തിരുവാങ്കുളം: കുടുംബങ്ങളുടെ ആത്മീയ വളർച്ചയും വിശ്വാസജീവിതത്തിലെ ദൃഢതയുമാണ് സഭയുടെ ശക്തിയുടെ അടിത്തറയെന്ന് ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസ്സേലിയോസ് ജോസഫ് ബാവ പറഞ്ഞു.
കൊച്ചി ഭദ്രാസന കുടുംബയൂണിറ്റിന്റെ നേതൃത്വത്തിൽ വിവിധ ഇടവകകളിലെ കുടുംബയൂണിറ്റ് ഭാരവാഹികൾക്കായി സംഘടിപ്പിച്ച ‘ശാലേത് 2K26’ ഭദ്രാസനതല സംഗമം ഉദ്ഘാടനം ചെയ്യുകയായിരുന്നു അദ്ദേഹം.
തിരുവാങ്കുളം ക്യംതാ സെമിനാരിയിൽ നടന്ന സംഗമത്തിൽ കുടുംബജീവിതത്തിന്റെ വിശുദ്ധി കാത്തുസൂക്ഷിക്കേണ്ടതിന്റെ ആവശ്യകതയും പുതുതലമുറയുടെ ആത്മീയ രൂപീകരണത്തിൽ മാതാപിതാക്കളുടെയും കുടുംബങ്ങളുടെയും നിർണായക പങ്കും ബാവ ഓർമ്മിപ്പിച്ചു.
ഫാ. എൽദോസ് കെ. ജോയിയുടെ നേതൃത്വത്തിൽ മോട്ടിവേഷൻ ക്ലാസ് നടന്നു. വന്ദ്യ സ്ലീബാ കാട്ടുമങ്ങാട്ട് കോർ എപ്പിസ്കോപ്പ, ഫാ. ബേസിൽ ഷാജു, ഫാ. ജേക്കബ് കുരുവിള, ഫാ. സാംസൺ മേലോത്ത്, ജിജി പോൾ എന്നിവർ വിവിധ വിഷയങ്ങളിൽ ക്ലാസുകൾക്കും ചർച്ചകൾക്കും നേതൃത്വം നൽകി.
കുടുംബ നവീകരണത്തിനും ഇടവക–ഭദ്രാസന പ്രവർത്തനങ്ങളുടെ കൂടുതൽ ഏകോപനത്തിനും ലക്ഷ്യമിട്ടുള്ള സംഗമത്തിൽ ഭദ്രാസനത്തിന്റെ വിവിധ ഭാഗങ്ങളിൽ നിന്നുള്ള കുടുംബയൂണിറ്റ് ഭാരവാഹികളുടെ സജീവ പങ്കാളിത്തമുണ്ടായി. കുടുംബ പ്രവർത്തനങ്ങൾക്ക് പുതിയ ദിശയും ഉണർവും പകരുന്നതായി ‘ശാലേത് 2K26’ സംഗമം മാറിയതായി സംഘാടകർ അറിയിച്ചു.
Comments (0)