാത്തിയോസ് ദയറായുടെ മുൻ അധിപനും സിംഹാസനപ്പള്ളികളുടെ മെത്രാപ്പോലീത്തായുമായിരുന്ന പുണ്യശ്ലോകനായ മോർ ഒസ്താത്തിയോസ് ജോസഫ് ബെന്യാമിൻ തിരുമേനിയുടെ 22-ാം ഓർമ്മപ്പെരുന്നാൾ ഭക്തിസാന്ദ്രമായ ചടങ്ങുകളോടെ മഞ്ഞിനിക്കര മോർ ഇഗ്നാത്തിയോസ് ദയറായിൽ ആചരിച്ചു.
രാവിലെ 8 മണിക്ക് നടന്ന വിശുദ്ധ മൂന്നിന്മേൽ കുർബ്ബാനയ്ക്ക് മഞ്ഞിനിക്കര ദയറായുടെ അധിപനും സിംഹാസനപ്പള്ളികളുടെ മെത്രാപ്പോലീത്തായുമായ അഭിവന്ദ്യ മോർ അത്തനാസിയോസ് ഗീവർഗീസ് മെത്രാപ്പോലീത്ത മുഖ്യ കാർമ്മികത്വം വഹിച്ചു. ഫാ. റോബി ആര്യാട്ട്, ഫാ. എൽദോസ് വെള്ളരിങ്ങൽ എന്നിവർ സഹകാർമ്മികരായിരുന്നു. തുമ്പമൺ ഭദ്രാസനാധിപൻ അഭിവന്ദ്യ യൂഹാനോൻ മോർ മിലീത്തിയോസ് മെത്രാപ്പോലീത്ത ശുശ്രൂഷകളിൽ സന്നിഹിതനായി.
വിശുദ്ധ കുർബ്ബാനയ്ക്ക് ശേഷം പരിശുദ്ധ ഏലിയാസ് തൃതീയൻ പാത്രിയർക്കീസ് ബാവായുടെയും പുണ്യശ്ലോകരായ സഭാപിതാക്കന്മാരുടെയും കബറിങ്കലിൽ ധൂപപ്രാർത്ഥന നടത്തപ്പെട്ടു. തുടർന്ന് വിശ്വാസികൾക്കായി നേർച്ച വിതരണവും നടന്നു.
അന്ത്യോഖ്യാ സിംഹാസനത്തോടുള്ള അചഞ്ചലമായ വിശ്വാസത്തിന്റെയും സഭാ സംരക്ഷണത്തിനായി നടത്തിയ ത്യാഗപൂർണമായ പ്രവർത്തനങ്ങളുടെയും പേരിൽ ഇന്നും വിശ്വാസി സമൂഹം സ്മരിക്കുന്ന പുണ്യശ്ലോകനായ മോർ ഒസ്താത്തിയോസ് ജോസഫ് ബെന്യാമിൻ തിരുമേനിയുടെ പാവന സ്മരണയിൽ നൂറുകണക്കിന് വിശ്വാസികൾ പ്രാർത്ഥനകളോട് പങ്കുചേർന്നു .
Comments (0)