മന്ത്രി റോജി എം. ജോൺ ശ്രേഷ്ഠ കാതോലിക്ക ബാവായെ സന്ദർശിച്ചു

തിരുവാങ്കുളം: സംസ്ഥാന ഉന്നതവിദ്യാഭ്യാസ വകുപ്പ് മന്ത്രി റോജി എം. ജോൺ, മലങ്കര യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്ക ബാവായെ സന്ദർശിച്ചു. തിരുവാങ്കുളത്തെ ക്യംതാ സെമിനാരിയിലെ കാതോലിക്കോസ് റെസിഡൻസിൽ നടന്ന കൂടിക്കാഴ്ചയിൽ സഭാ-സാമൂഹിക വിഷയങ്ങളും വികസനകാര്യങ്ങളും ചർച്ചയായി.

ലോക പരിസ്ഥിതി ദിനത്തോടനുബന്ധിച്ച് ഹരിതോപഹാരം നൽകിയാണ് ശ്രേഷ്ഠ ബാവ മന്ത്രിയെ സ്വീകരിച്ചത്. പരിസ്ഥിതി സംരക്ഷണത്തിന്റെ പ്രാധാന്യവും സുസ്ഥിര വികസനത്തിന്റെ ആവശ്യകതയും ഇരുവരും ചർച്ച ചെയ്തു.

സഭയുമായി ബന്ധപ്പെട്ട വിവിധ വിഷയങ്ങൾക്കും പ്രാദേശിക വികസന പ്രവർത്തനങ്ങൾക്കും പുറമേ സമൂഹത്തിന്റെ സമഗ്ര പുരോഗതിക്കായി കൂട്ടായ പ്രവർത്തനങ്ങളുടെ ആവശ്യകതയും കൂടിക്കാഴ്ചയിൽ ഉയർന്നുവന്നു. വിദ്യാഭ്യാസ മേഖലയിലെ പുരോഗതിക്കും യുവതലമുറയുടെ ശാക്തീകരണത്തിനും കൂടുതൽ ശ്രദ്ധ നൽകേണ്ടതിന്റെ ആവശ്യകതയും ചർച്ച ചെയ്യപ്പെട്ടു.

ഉന്നതവിദ്യാഭ്യാസ രംഗത്ത് ഗുണമേന്മയും നവീന സാധ്യതകളും സൃഷ്ടിക്കുന്ന പ്രവർത്തനങ്ങൾക്ക് നേതൃത്വം നൽകാൻ മന്ത്രി റോജി എം. ജോണിന് സാധിക്കട്ടെയെന്നും സർവശക്തനായ ദൈവത്തിന്റെ അനുഗ്രഹവും കരുതലും എന്നും കൂടെയുണ്ടാകട്ടെയെന്നും ശ്രേഷ്ഠ ബാവ ആശംസിച്ചു.

കൂടിക്കാഴ്ചയിൽ അങ്കമാലി മേഖലാധിപൻ അഭിവന്ദ്യ ഡോ. മാത്യൂസ് മോർ അന്തിമോസ് മെത്രാപ്പോലീത്ത, മഞ്ഞപ്ര ഗ്രാമപഞ്ചായത്ത് പ്രസിഡന്റ് സണ്ണി പൈനാടത്ത്, ചോറ്റാനിക്കര ഗ്രാമപഞ്ചായത്ത് അംഗം ജോൺസൺ ടി. തുരുത്തിയിൽ, അരമന മാനേജർ ഫാ. ജോഷി മാത്യു ചിറ്റേത്ത് എന്നിവർ സന്നിഹിതരായിരുന്നു.