എർബിലിൽ സഭാ നേതാക്കളുമായി കൂടിക്കാഴ്ച നടത്തി പരിശുദ്ധ പാത്രിയർക്കീസ് ബാവാ

എർബിൽ: ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവാ, എർബിലിലെ കൽദായ സഭാ ആർച്ച് ബിഷപ്പ് ബഷാർ വർദയെയും ഹെദ്യാബിലെ സുറിയാനി കത്തോലിക്കാ ആർച്ച് ബിഷപ്പ് മോർ നഥനയേൽ നിസാർ സെമാനെയും സ്വീകരിച്ചു. ജൂൺ 4-ന് എർബിലിലെ അതിഭദ്രാസന ആസ്ഥാനത്ത് നടന്ന കൂടിക്കാഴ്ച സൗഹൃദത്തിന്റെയും സഭൈക്യത്തിന്റെയും സന്ദേശമായി. കൂടിക്കാഴ്ചയിൽ മൊസൂൾ, കിർകുക്ക്, കുർദിസ്ഥാൻ, പരിസര പ്രദേശങ്ങൾ എന്നിവിടങ്ങളിലെ മെത്രാപ്പോലീത്ത അഭിവന്ദ്യ മോർ നിക്കോദീമോസ് ദാവൂദ് ഷറഫ്, മോർ മത്താ ആശ്രമ അതിഭദ്രാസനത്തിന്റെ മെത്രാപ്പോലീത്ത അഭിവന്ദ്യ മോർ തിമോത്തെയോസ് മൂസ അൽ-ഷാമാനി, ജസീറ-യൂഫ്രട്ടീസ് അതിഭദ്രാസനത്തിന്റെ മെത്രാപ്പോലീത്ത അഭിവന്ദ്യ മോർ മൗറീസ് അംസിഹ്, പാത്രിയർക്കൽ സെക്രട്ടറി അഭിവന്ദ്യ മോർ ഔഗീൻ അൽ-ഖൂരി നെമത്ത് എന്നിവരും പങ്കെടുത്തു. സഹോദരസ്നേഹവും പരസ്പര ബഹുമാനവും നിറഞ്ഞ അന്തരീക്ഷത്തിൽ നടന്ന ആശയവിനിമയത്തിൽ സഭകൾ തമ്മിലുള്ള ബന്ധം കൂടുതൽ ശക്തിപ്പെടുത്തുന്നതിനുള്ള മാർഗങ്ങൾ ചർച്ചയായി. ഇറാഖിലെയും മധ്യപൂർവദേശ മേഖലയിലെയും ക്രൈസ്തവ സമൂഹത്തിന്റെ നിലവിലെ സാഹചര്യം, അവർ അഭിമുഖീകരിക്കുന്ന വെല്ലുവിളികൾ, മതസൗഹാർദവും സമാധാനവും നിലനിർത്തുന്നതിൽ സഭകളുടെ പങ്ക് തുടങ്ങിയ വിഷയങ്ങളും സംഭാഷണത്തിൽ ഇടം നേടി. മധ്യപൂർവദേശത്തെ ക്രൈസ്തവ സാന്നിധ്യം സംരക്ഷിക്കുന്നതിനും വിശ്വാസി സമൂഹത്തിന്റെ അവകാശങ്ങളും പാരമ്പര്യങ്ങളും ശക്തിപ്പെടുത്തുന്നതിനും സഭകൾ തമ്മിലുള്ള സഹകരണവും ഐക്യവും കൂടുതൽ വളർത്തിയെടുക്കേണ്ടതിന്റെ ആവശ്യകത പരിശുദ്ധ പാത്രിയർക്കീസ് ബാവാ ചൂണ്ടിക്കാട്ടി. ക്രൈസ്തവ സഭകൾ തമ്മിലുള്ള സൗഹൃദവും കൂട്ടായ പ്രവർത്തനവും കാലഘട്ടത്തിന്റെ ആവശ്യകതയാണെന്നും, പരസ്പര സഹകരണത്തിലൂടെ വിശ്വാസി സമൂഹത്തിന് കൂടുതൽ ശക്തിയും പ്രത്യാശയും പകരാനാകുമെന്നും കൂടിക്കാഴ്ചയിൽ അഭിപ്രായപ്പെട്ടു.

Comments (0)

Related Stories