മണർകാട് സെന്റ് മേരീസ് ഹോസ്പിറ്റലിൽ പുതിയ ഒ.പി.ഡി. ബ്ലോക്ക് കൂദാശ ചെയ്തു

മണർകാട്: മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രലിന്റെ കീഴിൽ പ്രവർത്തിക്കുന്ന സെന്റ് മേരീസ് ഹോസ്പിറ്റലിൽ അത്യാധുനിക സൗകര്യങ്ങളോടെ നിർമ്മിച്ച പുതിയ ഒ.പി.ഡി. (ഔട്ട് പേഷ്യന്റ്) ബ്ലോക്ക് കൂദാശ ചെയ്തു. യാക്കോബായ സുറിയാനി ഓർത്തഡോക്സ് സഭയുടെ കോട്ടയം ഭദ്രാസനാധിപൻ അഭിവന്ദ്യ ഡോ. തോമസ് മോർ തീമോത്തിയോസ് മെത്രാപ്പോലീത്ത മുഖ്യകാർമികത്വം വഹിച്ച ചടങ്ങിലാണ് പുതിയ മന്ദിരം കൂദാശ ചെയ്ത് പ്രവർത്തനത്തിനായി സമർപ്പിച്ചത്. രോഗികൾക്ക് കൂടുതൽ വേഗത്തിലും സൗകര്യപ്രദമായും ചികിത്സാ സേവനങ്ങൾ ലഭ്യമാക്കുക എന്ന ലക്ഷ്യത്തോടെയാണ് പുതിയ ഒ.പി.ഡി. ബ്ലോക്ക് സജ്ജമാക്കിയിരിക്കുന്നത്. വിശാലമായ കാത്തിരിപ്പ് കേന്ദ്രം, ആധുനിക കൺസൾട്ടേഷൻ മുറികൾ, മെച്ചപ്പെട്ട രോഗിസേവന സൗകര്യങ്ങൾ, കൂടുതൽ വിപുലമായ ഒ.പി. വിഭാഗം എന്നിവ പുതിയ മന്ദിരത്തിന്റെ പ്രധാന പ്രത്യേകതകളാണ്. ആരോഗ്യരംഗത്ത് മികച്ച സേവനങ്ങൾ ലഭ്യമാക്കുന്നതിനുള്ള കത്തീഡ്രലിന്റെയും ആശുപത്രി ഭരണസമിതിയുടെയും തുടർച്ചയായ ശ്രമങ്ങളുടെ ഭാഗമായാണ് പുതിയ ബ്ലോക്ക് നിർമ്മിച്ചതെന്ന് ചടങ്ങിൽ സംസാരിച്ചവർ അഭിപ്രായപ്പെട്ടു. പുതിയ സംവിധാനങ്ങൾ പ്രവർത്തനസജ്ജമാകുന്നതോടെ ആശുപത്രിയിൽ എത്തുന്ന രോഗികൾക്ക് കൂടുതൽ കാര്യക്ഷമവും സമയബന്ധിതവുമായ ചികിത്സാ സേവനങ്ങൾ ഉറപ്പാക്കാൻ സാധിക്കുമെന്ന പ്രതീക്ഷയും പങ്കുവെച്ചു. ചടങ്ങിൽ മണർകാട് ഗ്രാമപഞ്ചായത്ത് പ്രസിഡന്റ് ജെസ്സി ഫിലിപ്പ്, വൈസ് പ്രസിഡന്റ് കെ.കെ. തോമസ് കുന്നേൽ, ആശുപത്രി മാനേജർ റവ. ഫാ. ഗീവർഗീസ് നടുമുറിയിൽ, ആശുപത്രി സെക്രട്ടറി രഞ്ജിത്ത് കെ. ഏബ്രഹാം കാരക്കാട്ട്, മണർകാട് പള്ളി സഹവികാരിമാരായ റവ. ഫാ. കെ. കുര്യാക്കോസ് കാലായിൽ, റവ. ഫാ. എം.ഐ. തോമസ് മറ്റത്തിൽ, റവ. ഫാ. കുര്യൻ മാത്യു വടക്കേപറമ്പിൽ, റവ. ഫാ. സനോജ് കരോട്ടെക്കുറ്റ്, റവ. ഫാ. ലിറ്റു ജേക്കബ് തണ്ടാശ്ശേരിയിൽ എന്നിവർ പങ്കെടുത്തു. കത്തീഡ്രൽ ട്രസ്റ്റിമാരായ ഇ.വി. കുറിയാക്കോസ് ഇടച്ചേരിയിൽ, ബിജു വർഗീസ് കന്നുകുഴിയിൽ, സ്കറിയാച്ചൻ പി.എ. പള്ളത്ത്, കത്തീഡ്രൽ സെക്രട്ടറി തോമസ് ഉമ്മൻ പള്ളത്തറ, മാനേജിംഗ് കമ്മിറ്റി അംഗങ്ങൾ, ആശുപത്രി ഗവേണിംഗ് ബോർഡ് അംഗങ്ങൾ, വിവിധ വകുപ്പ് മേധാവികൾ, ഡോക്ടർമാർ, ജീവനക്കാർ, ഇടവകാംഗങ്ങൾ എന്നിവരും ചടങ്ങിൽ സന്നിഹിതരായിരുന്നു. പുതിയ ഒ.പി.ഡി. ബ്ലോക്ക് പ്രവർത്തനസജ്ജമാകുന്നതോടെ പ്രദേശവാസികൾക്കും പൊതുജനങ്ങൾക്കും കൂടുതൽ മെച്ചപ്പെട്ട ആരോഗ്യസേവനങ്ങൾ ലഭ്യമാക്കാൻ സാധിക്കുമെന്ന് ആശുപത്രി അധികൃതർ അറിയിച്ചു.

Comments (0)

Related Stories