ദമാസ്കസ്: അർമേനിയൻ കത്തോലിക്ക സഭയുടെ ദമാസ്കസ് ആർച്ച് ബിഷപ്പ് ജോർജ് അസ്സദൂരിയൻ പരിശുദ്ധ സുറിയാനി ഓർത്തഡോക്സ് സഭയുടെ പരമാധ്യക്ഷൻ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവായെ സന്ദർശിച്ചു. ഒക്ടോബർ 28-ന് ബാബ് തൂമയിലെ പാത്രിയർക്കൽ ആസ്ഥാനത്ത് നടന്ന കൂടിക്കാഴ്ചയിൽ വെരി റവ. മോൺ. ജോർജ് ബാഹിയും അദ്ദേഹത്തോടൊപ്പമുണ്ടായിരുന്നു.
പരിശുദ്ധ പാത്രിയർക്കീസ് ബാവായോടൊപ്പം പാത്രിയർക്കൽ അസിസ്റ്റന്റായ മോർ ജോസഫ് ബാലി മെത്രാപ്പോലീത്ത, യുവജനകാര്യ-ക്രൈസ്തവ വിദ്യാഭ്യാസ വിഭാഗത്തിന്റെ പാത്രിയർക്കൽ വികാരിയായ മോർ ആൻഡ്രാവോസ് ബാഹി മെത്രാപ്പോലീത്ത, പാത്രിയർക്കൽ സെക്രട്ടറി മോർ ഔഗീൻ അൽ-ഖൂരി നെമത്ത് എന്നിവരും കൂടിക്കാഴ്ചയിൽ പങ്കെടുത്തു.
സൗഹൃദപരമായ അന്തരീക്ഷത്തിൽ നടന്ന കൂടിക്കാഴ്ചയിൽ സഭയുമായി ബന്ധപ്പെട്ട വിഷയങ്ങളും സിറിയയിലെ നിലവിലെ സാഹചര്യങ്ങളും ചർച്ച ചെയ്തു. വിവിധ ക്രൈസ്തവ സഭകൾ തമ്മിലുള്ള സഹകരണവും രാജ്യത്തെ ക്രൈസ്തവ സമൂഹം നേരിടുന്ന സമകാലിക വെല്ലുവിളികളും ആശയവിനിമയത്തിൽ വിഷയമായി.
സിറിയയിലെ ക്രൈസ്തവ സാന്നിധ്യം ശക്തിപ്പെടുത്തുന്നതിനും സഭകൾ തമ്മിലുള്ള സഹകരണവും പരസ്പര പിന്തുണയും വർധിപ്പിക്കുന്നതിനും തുടർന്നും ഒരുമിച്ച് പ്രവർത്തിക്കേണ്ടതിന്റെ പ്രാധാന്യം ഇരുപക്ഷവും ചർച്ച ചെയ്തതായി സഭാ വൃത്തങ്ങൾ അറിയിച്ചു.
Comments (0)