നാഷണൽ പ്രയർ ബ്രേക്ക്ഫാസ്റ്റിൽ പങ്കെടുക്കാൻ പരിശുദ്ധ പാത്രിയർക്കീസ് ബാവയ്ക്ക് ക്ഷണം

ദമസ്കസ് ● സുറിയാനി ഓർത്തഡോക്സ് സഭയുടെ പരമാധ്യക്ഷനും പരിശുദ്ധ അന്ത്യോഖ്യാ സിംഹാസനാധിപനുമായ പരിശുദ്ധ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവയ്ക്ക് നാഷണൽ പ്രയർ ബ്രേക്ക്ഫാസ്റ്റിൽ (National Prayer Breakfast) പങ്കെടുക്കുന്നതിനുള്ള ക്ഷണം ലഭിച്ചു. 2026 ജൂൺ 16-ന് ദമസ്കസിലെ ബാബ് തൗമയിലുള്ള പാത്രിയർക്കാ ആസ്ഥാനത്ത് എത്തിയ നാഷണൽ പ്രയർ ബ്രേക്ക്ഫാസ്റ്റ് പ്രസ്ഥാനത്തിന്റെ അന്തർദേശീയ പ്രതിനിധി സംഘമാണ് പരിശുദ്ധ ബാവയെ സന്ദർശിച്ച് ക്ഷണം കൈമാറിയത്. നാഷണൽ പ്രയർ ബ്രേക്ക്ഫാസ്റ്റിന്റെ അന്തർദേശീയ പ്രതിനിധി സംഘങ്ങളുടെ മാനേജിങ് ഡയറക്ടറും സംഘാടകനുമായ വാൻ വോങ്ങിന്റെ നേതൃത്വത്തിലായിരുന്നു സന്ദർശനം. സംഘത്തിൽ ടിം ലീ, സ്റ്റീവ് സവേലി, അയ്മാൻ അബ്ദൽനൂർ എന്നിവരും അംഗങ്ങളായിരുന്നു. സന്ദർശനത്തിനിടെ, നാഷണൽ പ്രയർ ബ്രേക്ക്ഫാസ്റ്റിന്റെ വരാനിരിക്കുന്ന സമ്മേളനത്തിൽ പങ്കെടുക്കുന്നതിനായി പരിശുദ്ധ പാത്രിയർക്കീസ് ബാവയെ സംഘം ഔദ്യോഗികമായി ക്ഷണിച്ചു. കൂടിക്കാഴ്ചയിൽ സിറിയയിലെ നിലവിലെ സാഹചര്യങ്ങളെക്കുറിച്ചും രാജ്യത്തിന്റെ പുനർനിർമ്മാണത്തിനും സമാധാനപൂർണമായ ഭാവി രൂപീകരണത്തിനുമായി ആവശ്യമായ വിവിധ ആശയങ്ങളും കാഴ്ചപ്പാടുകളും പരിശുദ്ധ ബാവ പ്രതിനിധി സംഘവുമായി പങ്കുവെച്ചു. യോഗത്തിൽ പാത്രിയർക്കൽ സഹായി മോർ യൗസേഫ് ബാലി മെത്രാപ്പോലീത്ത, യുവജന-ക്രിസ്തീയ വിദ്യാഭ്യാസകാര്യങ്ങളുടെ പാത്രിയർക്കൽ വികാരി മോർ ആൻഡ്രാവോസ് ബഹി മെത്രാപ്പോലീത്ത, പാത്രിയർക്കൽ സെക്രട്ടറി മോർ ഔഗീൻ അൽ-ഖൂരി നെയ്മത്ത് മെത്രാപ്പോലീത്ത എന്നിവരും സന്നിഹിതരായിരുന്നു. സൗഹൃദവും പരസ്പര സഹകരണവും ശക്തിപ്പെടുത്തുന്നതിന് വഴിയൊരുക്കിയ ഈ കൂടിക്കാഴ്ച സിറിയയുടെ ഭാവി വികസനത്തിനും ആഗോള ക്രൈസ്തവ സമൂഹത്തിന്റെ ഐക്യത്തിനും പ്രാർത്ഥനയുടെ പ്രാധാന്യം വീണ്ടും ഉയർത്തിക്കാട്ടുന്നതായി വിലയിരുത്തപ്പെടുന്നു.

Comments (0)

Related Stories