എഡ്മൺട്ടൺ ● കാനഡയിൽ ആദ്യമായി സ്റ്റാൻഡിംഗ് കോൺഫറൻസ് ഓഫ് ഓറിയന്റൽ ഓർത്തഡോക്സ് ചർച്ചസ് (SCOOCH) സമ്മേളനത്തിന് വേദിയായി എഡ്മൺട്ടണിലെ സുറിയാനി ഓർത്തഡോക്സ് സഭ. 2026 ജൂൺ 10-ന് നടന്ന SCOOCH ആൽബർട്ട യൂണിറ്റിന്റെ പ്രഥമ സമ്മേളനത്തിൽ വിവിധ ഓറിയന്റൽ ഓർത്തഡോക്സ് സഭകളുടെ വൈദികരും അൽമായ നേതാക്കളും പങ്കെടുത്തു. ഓറിയന്റൽ ഓർത്തഡോക്സ് സഭകൾ തമ്മിലുള്ള ഐക്യത്തിന്റെയും സഹകരണത്തിന്റെയും പുതിയ അധ്യായത്തിന് തുടക്കം കുറിക്കുന്ന ചരിത്രനിമിഷമായി സമ്മേളനം മാറി.
വടക്കേ അമേരിക്കയിലെ സുറിയാനി ഓർത്തഡോക്സ് അതിഭദ്രാസന മെത്രാപ്പോലീത്തയും പാത്രിയർക്കൽ വികാരിയുമായ അഭിവന്ദ്യ മോർ തീത്തോസ് യൽദോ മെത്രാപ്പോലീത്ത സമ്മേളനത്തിന് അധ്യക്ഷത വഹിച്ചു. വടക്കേ അമേരിക്കയിലെ SCOOCH കോർ ഡെലിഗേറ്റ് ടീമംഗം കൂടിയായ അഭിവന്ദ്യ തിരുമേനി, വിവിധ ഓറിയന്റൽ ഓർത്തഡോക്സ് സഭകൾ നേരിടുന്ന സമകാലിക വെല്ലുവിളികൾ, പരസ്പര സഹകരണം, ആത്മീയ ഐക്യം, ഭാവി പ്രവർത്തനങ്ങൾ എന്നിവ സംബന്ധിച്ച ചർച്ചകൾക്ക് നേതൃത്വം നൽകി.
സമ്മേളനത്തിന്റെ ഭാഗമായി ഭാവി പ്രവർത്തനങ്ങൾ ഏകോപിപ്പിക്കുന്നതിനായി താൽക്കാലിക കമ്മിറ്റിക്കും രൂപം നൽകി. റെവ. ഫാ. റെവിസ് റോഫായേൽ ചെയർമാനായും, ഫാ. തോമസ് കെ. പൂത്തിക്കോട്ട് സെക്രട്ടറിയായും, ഫാ. പൗലോസ് ടെകസ്റ്റേ കോ-ഓർഡിനേറ്ററായും തിരഞ്ഞെടുക്കപ്പെട്ടു.
കോപ്റ്റിക് ഓർത്തഡോക്സ്, എറിത്രിയൻ ഓർത്തഡോക്സ്, എത്യോപ്യൻ ഓർത്തഡോക്സ്, സുറിയാനി ഓർത്തഡോക്സ് സഭകളുടെ പ്രതിനിധികൾ സമ്മേളനത്തിൽ സജീവമായി പങ്കെടുത്തു. കോപ്റ്റിക് ഓർത്തഡോക്സ് സഭയെ പ്രതിനിധീകരിച്ച് ഫാ. റെവിസ് റോഫായേലും ഡീക്കൻ ബേസിൽ ഇലിയാസും പങ്കെടുത്തു. എറിത്രിയൻ ഓർത്തഡോക്സ് സഭയിൽ നിന്ന് ഫാ. സെമരെ സിഭാതു, ഫാ. ഡെബ്രെറ്റ്സിയോൻ അരായ, ഫാ. പൗലോസ് ടെകസ്റ്റേ എന്നിവരും മറ്റ് പ്രതിനിധികളും സന്നിഹിതരായി. എത്യോപ്യൻ ഓർത്തഡോക്സ് സഭയെ പ്രതിനിധീകരിച്ച് ഫാ. മെസ്മിർ കാസ്സ, ഫാ. ഫാസിൽ മുലുഗേറ്റ, ഷൈംസ് മെറേസ എന്നിവരും പങ്കെടുത്തു.
ആതിഥേയരായ സുറിയാനി ഓർത്തഡോക്സ് സഭയുടെ പ്രതിനിധി സംഘത്തിന് എഡ്മൺട്ടൺ ഇടവക വികാരിയും പ്രസിഡന്റുമായ ഫാ. തോമസ് കെ. പൂത്തിക്കോട്ട് നേതൃത്വം നൽകി. ഫാ. വർഗീസ് തെക്കേക്കര, ക്നാനായ അതിഭദ്രാസന പ്രതിനിധിയായ ഫാ. ജേക്കബ് ടി.ഐ., ഡീക്കൻ ഡോ. സിനോജ് എബ്രഹാം, ഡീക്കൻ ഡോ. ജോബിൻ ചാക്കോ, അബി നെല്ലിക്കൽ, ബേസിൽ മാത്യു എന്നിവരും സംഘത്തിലുണ്ടായിരുന്നു.
അർമേനിയൻ ഓർത്തഡോക്സ് സഭയുടെ നേതൃത്വവും ഭാവിയിലെ SCOOCH പ്രവർത്തനങ്ങളുമായി സഹകരിക്കാനുള്ള താൽപര്യം അറിയിച്ചതായി സംഘാടകർ അറിയിച്ചു. കാനഡയിലെ ഓറിയന്റൽ ഓർത്തഡോക്സ് സഭകൾ തമ്മിലുള്ള സൗഹൃദവും ഏകോപനവും കൂടുതൽ ശക്തിപ്പെടുത്തുന്ന ഒരു സുപ്രധാന ചുവടുവയ്പ്പായി ഈ പ്രഥമ സമ്മേളനം വിലയിരുത്തപ്പെടുന്നു.
Comments (0)