അപ്ലൈഡ് സോഷ്യോളജിയിൽ ഫാ. റെജി മാത്യുവിന് രണ്ടാം റാങ്ക്

ചങ്ങനാശ്ശേരി ∙ എംജി സർവകലാശാലയുടെ 2026 ലെ ബിരുദാനന്തര ബിരുദ പരീക്ഷയിൽ അപ്ലൈഡ് സോഷ്യോളജിയിൽ ഫാ. റെജി മാത്യുവിന് രണ്ടാം റാങ്ക്. ചങ്ങനാശ്ശേരി സെന്റ് ബെർക്കുമാൻസ് (എസ്ബി) ഓട്ടോണമസ് കോളജിൽനിന്നാണ് അദ്ദേഹം പഠനം പൂർത്തിയാക്കിയത്.

മലങ്കര യാക്കോബായ സുറിയാനി സഭ നിരണം ഭദ്രാസനത്തിലെ ആഞ്ഞിലിത്താനം സെന്റ് മേരീസ് ഇടവകാംഗമായ ഫാ. റെജി, പരേതനായ പി.വി. യോഹന്നാന്റെയും മറിയാമ്മ യോഹന്നാന്റെയും മകനാണ്. തിരുവനന്തപുരം കണ്ണമ്മൂല ഐക്യ വൈദിക സെമിനാരിയിൽനിന്ന് ദൈവശാസ്ത്ര പഠനം പൂർത്തിയാക്കി. തുടർന്ന് നിരണം ഭദ്രാസനത്തിലെ വിവിധ പള്ളികളിലും ഷാർജ സെന്റ് മേരീസ് കത്തീഡ്രൽ, തിരുവനന്തപുരം സെന്റ് പീറ്റേഴ്സ് കത്തീഡ്രൽ എന്നിവിടങ്ങളിലും വികാരിയായി സേവനമനുഷ്ഠിച്ചിട്ടുണ്ട്.

മാർട്ടിൻ ലൂഥർ ക്രിസ്ത്യൻ സർവകലാശാലയിൽനിന്ന് കൗൺസിലിങ് സൈക്കോളജിയിൽ ബിരുദാനന്തര ബിരുദം നേടിയിട്ടുള്ള അദ്ദേഹം, നിലവിൽ ജോൺ പോൾ രണ്ടാമൻ പൊന്തിഫിക്കൽ തിയോളജിക്കൽ ഇൻസ്റ്റിറ്റ്യൂട്ടിൽ ഉപരിപഠനം (Theology of Marriage and the Family Licentiate Programme) നടത്തുകയാണ്.

നിലവിൽ കല്ലൂപ്പാറ സെന്റ് ഗ്രീഗോറിയോസ്, കുന്നന്താനം സെന്റ് പീറ്റേഴ്സ് പള്ളികളിൽ ശുശ്രൂഷ നിർവഹിക്കുന്ന ഫാ. റെജി, നിരണം ഭദ്രാസന പ്രീ-മാര്യേജ് കോഴ്സ് ഡയറക്ടർ, സൺഡേ സ്കൂൾ വൈസ് പ്രസിഡന്റ് എന്നീ ചുമതലകളും വഹിക്കുന്നു. ഐബി മാത്യുവാണ് ഭാര്യ. മക്കൾ: നാഥാൻ, സാദോക്ക്, സെയിൻ.