ബെയ്റൂട്ട്: സുറിയാനി ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവായും സുറിയാനി കത്തോലിക്കാ സഭയുടെ പാത്രിയർക്കീസ് ആബൂൻ മോർ ഇഗ്നാത്തിയോസ് യൂസഫ് മൂന്നാമൻ യൂനാനും തമ്മിൽ ബെയ്റൂട്ടിൽ കൂടിക്കാഴ്ച നടത്തി. ലെബനനിലെ സുറിയാനി കത്തോലിക്കാ പാത്രിയർക്കാ ആസ്ഥാനത്ത് ജൂൺ 5-ന് നടന്ന കൂടിക്കാഴ്ചയിൽ മധ്യപൂർവദേശത്തെ സമകാലിക സാഹചര്യങ്ങളും സഭകൾ നേരിടുന്ന വെല്ലുവിളികളും പ്രധാന ചർച്ചാ വിഷയങ്ങളായി.
സഹോദരസ്നേഹവും പരസ്പര ബഹുമാനവും നിറഞ്ഞ അന്തരീക്ഷത്തിൽ നടന്ന കൂടിക്കാഴ്ചയിൽ പശ്ചിമേഷ്യയിലെ രാഷ്ട്രീയ-സാമൂഹിക സാഹചര്യങ്ങൾ, ക്രൈസ്തവ സമൂഹങ്ങളുടെ നിലനിൽപ്പുമായി ബന്ധപ്പെട്ട ആശങ്കകൾ, സഭകൾ തമ്മിലുള്ള സഹകരണം ശക്തിപ്പെടുത്തുന്നതിനുള്ള മാർഗങ്ങൾ എന്നിവ വിശദമായി വിലയിരുത്തി. എക്യുമെനിക്കൽ ബന്ധങ്ങൾ കൂടുതൽ സജീവമാക്കുന്നതിനും പൊതുതാൽപര്യമുള്ള സഭാ വിഷയങ്ങളിൽ ഒരുമിച്ച് മുന്നോട്ടുപോകുന്നതിനും ഇരുപാത്രിയർക്കീസുമാർ അഭിപ്രായപ്പെട്ടു.
മധ്യപൂർവദേശത്തെ ക്രൈസ്തവ സാന്നിധ്യം സംരക്ഷിക്കുന്നതിൽ സഭകൾ തമ്മിലുള്ള ഐക്യവും കൂട്ടായ പ്രവർത്തനവും അനിവാര്യമാണെന്ന് ഇരുനേതാക്കളും ചൂണ്ടിക്കാട്ടി. സമാധാനത്തിനും മതസൗഹാർദത്തിനും മനുഷ്യാവകാശ സംരക്ഷണത്തിനുമായി സഭകൾ കൂടുതൽ സജീവമായി ഇടപെടേണ്ടതിന്റെ ആവശ്യകതയും ചർച്ചയിൽ ഉയർന്നുവന്നു.
പരിശുദ്ധ പാത്രിയർക്കീസ് ബാവായെ അനുഗമിച്ച് പാത്രിയർക്കൽ ഉപദേഷ്ടാവ് മോർ തെയോഫിലോസ് ജോർജ് സ്ലീബാ, ജസീറ–യൂഫ്രട്ടീസ് മെത്രാപ്പോലീത്ത മോർ മൗറീസ് അംസിഹ്, പാത്രിയർക്കൽ സെക്രട്ടറി മോർ ഔഗീൻ അൽ-ഖൂരി നെമത്ത് എന്നിവർ പങ്കെടുത്തു. സുറിയാനി കത്തോലിക്കാ സഭയെ പ്രതിനിധീകരിച്ച് പാത്രിയർക്കൽ വികാരി ജനറലും സെക്രട്ടറിയുമായ വന്ദ്യ ഹബീബ് മുറാദ് കോറെപ്പിസ്കോപ്പയും അസിസ്റ്റന്റ് സെക്രട്ടറി ഫാ. കരീം കലാഷും സന്നിഹിതരായിരുന്നു.
പ്രദേശത്ത് സമാധാനവും സ്ഥിരതയും പുലരണമെന്നും മധ്യപൂർവദേശത്തെ ജനങ്ങൾ സുരക്ഷിതത്വത്തോടെയും പ്രത്യാശയോടെയും ജീവിക്കാൻ സാഹചര്യമൊരുങ്ങണമെന്നും പ്രാർത്ഥിച്ചുകൊണ്ടാണ് കൂടിക്കാഴ്ച സമാപിച്ചത്.
Comments (0)