മുംബൈ: മലങ്കര യാക്കോബായ സുറിയാനി ഓർത്തഡോക്സ് സഭയുടെ മുംബൈ ഭദ്രാസന സഹായ മെത്രാപ്പോലീത്തയായി അഭിവന്ദ്യ മോർ യൗസേബിയോസ് കുര്യാക്കോസ് മെത്രാപ്പോലീത്ത ചുമതലയേറ്റു. നവിമുംബൈ അന്താരാഷ്ട്ര വിമാനത്താവളത്തിലെത്തിയ മെത്രാപ്പോലീത്തയെ ഭദ്രാസനത്തിന്റെ നേതൃത്വത്തിൽ ഊഷ്മളമായി സ്വീകരിച്ച് നെരുൾ ഭദ്രാസന അരമനയിലേക്ക് ആനയിച്ചു.
ഉച്ചകഴിഞ്ഞ് 3.30ന് വിമാനത്താവളത്തിലെത്തിയ അഭിവന്ദ്യ പിതാവിനെ ഭദ്രാസന സെക്രട്ടറി ഫാ. ബിനോയ് എം., വൈദികർ, ഭദ്രാസന സമിതി അംഗങ്ങൾ, വിവിധ ഇടവകകളിൽ നിന്നെത്തിയ വിശ്വാസികൾ എന്നിവർ ചേർന്ന് സ്വീകരിച്ചു. തുടർന്ന് പ്രത്യേക സ്വീകരണത്തോടെയാണ് നെരുൾ അരമനയിലേക്ക് ആനയിച്ചത്.
അരമന ചാപ്പലിൽ നടന്ന പ്രത്യേക പ്രാർഥനയ്ക്ക് ശേഷം സ്വീകരണ സമ്മേളനം സംഘടിപ്പിച്ചു. ഭദ്രാസനത്തിന്റെ ആത്മീയ-ഭരണപരമായ പ്രവർത്തനങ്ങളിൽ പുതിയ അധ്യായത്തിന് തുടക്കം കുറിച്ചുകൊണ്ട് സ്വീകരണ സമ്മേളനത്തിനുശേഷം ചുമതലയേൽപ്പ് ചടങ്ങും നടന്നു.
മുംബൈ ഭദ്രാസനത്തിന്റെ വളർച്ചയ്ക്കും സഭാ പ്രവർത്തനങ്ങൾക്കും പുതിയ ഊർജം പകരുന്നതായാണ് മോർ യൗസേബിയോസ് കുര്യാക്കോസ് മെത്രാപ്പോലീത്തയുടെ നിയമനത്തെ വിശ്വാസിസമൂഹം വിലയിരുത്തുന്നത്. യുവജന പ്രവർത്തനങ്ങൾ, ആത്മീയ ശുശ്രൂഷകൾ, ഭദ്രാസനത്തിന്റെ വിവിധ മിഷൻ പ്രവർത്തനങ്ങൾ എന്നിവയ്ക്ക് കൂടുതൽ ശക്തി പകരാൻ പുതിയ നേതൃത്വത്തിന് സാധിക്കുമെന്ന പ്രതീക്ഷയും ഭദ്രാസനാംഗങ്ങൾ പങ്കുവെച്ചു.
ജൂൺ 16 വരെ മുംബൈ ഭദ്രാസനത്തിലെ വിവിധ ആത്മീയ, ഭരണപര, സഭാ പരിപാടികളിൽ അഭിവന്ദ്യ പിതാവ് പങ്കെടുക്കുമെന്ന് ഭദ്രാസന അധികൃതർ അറിയിച്ചു.
Comments (0)