ടി.യു. കുരുവിളയുടെ ജീവിതം മാതൃകയെന്ന് ഫാ. റോയി ജോർജ് കട്ടച്ചിറ

കോതമംഗലം: ദൈവബന്ധത്തിലും മനുഷ്യബന്ധത്തിലും ഒരുപോലെ ആഴം പുലർത്തി സഭയെയും സമൂഹത്തെയും ആത്മാർത്ഥമായി സ്നേഹിച്ച മഹത് വ്യക്തിത്വമായിരുന്നു ഷെവലിയാർ കമാൻഡർ ബാർ ഈത്തോ ശാരീരോ ടി.യു. കുരുവിളയെന്ന് യാക്കോബായ സുറിയാനി സഭയുടെ വൈദീക ട്രസ്റ്റി റവ. ഫാ. റോയി ജോർജ് കട്ടച്ചിറ അനുസ്മരിച്ചു.

രാഷ്ട്രീയ, സാമൂഹിക, വിദ്യാഭ്യാസ, സഭാ മേഖലകളിൽ ഒരുപോലെ വ്യക്തിമുദ്ര പതിപ്പിച്ച ടി.യു. കുരുവിള, മനസ്സാക്ഷിയുടെ പ്രചോദനവും ഹൃദയവിശാലതയും കൈമുതലാക്കിയ നേതാവായിരുന്നുവെന്ന് അദ്ദേഹം പറഞ്ഞു. കൃഷിയിലും വ്യാപാര മേഖലയിലും സജീവമായിരുന്ന അദ്ദേഹം 2006-ലും 2011-ലും കോതമംഗലം മണ്ഡലത്തിൽ നിന്ന് കേരള നിയമസഭയിലേക്ക് തിരഞ്ഞെടുക്കപ്പെടുകയും സംസ്ഥാന പൊതുമരാമത്ത് വകുപ്പ് മന്ത്രിയായും കേരള ഹൗസിംഗ് ബോർഡ് ചെയർമാനായും സേവനമനുഷ്ഠിക്കുകയും ചെയ്തു.

സഭാ രംഗത്തും ശ്രദ്ധേയമായ സംഭാവനകൾ നൽകിയ ടി.യു. കുരുവിള, മഞ്ഞിനിക്കര ദയറാ കമ്മിറ്റി പ്രധാനിയായും മലങ്കര യാക്കോബായ സുറിയാനി ഓർത്തഡോക്സ് സഭയുടെ സെക്രട്ടറിയായും പ്രവർത്തിച്ചിരുന്നുവെന്ന് ഫാ. റോയി ജോർജ് ചൂണ്ടിക്കാട്ടി. സഭയുടെ പ്രതിസന്ധിഘട്ടങ്ങളിലും ആഘോഷവേളകളിലും സജീവ സാന്നിധ്യമായിരുന്ന അദ്ദേഹത്തിന്റെ സമർപ്പിത സേവനങ്ങളെ പരിഗണിച്ച് പരിശുദ്ധ പാത്രിയർക്കീസ് ബാവ "കമാൻഡർ ബാർ ഈത്തോ ശാരീരോ" ഉൾപ്പെടെയുള്ള വിശിഷ്ട ബഹുമതികൾ നൽകി ആദരിച്ചിരുന്നു.

ജീവകാരുണ്യ പ്രവർത്തനങ്ങളിലും അദ്ദേഹം മാതൃകാപരമായ ഇടപെടലുകൾ നടത്തിയിരുന്നു. പ്രളയബാധിതർക്കായി ഭവന നിർമ്മാണത്തിന് 13 സെന്റ് സ്ഥലം സൗജന്യമായി നൽകുകയും സാമ്പത്തിക സഹായം നൽകുകയും ചെയ്ത അദ്ദേഹത്തിന്റെ കാരുണ്യ പ്രവർത്തനങ്ങൾ സമൂഹത്തിന് വലിയ ആശ്വാസമായിരുന്നുവെന്ന് ഫാ. റോയി ജോർജ് അനുസ്മരിച്ചു.

മന്ത്രി സ്ഥാനത്തിരിക്കെ ഔദ്യോഗിക യാത്രാമധ്യേ വാഹനം നിർത്തി കട്ടച്ചിറ പള്ളി വക കുരിശുപള്ളിയുടെ കൂദാശ ചടങ്ങിൽ പങ്കെടുത്ത സംഭവം അദ്ദേഹത്തിന്റെ സഭാസ്നേഹത്തിന്റെയും വിശ്വാസ പ്രതിബദ്ധതയുടെയും തെളിവായി ഇന്നും മനസ്സിൽ നിറഞ്ഞുനിൽക്കുന്നതായും അദ്ദേഹം പറഞ്ഞു.

ശ്രേഷ്ഠ ബസേലിയോസ് തോമസ് പ്രഥമൻ കാതോലിക്ക ബാവായുടെ വിശ്വസ്ത സഹപ്രവർത്തകനായിരുന്ന ടി.യു. കുരുവിള സഭയുടെ വളർച്ചയ്ക്കും സംരക്ഷണത്തിനുമായി അക്ഷീണം പ്രവർത്തിച്ച നേതാവായിരുന്നു. അദ്ദേഹം പൂർത്തിയാക്കിയ സേവനസമ്പന്നമായ ജീവിതം സഭയ്ക്കും സമൂഹത്തിനും എന്നും പ്രചോദനമായി നിലനിൽക്കുമെന്നും ഫാ. റോയി ജോർജ് കട്ടച്ചിറ കൂട്ടിച്ചേർത്തു.

"നല്ല പോർ പൊരുതി, ഓട്ടം തികച്ച്, വിശ്വാസം കാത്ത അങ്ങേയ്ക്ക് നീതിയുടെ കിരീടം തമ്പുരാൻ നൽകട്ടെ" എന്ന് പ്രാർത്ഥിച്ചുകൊണ്ട് ഫാ. റോയി ജോർജ് കട്ടച്ചിറ അന്തരിച്ച നേതാവിന് ആദരാഞ്ജലികൾ അർപ്പിച്ചു.