മാറത്തഹള്ളി: ബാംഗ്ലൂർ ഭദ്രാസനത്തിലെ മാറത്തഹള്ളി സെന്റ് ജോർജ് യാക്കോബായ സുറിയാനി ഓർത്തഡോക്സ് പള്ളിയിൽ വിശുദ്ധ ഗീവർഗീസ് സഹദായുടെ ഓർമ്മപ്പെരുന്നാൾ ഭക്തിനിർഭരമായ ചടങ്ങുകളോടെ സമാപിച്ചു. പെരുന്നാളിനോടനുബന്ധിച്ച് പുനർനിർമിക്കുന്ന ദൈവാലയത്തിന്റെ അടിസ്ഥാനശിലാ സ്ഥാപനം, ഭദ്രാസനതല വിദ്യാർത്ഥി അനുമോദന സമ്മേളനം എന്നിവയും നടന്നു.
പെരുന്നാൾ ശുശ്രൂഷകൾക്ക് ബാംഗ്ലൂർ-മൈലാപ്പൂർ ഭദ്രാസനാധിപൻ അഭിവന്ദ്യ ഐസക് മോർ ഒസ്താത്തിയോസ് മെത്രാപ്പോലീത്ത മുഖ്യകാർമികത്വം വഹിച്ചു. ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അഫ്രേം ദ്വിതീയൻ പാത്രിയർക്കീസ് ബാവാ ബാംഗ്ലൂർ ശ്ലൈഹിക സന്ദർശന വേളയിൽ ആശീർവദിച്ച ശിലയാണ് ദൈവാലയത്തിന്റെ അടിസ്ഥാനശിലയായി സ്ഥാപിച്ചത്. വികാരി ഫാ. എൽദോ ജോൺ വണ്ടാനത്ത് സഹകാർമികനായിരുന്നു. ഡീക്കന്മാരായ ടെസൻ തോമസ്, ജോസഫ് ജോൺ, മാത്യു ഈരാളിൽ, ഗ്രിഗറി എസ്. പുലയത്ത് എന്നിവർ ശുശ്രൂഷകളിൽ പങ്കെടുത്തു.
പെരുന്നാളിന്റെ ഭാഗമായി ശനിയാഴ്ച വൈകിട്ട് അഭിവന്ദ്യ മെത്രാപ്പോലീത്തയുടെ നേതൃത്വത്തിൽ സന്ധ്യാപ്രാർത്ഥനയും സുവിശേഷ പ്രസംഗവും നടന്നു. ഞായറാഴ്ച വിശുദ്ധ കുർബാനയ്ക്കുശേഷം പ്രത്യേക അനുമോദന സമ്മേളനവും സംഘടിപ്പിച്ചു.
ബാംഗ്ലൂർ ഭദ്രാസനത്തിന്റെ ആഭിമുഖ്യത്തിൽ സംഘടിപ്പിച്ച ‘മകബലൂനോസോ–2026’ അനുമോദന സമ്മേളനത്തിൽ ഭദ്രാസന പരിധിയിലെ വിവിധ ദൈവാലയങ്ങളിൽ നിന്നുള്ള പത്താം ക്ലാസ്, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർത്ഥികളെ ആദരിച്ചു. സ്റ്റേറ്റ്, സി.ബി.എസ്.ഇ., ഐ.സി.എസ്.ഇ. ഉൾപ്പെടെയുള്ള വിവിധ സിലബസുകളിലെ വിജയികളായ വിദ്യാർത്ഥികൾക്ക് അഭിവന്ദ്യ ഐസക് മോർ ഒസ്താത്തിയോസ് മെത്രാപ്പോലീത്ത സർട്ടിഫിക്കറ്റുകളും മെഡലുകളും വിതരണം ചെയ്തു.
തുടർന്ന് നടന്ന പ്രദക്ഷിണം, അടിസ്ഥാനശിലാ സ്ഥാപനം, ആദ്യഫല പെരുന്നാൾ ലേലം, പ്രത്യേക പ്രാർത്ഥനകൾ, ആശീർവാദം, നേർച്ചവിളമ്പ്, കൊടിയിറക്കം തുടങ്ങിയ ചടങ്ങുകളോടെയാണ് പെരുന്നാൾ സമാപിച്ചത്.
പള്ളി വൈസ് പ്രസിഡന്റ് ബിനോയ് കെ.പി., സെക്രട്ടറി ജെറിൻ വർഗീസ്, ട്രഷറർ ദീപ ജെം, സെന്റ് ജോർജ് ട്രസ്റ്റ് വൈസ് പ്രസിഡന്റ് ജിനു ജോസ്, സെക്രട്ടറി എൽദോസ് എം. പോൾ, ട്രഷറർ റെന്നി തോമസ് എന്നിവരുടെ നേതൃത്വത്തിൽ ഭരണസമിതി അംഗങ്ങളും വിശ്വാസികളും പെരുന്നാൾ ഒരുക്കങ്ങൾക്ക് നേതൃത്വം നൽകി. ബാംഗ്ലൂരിന്റെ വിവിധ ഭാഗങ്ങളിൽ നിന്നെത്തിയ നൂറുകണക്കിന് വിശ്വാസികൾ പെരുന്നാൾ ശുശ്രൂഷകളിലും അനുബന്ധ പരിപാടികളിലും പങ്കെടുത്ത് അനുഗ്രഹം പ്രാപിച്ചു.
Comments (0)