പുത്തൻകുരിശ്: ഭാഗ്യസ്മരണാർഹനായ ശ്രേഷ്ഠ ബസേലിയോസ് തോമസ് പ്രഥമൻ കാതോലിക്ക ബാവായുടെ സ്മരണാർത്ഥം, അദ്ദേഹം പ്രാഥമിക വിദ്യാഭ്യാസം നേടിയ ചൂണ്ടി വടയമ്പാടി ഗവൺമെന്റ് എൽ.പി. സ്കൂളിലെ വിദ്യാർത്ഥികൾക്ക് പഠനോപകരണങ്ങൾ വിതരണം ചെയ്തു.
സ്കൂളിൽ സംഘടിപ്പിച്ച ചടങ്ങിൽ അങ്കമാലി മേഖലാധിപൻ അഭിവന്ദ്യ ഡോ. മാത്യൂസ് മോർ അന്തിമോസ് മെത്രാപ്പോലീത്ത പഠനോപകരണങ്ങൾ പ്രധാനാധ്യാപികയ്ക്ക് കൈമാറി വിതരണ പരിപാടിയുടെ ഉദ്ഘാടനം നിർവഹിച്ചു.
വിദ്യാഭ്യാസ രംഗത്ത് വിദ്യാർത്ഥികൾക്ക് കൂടുതൽ പ്രോത്സാഹനവും പിന്തുണയും നൽകുകയെന്ന ലക്ഷ്യത്തോടെയാണ് പദ്ധതി നടപ്പിലാക്കിയതെന്ന് സംഘാടകർ അറിയിച്ചു. സമൂഹത്തോടും വിദ്യാഭ്യാസ മേഖലയോടും എന്നും പ്രത്യേക താത്പര്യം പുലർത്തിയിരുന്ന ശ്രേഷ്ഠ ബാവായുടെ സ്മരണയെ അർത്ഥവത്താക്കുന്ന പ്രവർത്തനമായാണ് പരിപാടിയെ വിലയിരുത്തിയത്.
വിദ്യാർത്ഥികളുടെ പഠനമികവ് വർധിപ്പിക്കുന്നതിനും വിദ്യാഭ്യാസത്തിനുള്ള പ്രചോദനം പകരുന്നതിനും ഇത്തരം സംരംഭങ്ങൾ സഹായകരമാകുമെന്ന് അഭിവന്ദ്യ മെത്രാപ്പോലീത്ത പറഞ്ഞു.
ചടങ്ങിൽ വൈദികർ, അധ്യാപകർ, രക്ഷിതാക്കൾ, സ്കൂൾ അധികൃതർ, വിശ്വാസി സമൂഹ പ്രതിനിധികൾ എന്നിവർ പങ്കെടുത്തു.
Comments (0)