പരിശുദ്ധ പാത്രിയർക്കീസ് ബാവായുടെ 12-ാം സ്ഥാനാരോഹണ വാർഷികം ടൊറന്റോയിൽ ഭക്തിസാന്ദ്രമായി ആചരിച്ചു
ടൊറന്റോ: ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അഫ്രേം ദ്വിതീയൻ പാത്രിയർക്കീസ് ബാവായുടെ 12-ാം പാത്രിയർക്കാ സ്ഥാനാരോഹണ വാർഷികം കാനഡയിലെ ടൊറന്റോയിൽ ഭക്തിസാന്ദ്രമായി ആചരിച്ചു. മലങ്കര യാക്കോബായ സുറിയാനി ഓർത്തഡോക്സ് സഭയുടെ നോർത്ത് അമേരിക്ക അതിഭദ്രാസനത്തിന് കീഴിലുള്ള മിസ്സിസാഗ സെന്റ് പീറ്റേഴ്സ് യാക്കോബായ സുറിയാനി ഓർത്തഡോക്സ് പള്ളിയിലായിരുന്നു ആഘോഷ പരിപാടികൾ നടന്നത്.
ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്ക ബാവായുടെ മുഖ്യകാർമികത്വത്തിൽ അർപ്പിച്ച വിശുദ്ധ കുർബാനയോടെയാണ് ആഘോഷങ്ങൾക്ക് തുടക്കമായത്. വിശുദ്ധ കുർബാനയ്ക്കുശേഷം പരിശുദ്ധ പാത്രിയർക്കീസ് ബാവായുടെ സ്ഥാനാരോഹണ വാർഷികത്തോടനുബന്ധിച്ച് പ്രത്യേക അനുസ്മരണ സമ്മേളനവും പ്രാർത്ഥനാ യോഗവും സംഘടിപ്പിച്ചു.
സമ്മേളനത്തിൽ അധ്യക്ഷത വഹിച്ച ശ്രേഷ്ഠ ബാവ, ലെബനനിലെയും മധ്യപൂർവദേശത്തെയും വെല്ലുവിളി നിറഞ്ഞ സാഹചര്യങ്ങൾക്കിടയിലും ആഗോള സുറിയാനി ഓർത്തഡോക്സ് സഭയെ ദീർഘവീക്ഷണത്തോടെയും ആത്മീയ കരുത്തോടെയും നയിക്കുന്ന പരിശുദ്ധ പാത്രിയർക്കീസ് ബാവായുടെ നേതൃത്വത്തെ പ്രശംസിച്ചു. സഭയുടെ വിശ്വാസ പാരമ്പര്യവും ആത്മീയ ഐക്യവും സംരക്ഷിക്കുന്നതിൽ പരിശുദ്ധ പിതാവ് വഹിക്കുന്ന പങ്ക് വിലമതിക്കാനാകാത്തതാണെന്നും, മഹാസ്ഥാനാരോഹണ വാർഷികത്തിൽ എല്ലാവിധ പ്രാർത്ഥനാശംസകളും നേരുന്നതായും ശ്രേഷ്ഠ ബാവ പറഞ്ഞു.
പള്ളി സെക്രട്ടറി ശ്രീമതി ജിജി ജോയി സ്വാഗതം ആശംസിച്ച സമ്മേളനത്തിൽ കാനഡ റീജിയൺ അഡ്മിനിസ്ട്രേറ്ററും പള്ളി വികാരിയുമായ ഫാ. എബി മാത്യു ആശംസാപ്രസംഗം നടത്തി. കാനഡ റീജിയൺ ട്രഷറർ ശ്രീ. ജെനു മഠത്തിൽ, ഭദ്രാസന കൗൺസിൽ അംഗങ്ങൾ, വിവിധ സാമൂഹിക, സാംസ്കാരിക, മാധ്യമ മേഖലകളിലെ പ്രതിനിധികൾ എന്നിവർ ചടങ്ങിൽ പങ്കെടുത്തു
Comments (0)