കർണാടക സംസ്ഥാന മന്ത്രി കെ.ജെ. ജോർജിന് ആശംസകളുമായി ശ്രേഷ്ഠ കാതോലിക്ക ബാവ

ബെംഗളൂരു: കർണാടക ഡി. കെ. ശിവകുമാർ മന്ത്രിസഭയിൽ മന്ത്രിയായി സത്യപ്രതിജ്ഞ ചെയ്ത് ചുമതലയേറ്റ കെ.ജെ. ജോർജിന് അഭിനന്ദനങ്ങളും പ്രാർത്ഥനാശംസകളും നേർന്ന് മലങ്കര യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് കാതോലിക്ക ബാവ. സുറിയാനി സഭാ പാരമ്പര്യത്തിൽ വേരൂന്നിയ കെ.ജെ. ജോർജിനോടും കുടുംബത്തോടുമുള്ള ആത്മബന്ധം ആശംസാസന്ദേശത്തിൽ ശ്രേഷ്ഠ ബാവ അനുസ്മരിച്ചു. പരിശുദ്ധ അന്ത്യോഖ്യാ സിംഹാസനത്തോടുള്ള ഭക്തിയും വിധേയത്വവും സഭയോടുള്ള ആത്മാർത്ഥമായ സമർപ്പണവും അദ്ദേഹത്തിന്റെ ജീവിതത്തിലും പൊതുപ്രവർത്തനങ്ങളിലും എല്ലായ്പ്പോഴും പ്രകടമാണെന്ന് ബാവ പറഞ്ഞു. ബാംഗ്ലൂർ ഭദ്രാസനത്തിന്റെ വളർച്ചയ്ക്കും സഭയുടെ വിവിധ പ്രവർത്തനങ്ങൾക്കും കെ.ജെ. ജോർജ് നൽകിയ പിന്തുണയും കരുതലും നന്ദിയോടെ സ്മരിക്കുന്നതായും ശ്രേഷ്ഠ ബാവ വ്യക്തമാക്കി. സഭയോടും സമൂഹത്തോടുമുള്ള അദ്ദേഹത്തിന്റെ പ്രതിബദ്ധത മാതൃകാപരമാണെന്നും അദ്ദേഹം കൂട്ടിച്ചേർത്തു. മന്ത്രിസഭയിലേക്കുള്ള പുനർനിയോഗം ഒരു ഭരണപരമായ ചുമതല മാത്രമല്ല, പൊതുരംഗത്തും ജനസേവന മേഖലയിലും അദ്ദേഹം കാഴ്ചവെച്ച സമർപ്പിത പ്രവർത്തനങ്ങൾക്കുള്ള അംഗീകാരം കൂടിയാണെന്ന് ശ്രേഷ്ഠ ബാവ അഭിപ്രായപ്പെട്ടു. ദീർഘകാല രാഷ്ട്രീയ അനുഭവവും ജനങ്ങളുമായുള്ള അടുത്ത ബന്ധവും കൈമുതലാക്കി കർണാടകയുടെ വികസനത്തിനും ജനക്ഷേമത്തിനുമായി കൂടുതൽ ഫലപ്രദമായി പ്രവർത്തിക്കാൻ അദ്ദേഹത്തിന് സാധിക്കട്ടെയെന്നും ബാവ ആശംസിച്ചു. ജനങ്ങളുടെ ക്ഷേമത്തിനും സംസ്ഥാനത്തിന്റെ സമഗ്ര പുരോഗതിക്കുമായി നടത്തുന്ന എല്ലാ പ്രവർത്തനങ്ങൾക്കും സർവശക്തനായ ദൈവത്തിന്റെ അനുഗ്രഹവും മാർഗദർശനവും ഉണ്ടാകട്ടെയെന്ന് പ്രാർത്ഥിക്കുന്നതായും ശ്രേഷ്ഠ കാതോലിക്ക ബാവ ആശംസാ സന്ദേശത്തിൽ പറഞ്ഞു.

Comments (0)

Related Stories