റിയാദ് സമാജത്തിൽ JSVBS 2026 സമാപിച്ചു; കുട്ടികളുടെ കലാപ്രതിഭകൾ കൊണ്ട് സമാപന സമ്മേളനം വർണാഭമായി

റിയാദ്: യാക്കോബായ സുറിയാനി ഓർത്തഡോക്സ് സഭയുടെ നേതൃത്വത്തിൽ സംഘടിപ്പിച്ച ജാക്കോബൈറ്റ് സിറിയൻ വെക്കേഷൻ ബൈബിൾ സ്കൂൾ (JSVBS) 2026 റിയാദ് സമാജത്തിൽ ആത്മീയവും കലാപരവുമായ പരിപാടികളോടെ സമാപിച്ചു. നിരവധി ദിവസങ്ങളായി നടന്ന ബൈബിൾ പഠന ക്ലാസുകളും ആത്മീയ പരിശീലനങ്ങളും കുട്ടികളിൽ വിശ്വാസബോധവും സഭാ പാരമ്പര്യങ്ങളോടുള്ള അടുപ്പവും വളർത്തുന്നതിന് സഹായകമായി. വിശുദ്ധ കുർബ്ബാനയ്ക്ക് ശേഷം നടന്ന റാലിയോടുകൂടിയാണ് സമാപന സമ്മേളന പരിപാടികൾക്ക് തുടക്കമായത്. സമാജം സൺഡേ സ്കൂൾ ഹെഡ്മാസ്റ്റർ ശ്രീ. ജിബി ജോർജ് അധ്യക്ഷനായ സമ്മേളനത്തിൽ സമാജം സെക്രട്ടറി ശ്രീ. അരുൺ ഐപ്പ് സ്വാഗതം ആശംസിച്ചു. സമാജം വൈസ് പ്രസിഡന്റ് ഷെവലിയാർ തോമസ് ഡാനിയേൽ സമ്മേളനം ഉദ്ഘാടനം ചെയ്തു. പ്രയർ കോർഡിനേറ്റർ ശ്രീ. ജോൺ കെ.വി., ബഹുമാനപ്പെട്ട വൈദികർ എന്നിവർ ആശംസാ സന്ദേശങ്ങൾ നൽകി. തുടർന്ന് കുട്ടികളുടെ ഗാനങ്ങൾ, ആക്ഷൻ സോംഗുകൾ, റിപ്പോർട്ട് അവതരണം, വിവിധ കലാപരിപാടികൾ എന്നിവ അരങ്ങേറി. കുട്ടികളുടെ കഴിവുകളും ആത്മീയ ചൈതന്യവും പ്രതിഫലിപ്പിച്ച പരിപാടികൾ സമാപന സമ്മേളനത്തെ വർണാഭമാക്കി. സെന്റ് തോമസ്, സെന്റ് പീറ്റർ, സെന്റ് പോൾസ് എന്നീ മൂന്ന് ഗ്രൂപ്പുകളായി തിരിച്ചായിരുന്നു മത്സരങ്ങൾ സംഘടിപ്പിച്ചത്. മത്സരങ്ങളിൽ സെന്റ് പീറ്റർ ഗ്രൂപ്പ് ഒന്നാം സ്ഥാനവും സെന്റ് പോൾസ് ഗ്രൂപ്പ് രണ്ടാം സ്ഥാനവും കരസ്ഥമാക്കി. വിജയികൾക്ക് സുവിശേഷ സമാജം മെത്രാപ്പോലീത്തയായിരുന്ന ഭാഗ്യസ്മരണാർഹനായ ഗീവർഗീസ് മോർ പോളികാർപ്പോസ് മെത്രാപ്പോലീത്തയുടെ സ്മരണാർത്ഥം ഏർപ്പെടുത്തിയ ഗീവർഗീസ് മോർ പോളികാർപ്പോസ് മെമ്മോറിയൽ ട്രോഫി സമ്മാനമായി നൽകി. JSVBS ഡയറക്ടർ ശ്രീ. ജിനു കെ. ജോയി സമാപന സന്ദേശം നൽകി. കുട്ടികളുടെ ആത്മീയ വളർച്ചയ്ക്കായി പ്രവർത്തിച്ച അധ്യാപകരുടെയും സംഘാടകരുടെയും മാതാപിതാക്കളുടെയും ആത്മാർത്ഥമായ സഹകരണത്തെ അദ്ദേഹം അഭിനന്ദിച്ച് നന്ദി രേഖപ്പെടുത്തി. പരിപാടിയിൽ പങ്കെടുത്ത എല്ലാ കുട്ടികൾക്കും അധ്യാപകർക്കും സർട്ടിഫിക്കറ്റുകളും സമ്മാനങ്ങളും വിതരണം ചെയ്തു. പ്രാർത്ഥനയോടെയാണ് JSVBS 2026 സമാപന പരിപാടികൾക്ക് തിരശ്ശീല വീണത്.

Comments (0)

Related Stories