മലങ്കര യാക്കോബായ സുറിയാനി ഓർത്തഡോക്സ് സഭയുടെ കണ്ടനാട് ഭദ്രാസനത്തിലെ അഞ്ച് വൈദിക സെമിനാരി വിദ്യാർഥികൾ കോറൂയോ പട്ടം സ്വീകരിക്കുന്നു. ജൂൺ 12 വെള്ളിയാഴ്ച രാവിലെ 7 മണിക്ക് കടക്കനാട് ബസേലിയോസ് പൗലോസ് ദ്വിതീയൻ സെന്ററിലെ സെന്റ് ജോർജ് യാക്കോബായ സുറിയാനി അരമന കത്തീഡ്രലിൽ നടക്കുന്ന വിശുദ്ധ ശുശ്രൂഷയിൽ കണ്ടനാട് ഭദ്രാസനാധിപൻ അഭിവന്ദ്യ ഡോ. മോർ മാത്യൂസ് ഇവാനിയോസ് മെത്രാപ്പോലീത്ത കോറൂയോ പട്ടം നൽകും.
സഭാ ശുശ്രൂഷയിലേക്കുള്ള സുപ്രധാന ആത്മീയ ചുവടുവയ്പ്പായാണ് കോറൂയോ പട്ടം കണക്കാക്കപ്പെടുന്നത്. വൈദിക ശുശ്രൂഷയിലേക്കുള്ള ഒരുക്കത്തിന്റെ ഭാഗമായി അഞ്ച് യുവ സെമിനാരി വിദ്യാർഥികൾ ഈ സ്ഥാനത്തേക്ക് ഉയർത്തപ്പെടുന്നത് ഭദ്രാസനത്തിനും സഭയ്ക്കും അനുഗ്രഹ നിമിഷമായാണ് വിലയിരുത്തപ്പെടുന്നത്.
കോറൂയോ പട്ടം സ്വീകരിക്കുന്നവരിൽ വെട്ടിത്തറ മോർ മിഖായേൽ യാക്കോബായ സുറിയാനി വലിയപള്ളി ഇടവകാംഗമായ തോമസ് പോൾ, വടകര സെന്റ് ജോൺസ് യാക്കോബായ സുറിയാനി പള്ളി ഇടവകാംഗമായ ബെൽബിൻ ജോസ്, മണ്ണത്തൂർ സെന്റ് ജോർജ് യാക്കോബായ സുറിയാനി പള്ളി ഇടവകാംഗമായ ബേസിൽ മത്തായി, കാരിക്കോട് സെന്റ് മേരീസ് യാക്കോബായ സുറിയാനി പള്ളി ഇടവകാംഗമായ ആൽവിൻ ജോൺ ജോസഫ്, മണ്ണത്തൂർ സെന്റ് ജോർജ് യാക്കോബായ സുറിയാനി പള്ളി ഇടവകാംഗമായ ജെവിൻ പോൾ ബിജു (പൗലോസ്കുട്ടി) എന്നിവരാണ്.
വിവിധ വിഷയങ്ങളിൽ ബിരുദവും ബിരുദാനന്തര ബിരുദവും നേടിയ ഇവർ വെട്ടിക്കൽ വൈദിക സെമിനാരിയിലെ പഠനത്തിന്റെ അവസാന വർഷത്തിലാണ്. സെമിനാരി പഠനത്തിന്റെ ഭാഗമായി ആത്മീയവും ദൈവശാസ്ത്രപരവുമായ പരിശീലനം പൂർത്തിയാക്കിയ ഇവർ സഭയുടെ ആരാധനാ-ശുശ്രൂഷാ ജീവിതത്തിൽ കൂടുതൽ ഉത്തരവാദിത്വങ്ങളിലേക്ക് പ്രവേശിക്കുകയാണ്.
സഭയുടെ ആരാധനാക്രമങ്ങളിലും ആത്മീയ ശുശ്രൂഷകളിലും സജീവ പങ്കാളിത്തത്തിനുള്ള ഔദ്യോഗിക അംഗീകാരമാണ് കോറൂയോ പട്ടം. ഭാവിയിൽ വിശുദ്ധ വൈദിക ശുശ്രൂഷയിലേക്ക് പ്രവേശിക്കുന്നതിനുള്ള പ്രധാന ആത്മീയ നാഴികക്കല്ലായും ഇത് കണക്കാക്കപ്പെടുന്നു.
Comments (0)