ലഹരിയുടെ ഇരുളിൽ നിന്ന് പുതിയ ജീവിതത്തിലേക്ക്; വട്ടപ്പാറയിലെ ‘ഹോപ്പ്’ ലഹരി വിമോചന കേന്ദ്രം പ്രത്യാശയാകുന്നു

ആരക്കുന്നം ● സമൂഹത്തെ ആശങ്കയിലാഴ്ത്തുന്ന ലഹരി ഉപയോഗത്തിന്റെ വർധിച്ചുവരുന്ന സാഹചര്യത്തിൽ, ലഹരിയുടെ ബന്ധനങ്ങളിൽ നിന്ന് വ്യക്തികളെ മോചിപ്പിച്ച് ജീവിതത്തിന്റെ മുഖ്യധാരയിലേക്ക് തിരികെ കൊണ്ടുവരുന്ന സേവനപ്രവർത്തനങ്ങളിലൂടെ എറണാകുളം ജില്ലയിലെ എടക്കാട്ടുവയൽ വട്ടപ്പാറയിൽ പ്രവർത്തിക്കുന്ന ‘ഹോപ്പ്’ (HOPE) ലഹരി വിമോചന കേന്ദ്രം ശ്രദ്ധേയമാകുന്നു. ശാസ്ത്രീയമായ ചികിത്സാരീതികളും കൗൺസിലിംഗും ആത്മീയ പിന്തുണയും സ്നേഹപൂർണമായ പരിചരണവും സമന്വയിപ്പിച്ചാണ് കേന്ദ്രത്തിന്റെ പ്രവർത്തനം. മലങ്കര യാക്കോബായ സുറിയാനി ഓർത്തഡോക്സ് സഭയുടെ കീഴിൽ, ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് ബാവായുടെ ആത്മീയ നിയന്ത്രണത്തിലാണ് സ്ഥാപനം പ്രവർത്തിക്കുന്നത്. ലഹരിക്ക് അടിമപ്പെട്ടവരുടെ ശാരീരികവും മാനസികവും ആത്മീയവുമായ സൗഖ്യം ലക്ഷ്യമാക്കി വിവിധ പുനരധിവാസ പദ്ധതികളാണ് കേന്ദ്രം നടപ്പിലാക്കുന്നത്. ലഹരിയുടെ പേരിൽ തകർന്ന കുടുംബബന്ധങ്ങൾ പുനഃസ്ഥാപിക്കുന്നതിനും സമൂഹത്തിൽ മാന്യമായ ജീവിതം തിരിച്ചുപിടിക്കുന്നതിനും ആവശ്യമായ പിന്തുണയും മാർഗനിർദേശവും ഇവിടെ ലഭ്യമാക്കുന്നു. ക്രിസ്തീയ മൂല്യങ്ങളിൽ അധിഷ്ഠിതമായ സേവന ദർശനത്തോടെ പ്രവർത്തിക്കുന്ന ഹോപ്പ് കേന്ദ്രം, മെഡിക്കൽ പരിചരണം, വ്യക്തിഗതവും ഗ്രൂപ്പ് കൗൺസിലിംഗും, വിവിധ തെറാപ്പികൾ, ആത്മീയ ശുശ്രൂഷകൾ, ജീവിതനൈപുണ്യ പരിശീലനം, പുനരധിവാസം, തുടർപരിചരണം, വീണ്ടും ലഹരിയിലേക്ക് വഴുതിവീഴുന്നത് തടയുന്നതിനുള്ള പ്രതിരോധ പരിപാടികൾ എന്നിവയും ഒരുക്കിയിട്ടുണ്ട്. ലഹരിമുക്ത ജീവിതം ആഗ്രഹിക്കുന്നവർക്ക് സുരക്ഷിതവും സമാധാനപൂർണവുമായ അന്തരീക്ഷത്തിൽ പുതുജീവിതത്തിലേക്കുള്ള പ്രത്യാശയുടെ വാതിൽ തുറന്നുകൊടുക്കുകയാണ് വട്ടപ്പാറയിലെ ഹോപ്പ് ലഹരി വിമോചന കേന്ദ്രം. കൂടുതൽ വിവരങ്ങൾക്ക്: ഹോപ്പ് ലഹരി വിമോചന കേന്ദ്രം വട്ടപ്പാറ, കൈപ്പട്ടൂർ പി.ഒ., എടക്കാട്ടുവയൽ, എറണാകുളം – 682313 📞 ഫോൺ: +91 95396 84346, +91 79074 16536 ✉️ ഇ-മെയിൽ: hopedeaddictioncentre@gmail.com

Comments (0)

Related Stories