ബിബ്ലിക്കൽ അക്കാദമിക്ക് പുതിയ പേര്; പ്രിൻസിപ്പലായി ഫാ. ഷിബു ചെറിയാൻ കൂളിയാട്ടിൽ.

പുത്തൻകുരിശ് ● മലങ്കര യാക്കോബായ സുറിയാനി ക്രിസ്ത്യാനി സഭയിലെ വിശ്വാസികൾക്ക് വിശുദ്ധ വേദപുസ്തകവും പരിശുദ്ധ സഭയുടെ സത്യവിശ്വാസവും ആരാധനാക്രമങ്ങളും ദൈവശാസ്ത്രവും ആഴത്തിൽ പഠിക്കുവാൻ ലക്ഷ്യമിട്ട് ആരംഭിച്ച ബിബ്ലിക്കൽ അക്കാദമിക്ക് “ബസേലിയോസ് തോമസ് കാതോലിക്കോസ് ബിബ്ലിക്കൽ അക്കാദമി (BTCBA)” എന്ന് നാമകരണം ചെയ്തതായി ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്കാ ബാവ അറിയിച്ചു. ഭാഗ്യസ്മരണാർഹനായ ശ്രേഷ്ഠ കാതോലിക്കാ ആബൂൻ മോർ ബസേലിയോസ് തോമസ് പ്രഥമൻ ബാവയുടെ ദീർഘദർശനത്തിന്റെ ഫലമായി ആരംഭിച്ച ഈ ആത്മീയ-വിദ്യാഭ്യാസ പ്രസ്ഥാനം മികച്ച രീതിയിൽ മുന്നേറുന്നതിൽ ദൈവത്തെ സ്തുതിക്കുന്നുവെന്നും, ശ്രേഷ്ഠ ബാവ തിരുമനസ്സുകൊണ്ട് നട്ടുവളർത്തി വളർച്ചയിലേക്ക് നയിച്ച ഈ സംരംഭത്തിന് അദ്ദേഹത്തിന്റെ നാമം നൽകുന്നതായും പുറത്തിറക്കിയ സർക്കുലറിൽ വ്യക്തമാക്കി. അക്കാദമിയുടെ പുതിയ പ്രിൻസിപ്പലായി വൈദീക സെമിനാരി അധ്യാപകനായ റവ. ഫാ. ഷിബു ചെറിയാൻ കൂളിയാട്ടിൽ കശ്ശീശയെ നിയമിച്ചതായും സർക്കുലറിൽ പറയുന്നു. അക്കാദമിയുടെ മുൻ പ്രിൻസിപ്പലായിരുന്ന വന്ദ്യ ഡോ. ജോസഫ് മാരാംകണ്ടത്തിൽ കോർഎപ്പിസ്കോപ്പാ നിർവഹിച്ച അനുഗ്രഹീതവും സ്തുത്യർഹവുമായ സേവനങ്ങൾക്ക് ശ്രേഷ്ഠ ബാവ നന്ദി രേഖപ്പെടുത്തി. ബസേലിയോസ് തോമസ് കാതോലിക്കോസ് ബിബ്ലിക്കൽ അക്കാദമി നടത്തുന്ന വിവിധ കോഴ്സുകളിൽ വിശ്വാസികൾ പങ്കുചേർന്ന് പഠിക്കുന്നത് അവരുടെ ആത്മീയ വളർച്ചയ്ക്കും സഭാ വിശ്വാസ പാരമ്പര്യങ്ങളെ കൂടുതൽ ആഴത്തിൽ മനസ്സിലാക്കുന്നതിനും സഹായകരമാകുമെന്ന് ശ്രേഷ്ഠ കാതോലിക്കാ ബാവ പിതൃസ്നേഹത്തോടെ ആഹ്വാനം ചെയ്തു. പുത്തൻകുരിശിലെ പാത്രിയർക്കാ സെന്ററിൽ നിന്ന് 2026 ജൂൺ 15-ന് പുറത്തിറക്കിയ സർക്കുലറിലൂടെയാണ് ഈ നിയമനങ്ങളും പ്രഖ്യാപനങ്ങളും അറിയിച്ചത്.

Comments (0)

Related Stories