സെയ്ഫോ രക്തസാക്ഷികളുടെ സ്മരണയിൽ പരിശുദ്ധ പാത്രിയർക്കീസ് ബാവ വിശുദ്ധ കുർബ്ബാന അർപ്പിച്ചു

മഅറത് സെയ്ദ്നായ ● ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവ, സുറിയാനി ജനതയുടെ സെയ്ഫോ കൂട്ടക്കൊലയിലെ രക്തസാക്ഷികളുടെ സ്മരണയോടനുബന്ധിച്ചും മോർ അപ്രേം സുറിയാനി വൈദീക സെമിനാരിയുടെ 2025–2026 അധ്യയന വർഷത്തിന്റെ സമാപനത്തോടനുബന്ധിച്ചും വിശുദ്ധ കുർബ്ബാന അർപ്പിച്ചു. ജൂൺ 14 ഞായറാഴ്ച മഅറത് സെയ്ദ്നായയിലെ മോർ അപ്രേം ആശ്രമത്തിലുള്ള സെയ്ഫോ രക്തസാക്ഷികളുടെ ബലിപീഠത്തിലായിരുന്നു വിശുദ്ധ കുർബ്ബാന ശുശ്രൂഷകൾ നടന്നത്. പരിശുദ്ധ ബാവയ്ക്ക് സഹകാർമികരായി പാത്രിയർക്കൽ വികാരിയും മോർ അപ്രേം വൈദീക സെമിനാരിയുടെ ഭരണചുമതലയുള്ള അഭിവന്ദ്യ മോർ യാക്കൂബ് ബാബാവി മെത്രാപ്പോലീത്ത, പാത്രിയർക്കൽ അസിസ്റ്റന്റ് അഭിവന്ദ്യ മോർ യൗസഫ് ബാലി മെത്രാപ്പോലീത്ത, ഇന്ത്യാ സഭാ കാര്യങ്ങളുടെ പാത്രിയർക്കൽ സെക്രട്ടറി അഭിവന്ദ്യ മോർ ക്രിസ്റ്റോഫോറോസ് മാർക്കോസ് മെത്രാപ്പോലീത്ത, യുവജന-ക്രിസ്തീയ വിദ്യാഭ്യാസ കാര്യങ്ങളുടെ പാത്രിയർക്കൽ വികാരി അഭിവന്ദ്യ മോർ ആൻഡ്രാവോസ് ബഹി മെത്രാപ്പോലീത്ത എന്നിവർ സന്നിഹിതരായിരുന്നു. വിശുദ്ധ കുർബ്ബാന മധ്യേ പരിശുദ്ധ പാത്രിയർക്കീസ് ബാവ രക്തസാക്ഷികളുടെ പ്രത്യേക ശുശ്രൂഷ നിർവഹിക്കുകയും വിശുദ്ധരുടെ തിരുശേഷിപ്പുകൾ ഉയർത്തിക്കാണിച്ച് ലോകസമാധാനത്തിനും സർവജന നന്മയ്ക്കുമായി മധ്യസ്ഥ പ്രാർത്ഥനകൾ നടത്തുകയും ചെയ്തു. സെയ്ഫോ രക്തസാക്ഷികളുടെ വിശ്വാസസാക്ഷ്യവും ത്യാഗസ്മരണയും പുതുതലമുറയ്ക്ക് കൈമാറുന്ന ആത്മീയ അനുസ്മരണമായി ചടങ്ങുകൾ മാറി.

Comments (0)

Related Stories